BOX OFFICE પર 'હાઉસફૂલ 4' ફિલ્મે મચાવી ધમાલ, પ્રથમ દિવસે આટલી કરી કમાણી

નવી દિલ્હી: બોલિવૂડના ખેલાડી અક્ષયકુમારની મોસ્ટ અવેટેડ ફિલ્મ હાઉસફૂલ 4 (Housefull 4) ગઈ કાલે 25મી ઓક્ટોબરે થિયેટરમાં રિલીઝ થઈ ગઈ. આ ફિલ્મની લોકો આતુરતાપૂર્વક રાહ જોઈ રહ્યા હતાં. ફરહાદ સામજી દ્વારા દિગ્દર્શીત આ ફિલ્મ એક મલ્ટીસ્ટારર ફિલ્મ છે. જેમાં અક્ષયકુમારની સાથે કૃતિ સેનન, રિતેશ દેશમુખ, કૃતિ ખરબંદા, બોબી દેઓલ અને પૂજા ગર્ગ મહત્વની ભૂમિકામાં છે. આ ફિલ્મ સાજીદ નડિયાદવાલાની નડિયાદવાલા ગ્રાન્ડસન એન્ટરટેઈનમેન્ટ દ્વારા પ્રસ્તુત અને નિર્મિત છે અને ફોક્સ સ્ટાર સ્ટુડિયો દ્વારા સહનિર્મિત છે. 

આ ફિલ્મનું પ્રથમ દિવસનું બોક્સ ઓફિસ કલેક્શન આવી ગયું છે. જેમાં સ્પષ્ટપણે જોવા મળી રહ્યું છે કે આ ફિલ્મ લોકોને ખુબ પસંદ પડી રહી છે. બોક્સ ઓફિસ ઈન્ડિયાના જણાવ્યાં મુજબ હાઉસફૂલ 4 ફિલ્મે પહેલા દિવસે કુલ 18.50 કરોડ રૂપિયાની કમાણી કરી છે. અત્રે જણાવવાનું કે આ સાથે જ ફિલ્મે એક નવો રેકોર્ડ પણ પોતાના નામે કર્યો છે. હકીકતમાં કમાણીના મામલે અત્યાર સુધી હાઉસફૂલ સિરીઝની આ ફિલ્મ સૌથી મોટી ઓપનિંગ ફિલ્મ બનીને ઊભરી છે. 

હાઉસફૂલ: 9.32 કરોડ (2010)
હાઉસફૂલ 2: 12.19 કરોડ (2012)
હાઉસફૂલ 3: 15.24 કરોડ (2016)
હાઉસફૂલ 4: 18.50 કરોડ (2019)

આ ફિલ્મ એક કોમેડી ફિલ્મ છે જો કે કેટલાક ક્રિટિક્સે આ ફિલ્મની ટીકા કરી છે. પરંતુ આમ છતાં લાગે છે કે દર્શકોને તેનાથી કોઈ ફરક પડતો નથી. શરૂઆતથી લઈને છેલ્લે સુધી આ ફિલ્મ હસાવીને લોથપોથ કરી દે છે. ફિલ્મમાં અક્ષયકુમાર, કૃતિ સેનન, રિતેશ દેશમુખ, કૃતિ ખરબંદા, બોબી દેઓલ અને પૂજા ગર્ગ ઉપરાંત અન્ય તમામ સપોર્ટિંગ સ્ટાર્સનો અભિનય વખાણવા લાયક છે.