અમરેલી: મહુવા રેન્જમાં દીપડાનો મહિલા પર હુમલો, ચહેરા પર પંજા મારતા લોહીલુહાણ

અમરેલી : શેત્રુંજી વિભાગમાં આવેલી મહુવા રેન્જ નાના ખુટવડા 2 ગામે દીપડાએ મહિલા પર હુમલો કર્યો હતો.  લીલાબેન ભરતભાઇ મકાવાણા નામની મહિલાના ચહેરા પર પંજા મારી દેતા લોહીલુહાણ બની હતી.  આ ઉપરાંથ હાથ અને માથાના ભાગે પણ ઇજા પહોંચી હતી. દીપડાના હુમલાથી બચવા મહિલાએ તેની સાથે બાથ ભીડી હતી. મહિલાએ બુમો પાડતા અન્ય લોકો દોડી આવતા દીપડો ભાગ્યો હતો. 

દીપડાના હુમલાથી મહિલા લોહીલુહાણ થઇ ગઇ હતી. તત્કાલ તેને સારવાર માટે નજીકની હોસ્પિટલમાં ખસેડવામાં આવી હતી. બાદમાં વન વિભાગે દીપડાને પકડવા માટે શોધખોળ હાથ ધરી છે. થોડા દિવસો અગાઉ તલાલા તાલુકાના વીરપુર ગામમાં માનવભક્ષી દીપડાએ નિવૃત શિક્ષકને ફાડી ખાધા હતા. 

જેથી ગ્રામજનોએ વન વિભાગને જાણ કરતા ટીમ દોડી ગઇ હતી. વન વિભાગે દીપડાને પકડવા માટે ગામમાં અને ગામની બહાર અલગ અલગ વિસ્તારોમાં 4 જેટલા પાંજરા મુક્યા હતા. વન વિભાગની બે દિવસની જહેમત બાદ એક દીપડો પાંજરે પુરાયો હતો. જો કે તે માનવભક્ષી છે કે કેમ તેની તપાસ કરવા માટે તેને રાજકોટ ખસેડવામાં આવ્યો છે.