મહેસાણામાં 40 ટકા જમીન કપાતના નવા નિયમોને લઈને વિવાદ; ખેડૂતોના વ્હારે ભારતીય કિસાન સંઘ

જમીન કપાત મામલે ખેડૂતો બાદ ભારતીય કિસાન સંઘ મેદાનમાં આવ્યું. મહેસાણા મહાનગરપાલિકામાં સમાવેશ થયેલા ગામોના ખેડૂતોની જમીન કપાત થવાની છે. D2A કાયદા મુજબ ખેડૂતોની 40 ટકા જમીન કપાતમાં જાય છે. જમીન કપાત ઓછી કરવાની ખેડૂતોની સાથે ભારતીય કિસાન સંઘની માંગ. જમીન કપાત મુદ્દે ભારતીય કિસાન સંઘે આવેદનપત્ર આપ્યું.

તેજસ દવે/મહેસાણા: મહેસાણા નગરપાલિકાને મહાનગરપાલિકા જાહેર કર્યા બાદ આસપાસ 14થી વધુ ગામોનો સમાવેશ મહાનગરપાલિકામાં કરવામાં આવ્યો છે. મહેસાણા મહાનગરપાલિકામાં સમાવેશ કરવામાં આવેલા ગામડાઓની જમીનમાં રાજ્ય સરકારના ડી ટુ એ સ્કીમના કાયદા હેઠળ આવરી લેવામાં આવી છે. 

મહાનગરપાલિકાના D2A નિયમ મુજબ ખેડૂતોની 40 ટકા જમીન કપાતમાં લેવાના નિર્ણયથી મહેસાણા મહાનગરપાલિકા વિસ્તારમાં સમાવેશ થયેલા ગામોના ખેડૂતોમાં ભારે આક્રોશ ફેલાઈ ગયો છે. આથી ખેડૂતોની વાતને વાચા આપવા ભારતીય કિસાન સંઘે આજે ખેડૂતો સાથે મળી 40 ટકા જમીન કપાતના વિરોધમાં દેખાવો કર્યા હતા. 

મહેસાણા જિલ્લા કલેક્ટર કચેરીએ આવેદનપત્ર ભારતીય કિસાન સંઘે આપ્યું હતું. જો ખેડૂતોની જમીન 40 ટકા કપાતમાં જાય તો નાના ખેડૂતો પાયમાલ થઈ જવાની સંભાવના અને બેરોજગારીનું પ્રમાણ વધી જવાની આશંકા ભારતીય કિસાન સંઘે વ્યક્ત કરી છે અને જમીન કપાત મામલે યોગ્ય કાર્યવાહીની માંગ કરી છે.