ગુજરાત માટે ગેમ ચેન્જર સાબિત થશે આ એક્સપ્રેસ વે, માત્ર 45 મિનિટમાં ભરૂચથી ભાવનગર પહોંચી જવાશે

Expressway Between Bhavnagar To Bharuch : ભાવનગર-ભરૂચ વચ્ચે એક્સપ્રેસ-વે પ્રોજેક્ટ એક ડગલું આગળ વધ્યો... 6 કલાકમાં નહી ફક્ત 45 મિનિટમાં જ ભરૂચથી ભાવનગર પહોચી જશો, PM મોદીના ડ્રીમ પ્રોજેક્ટ પર એક્ટિવ થયુ ગડકરીનુ મંત્રાલય... ભરૂચથી આ પ્રોજેક્ટ દિલ્હી-મુંબઇ કોરિડોરને પણ જોડશે... ભાવનગર માટે ગેમ ચેન્જર સાબિત થશે

Bhavnagar-Bharuch Expressway News: વડાપ્રધાન નરેન્દ્ર મોદીના એક મોટા સ્વપ્નને સાકાર કરવા માટે કેન્દ્રીય માર્ગ પરિવહન અને રાજમાર્ગ મંત્રાલય સક્રિય બન્યું છે. મંત્રાલયે ગુજરાતના ભાવનગર અને ભરૂચને એક્સપ્રેસ વે દ્વારા જોડવા માટે ડીપીઆર પર કામ શરૂ કર્યું છે. બંને શહેરોને રોડ કનેક્ટિવિટી પ્રદાન કરવી એ પીએમ મોદીનું વર્ષો જૂનું સ્વપ્ન છે.

• ભાવનગર-ભરૂચ એક્સપ્રેસ વેના ડીપીઆર સેન્ટરે બિડ મંગાવી હતી
• એક્સપ્રેસ વે 68 કિલોમીટર લાંબો હશે, જેમાં 30 કિલોમીટરનો દરિયાઈ પુલ પણ સામેલ છે
• સૌરાષ્ટ્ર-મધ્ય ગુજરાતને ડાયરેક્ટ હાઈસ્પીડ કનેક્ટિવિટી મળશે

વડાપ્રધાન નરેન્દ્ર મોદીના ત્રીજા કાર્યકાળમાં ગુજરાતનું એક મોટું સપનું સાકાર થતું જણાય છે. પીએમ મોદી જ્યારે રાજ્યના મુખ્યમંત્રી હતા ત્યારે તેઓ ઈચ્છતા હતા કે મધ્ય ગુજરાતનું સૌરાષ્ટ્ર સાથે સીધુ રોડ કનેક્ટિવિટી હોવી જોઈએ. મોદી 3.0 માં, કેન્દ્રીય માર્ગ પરિવહન અને ધોરીમાર્ગ મંત્રાલયે ભરૂચને ભાવનગર સાથે જોડવાની દિશામાં કામ શરૂ કર્યું છે. આ માટે મંત્રાલયે ડીપીઆર બનાવવા માટે ટેન્ડર મંગાવ્યા છે. હાલમાં ભરૂચથી ભાવનગર સુધી ફેરીની સુવિધા છે. આ અરબી સમુદ્રનો એક અખાત છે જેને ખંભાતનો અખાત કહેવાય છે. ભાવનગર અને ભરૂચ વચ્ચેનું અંતર કાપવામાં ફેરી દોઢ કલાક જેટલો સમય લે છે જ્યારે રોડ માર્ગે 280 કિમીનું અંતર લગભગ છ કલાક લે છે.

એક્સપ્રેસ વે ગેમચેન્જર સાબિત થશે
રાજકોટમાંથી પસાર થતા જામનગર-ભાવનગર વચ્ચેના સૂચિત એક્સપ્રેસ વેને ભરૂચ સુધી લંબાવવામાં આવે તો તે ગુજરાત માટે ગેમ ચેન્જર સાબિત થશે. આ એક્સપ્રેસ વે ભરૂચમાં દિલ્હી અને મુંબઈ વચ્ચે બની રહેલા નવા એક્સપ્રેસ વેને જોડશે, જ્યારે જામનગરમાં તે અમૃતસર જામનગર ઈકોનોમિક કોરિડોર સાથે જોડાશે. આનાથી ગુજરાતમાં વિકાસને વધુ વેગ મળવાની અપેક્ષા છે. ત્રીજા પેકેજમાં ભાવનગરથી ભરૂચના બાંધકામની દરખાસ્ત છે. અરબી સમુદ્રના અખાતમાંથી પસાર થતા આ એક્સપ્રેસ વેની કુલ લંબાઈ 68 કિલોમીટર હશે. જેમાં લગભગ 30 કિલોમીટર લાંબો પુલ હશે, જ્યારે જામનગર-રાજકોટ-ભાવનગર-ભરૂચ એક્સપ્રેસ વેની કુલ લંબાઈ 316 કિલોમીટર હશે.

એક કલાકમાં ભરૂચથી ભાવનગર પહોંચશે
જો ભાવનગર અને ભરૂચ વચ્ચે એક્સપ્રેસ વે બનાવવામાં આવે તો તે માત્ર બે ઈકોનોમિક કોરિડોર અને એક્સપ્રેસ વેને કનેક્ટિવિટી પૂરી પાડશે એટલું જ નહીં, પરંતુ સૌરાષ્ટ્ર અને મધ્ય ગુજરાત વચ્ચે ગુજરાતના લોકોની અવરજવરને પણ સરળ બનાવશે. આનાથી સમય અને ઇંધણની બચત થશે. ભાવનગર-ભરૂચ એક્સપ્રેસવેનો DPR તૈયાર કરવા ઇચ્છુક કંપનીઓ માટે રોડ ટ્રાન્સપોર્ટ અને હાઇવે મંત્રાલયે માર્ચ 21, 2025ની સમયમર્યાદા નક્કી કરી છે. મંત્રાલયના જણાવ્યા અનુસાર, આ પ્રોજેક્ટ ગુજરાતમાં પ્રાદેશિક કનેક્ટિવિટીમાં સુધારો કરશે. 68 કિલોમીટર લાંબો એક્સપ્રેસ વે જામનગર-ભાવનગર-ભરૂચ હાઈ-સ્પીડ કોરિડોરનો ભાગ હશે. કેન્દ્ર સરકારે તેને પીએમ ગતિશક્તિ પ્રોજેક્ટમાં રાખ્યું છે. આ એક્સપ્રેસ વેના નિર્માણ બાદ ભરૂચ અને ભાવનગર વચ્ચેનું 68 કિલોમીટરનું અંતર લગભગ 45 મિનિટમાં કાપવામાં આવશે.