ખાલી તમારા ખિસ્સામાં જ રૂપિયા નથી, લોકોએ એક જ દિવસમાં 70 અબજ ડોલરની ખરીદી કરી

અમેરિકામાં એક દિવસમાં ઓનલાઈન શોપિંગ કરવાનો નવો રેકોર્ડ સર્જાયો છે. બ્લેક ફ્રાઈડે પર $9.8 બિલિયનની ખરીદી કરવામાં આવી હતી. આ પ્રસંગે સમગ્ર વિશ્વમાં 70 અબજ ડોલરનું વિક્રમી ઓનલાઈન વેચાણ થયું હતું.

નવી દિલ્લીઃ અમેરિકામાં મંદીનો ડર હજુ સંપૂર્ણ રીતે સમાપ્ત થયો નથી, પરંતુ બ્લેક ફ્રાઈડેના અવસર પર ઓનલાઈન શોપિંગનો નવો રેકોર્ડ બન્યો છે. આ પ્રસંગે લોકોએ 9.8 અબજ ડોલરની ઓનલાઈન ખરીદી કરી હતી. જે ગયા વર્ષ કરતાં 7.5% વધુ છે. બ્લેક ફ્રાઈડેના એક દિવસ પહેલાં થેંક્સગિવીંગ ડે પર યુ.એસ.માં કુલ $5.6 બિલિયનનું ઓનલાઈન વેચાણ થયું હતું. આ રીતે અમેરિકામાં બે દિવસમાં કુલ 15.4 અબજ ડોલરનું બમ્પર વેચાણ થયું હતું. બ્લેક ફ્રાઈડેના અવસર પર સમગ્ર વિશ્વમાં $70 બિલિયનનું રેકોર્ડ ઓનલાઈન વેચાણ થયું. અમેરિકા સહિત ઘણા પશ્ચિમી દેશોમાં થેંક્સગિવિંગ ગુરુવારથી સાયબર સોમવાર સુધી ખરીદીને શુભ માનવામાં આવે છે.

Adobe Analytics અનુસાર, ગયા વર્ષે બ્લેક ફ્રાઈડે પર $9.12 બિલિયનનું ઓનલાઈન વેચાણ થયું હતું. સૌથી વધુ વેચાણ ઇલેક્ટ્રોનિક્સ, સ્માર્ટ હોમ ઇક્વિપમેન્ટ, રમકડાં અને કસરતનાં સાધનોનું હતું. આ વર્ષે તેમાં 5.7 ટકા વૃદ્ધિ થવાની ધારણા હતી પરંતુ તે અપેક્ષા કરતાં ઘણી સારી હતી. અમેરિકા મોંઘવારી અને ઊંચા ઉધાર ખર્ચની સમસ્યાનો સામનો કરી રહ્યું છે. ગ્રાહક સેન્ટિમેન્ટમાં પણ ઘટાડો થયો છે. પરંતુ તેમ છતાં લોકોએ ખરીદીનો નવો રેકોર્ડ બનાવ્યો.

કેવી રીતે થઈ શરૂઆત?
બ્લેક ફ્રાઈડેની શરૂઆત 1950ના દાયકામાં ફિલાડેલ્ફિયામાં થઈ હતી. થેંક્સગિવીંગ ડે પછી આસપાસના નગરોમાંથી લોકો ખરીદી કરવા માટે મોટી સંખ્યામાં ફિલાડેલ્ફિયા આવ્યા. પછી તે એક રીતે પરંપરા બની ગઈ. દર વર્ષે આ પ્રસંગે લોકો મોટી સંખ્યામાં ખરીદી કરવા આવે છે. દુકાનદારોએ પણ આ તકનો ભરપૂર લાભ લીધો અને વિવિધ પ્રકારના ડિસ્કાઉન્ટ આપીને તેમનું વેચાણ વધાર્યું. પરંતુ આ દરમિયાન ટ્રાફિક પોલીસનો મરો થઈ જતો હતો. ભીડને નિયંત્રિત કરવા માટે, તેમણે 12-12 કલાક કામ કરવું પડતું અને રજા લઈ શકતા ન હતા. આ કારણોસર તેને બ્લેક ફ્રાઈડે નામ આપવામાં આવ્યું હતું.

ધીરે ધીરે તે અમેરિકાના અન્ય શહેરોમાં પણ ફેલાઈ. વર્ષ 1961માં, તેને બિગ ફ્રાઈડે તરીકે રિબ્રાન્ડ કરવાનો પ્રયાસ કરવામાં આવ્યો હતો જેથી કરીને તેને સકારાત્મક સ્પર્શ આપી શકાય. પરંતુ આ પ્રયાસ સફળ થયો નહીં. આ દિવસની વધતી જતી લોકપ્રિયતાને જોઈને દુકાનદારોએ તે મુજબ વ્યૂહરચના બનાવી. સ્થિતિ એવી બની કે 2003માં ઘણી દુકાનો સવારે પાંચ વાગ્યે ખુલવા લાગી. તે જ વર્ષે તે વર્ષનો સૌથી નફાકારક દિવસ બન્યો. તે પહેલા અમેરિકામાં સૌથી વધુ વેચાણ ડિસેમ્બરના અંતમાં થતું હતું.

ક્રિસમસ શોપિંગની શરૂઆત-
વર્ષ 2011માં વોલમાર્ટે તેમાં વધુ એક ટ્વિસ્ટ ઉમેર્યો. કંપનીએ થેંક્સગિવીંગ ડે પર રાત્રે 10 વાગ્યે સ્ટોર્સ ખોલ્યા અને બ્લેક ફ્રાઈડે પર આખો દિવસ ખુલ્લા રાખ્યા. ઈન્ટરનેટના ઉદયને કારણે 2005માં બીજી શોપિંગ હોલિડેનો જન્મ થયો. તેને સાયબર મન્ડે નામ આપવામાં આવ્યું હતું. આ રીતે, ગુરુવારે થેંક્સગિવિંગ ડેથી ખરીદી શરૂ થાય છે અને આ ટ્રેન્ડ સાયબર સોમવાર સુધી ચાલુ રહે છે. તેને ખ્રિસ્તીઓના સૌથી મોટા તહેવાર ક્રિસમસની ખરીદીની શરૂઆત પણ માનવામાં આવે છે. ક્રિસમસ 25 ડિસેમ્બરે ઉજવણી કરવામાં આવે છે.