Air Indiaનો મોટો નિર્ણય, 1 ઓગસ્ટથી અમદાવાદ-લંડન ગેટવિક માટે નહીં ઉડે કોઈ ફ્લાઈટ; પછી ક્યારે થશે શરૂ?

Air India: એર ઇન્ડિયાએ 12 જૂને અમદાવાદથી લંડનના ગેટવિક જઈ રહેલા AI171 વિમાન દુર્ઘટના બાદ એક મોટો બદલાવ કર્યો છે. એરલાઇન હવે અમદાવાદથી લંડનના હીથ્રો માટે ત્રણ સાપ્તાહિક ફ્લાઇટ્સ ચલાવશે, જે લંડનના ગેટવિકની જગ્યા લેશે.

Air India: એર ઇન્ડિયાએ અમદાવાદ-ગેટવિક ફ્લાઇટને 1 ઓગસ્ટથી 30 સપ્ટેમ્બર સુધી સ્થગિત કરી દીધી છે. તેના બદલે ફ્લાઇટ લંડન હીથ્રો એરપોર્ટ પર ઉડાન ભરશે. એર ઇન્ડિયાએ મંગળવારે એક નિવેદન જારી કરીને જણાવ્યું કે, તે 1 ઓગસ્ટથી 30 સપ્ટેમ્બર સુધી અમદાવાદથી લંડનના હીથ્રો માટે ત્રણ સાપ્તાહિક ફ્લાઇટ્સ ચલાવશે, જે લંડનના ગેટવિકની જગ્યા લેશે.

એર ઇન્ડિયાએ કેમ લીધો આ નિર્ણય?
આ નિર્ણય એર ઇન્ડિયા દ્વારા 'સેફ્ટી પોઝ' હેઠળ ફ્લાઇટ્સની સમીક્ષા અને સલામતી તપાસ કર્યા પછી લેવામાં આવ્યો છે. 12 જૂનના રોજ AI171 ફ્લાઇટ સાથે થયેલા દુ:ખદ અકસ્માત બાદ એર ઇન્ડિયાએ તેના બોઇંગ 787 વિમાનની વધારાની તપાસ કરવા અને સલામતી સુનિશ્ચિત કરવા માટે કેટલીક ફ્લાઇટ્સને અસ્થાયી રૂપે રોકી દીધી હતી.

એરલાઇન હાલમાં અમદાવાદ-લંડન ગેટવિક રૂટ પર 5 સાપ્તાહિક ફ્લાઇટ્સ ચલાવે છે. આ ઉપરાંત એર ઇન્ડિયાએ તે ફ્લાઇટ્સ આંશિક રીતે ફરી શરૂ કરવાની જાહેરાત કરી છે, જેને અમદાવાદમાં 12 જૂનના રોજ થયેલા બોઇંગ 787-8 વિમાનના ક્રેશ બાદ "સુરક્ષા વિરામ" લેવાના પોતાના નિર્ણય બાદ ઓછી કરી દીધી હતી, આ દુર્ઘટનામાં 260 લોકોના મોત થયા હતા.

12 જૂનના રોજ થઈ હતી જીવલેણ વિમાન દુર્ઘટના
12 જૂનના રોજ અમદાવાદ એરપોર્ટ પરથી ઉડાન ભર્યા પછી લંડન જતું બોઇંગ 787 ડ્રીમલાઇનર વિમાન નીચે પડવા લાગ્યું હતું. વિમાન એક મેડિકલ કોલેજ હોસ્ટેલમાં અથડાયું, જેમાં વિમાનમાં સવાર 242 લોકોમાંથી એક સિવાય બધાના મોત થયા હતા, તેમજ જમીન પર 19 અન્ય લોકોના મોત થયા હતા. આ સૌથી ભયંકર વિમાન દુર્ઘટના હતી.

AAIB રિપોર્ટમાં શું કહેવામાં આવ્યું છે?
શુક્રવારે જાહેર કરાયેલ AAIBના પ્રારંભિક અહેવાલમાં કહેવામાં આવ્યું છે કે, વિમાનના બન્ને એન્જિનને એક પછી એક "RUN" થી "CUTOFF" પર ખસેડવામાં આવ્યા હતા, જેના પરિણામે ફ્યુલપુરવઠો બંધ થઈ ગયો હતો. અહેવાલમાં કહેવામાં આવ્યું છે કે, કોકપીટ વોઇસ રેકોર્ડિંગમાં એક પાઇલટ બીજાને પૂછતો સંભળાય છે કે, તેણે કેમ કટઓફ કર્યો, જ્યારે બીજા પાઇલટે આમ કરવાનો ઇનકાર કર્યો હતો. 

પ્રારંભિક અહેવાલમાં કહેવામાં આવ્યું છે કે, વિમાને લગભગ 08:08:42 UTC પર 180 નોટ્સ IASની મહત્તમ રેકોર્ડ કરેલ એરસ્પીડ પ્રાપ્ત કરી હતી અને તે પછી તરત જ એન્જિન 1 અને એન્જિન 2ના ફ્યુલ કટઓફ સ્વીચોને 01 સેકન્ડના અંતરાલ સાથે RUN થી CUTOFF પોઝિશન પર એક પછી એક સ્વિચ કરવામાં આવ્યા હતા. એન્જિન N1 અને N2 તેમના ટેક-ઓફ મૂલ્યોથી નીચે ધીમા પડવા લાગ્યા કારણ કે એન્જિનને ફ્યુલ પુરવઠો ડિસ્કનેક્ટ થઈ ગયો હતો.