અત્યંત ધનાઢ્ય ફાર્મ હાઉસમાં ચાલતું હતું જુગારધામ, શંકા ન પડે તે માટે પરિવાર મુકવા આવતો

ઉદય રંજન/અમદાવાદ : અમદાવાદ ના પોશ વિસ્તાર માંથી સોલા પોલીસે હાઈપ્રોફાઈલ જુગારધામ ઝડપાયું છે. અમદાવાદની સોલા પોલીસે ગ્રીનવુડ રિસોર્ટમાં આવેલા એલપી પટેલ ફાર્મમા રેડ કરી 10 વેપારીઓની જુગાર રમતાં ધરપકડ કરી 3.25 લાખનો મુદ્દામાલ કબજે કર્યો છે. ફાર્મ હાઉસના માલિકે પાંચ હજાર ભાડા પેટે આ જગ્યા જુગાર રમવા આપી હોવાનું તપાસમાં સામે આવ્યુ છે. 

એસ. પી રીંગ રોડ ઉપર આવેલાં ગ્રીન વુડ રિસોર્ટ અગાઉ પણ અનેક વાર વિવાદમાં આવી ચુક્યો છે. આ રિસોર્ટમાં અગાઉ હુકકાબર, દારૂનું ગોડાઉન ઝડપાયું હતું. હવે અહીં ઝડપાયું છે જુગારધામ. અહીં આવેલા એલ.બી પટેલ ફાર્મમાં સોલા પોલીસે રેડ પાડી હતી. પોલીસે રેડ કરી 10 લોકોની ધરપકડ કરી છે. આમ તો આ ફાર્મ હાઉસ અલગ અલગ પ્રસંગો માટે ભાડે આપવામાં આવતું હોય છે. 

જો કે હાલ કોઈ પ્રસંગ ન હોવાથી માલિક જસવંતભાઇ પટેલે પાંચ હજાર ભાડું લઈ જુગાર કલબ ચાલુ કરાવી હતી. પોલીસને શંકા ન જાય તે અનોખી મોડસ ઓપરેન્ડી અપનાવી હતી. અહીં લોકોને વાહન લઇને આવવા પર પ્રતિબંધ હતો. પરિવારના સભ્ય મૂકીને જતા રહેતા હતા. જેથી પોલીસને કોઇ શંકા પણ જતી નહોતી.