ગો એરની અમદાવાદથી ગોવાની ફ્લાઈટ 4 કલાક મોડી થતાં એરપોર્ટ પર હંગામો

મુસાફરોને 4 કલાક સુધી બેસાડી રાખવામાં આવ્યા, એરપોર્ટ પર ફ્લાઈટ ક્યારે આવશે તેનો જવાબ આપનાર કોઈ ન હતું

અમદાવાદઃ અમદાવાદ એરપોર્ટ પર અમદાવાદથી ગોવા જઈ રહેલી ફ્લાઈટ મોડી પડતાં મુસાફરોએ ભારે હંગામો મચાવ્યો હતો. ચાર કલાક સુધી ફ્લાઈટ ક્યારે આવશે તેના વિશે મુસાફરોને કોઈ જ માહિતી આપવામાં આવી ન હતી.

પ્રાપ્ત વિગતો મુજબ, આજે સાંજે અમદાવાદથી ગોવા માટેની ગો એરની ફ્લાઈટ હતી. મુસાફરો સમયસર ચેકઈન કરવા માટે પહોંચી ગયા હતા, પરંતુ સમય થઈ જવા છતાં ગો એરની ફ્લાઈટ આવી જ ન હતી. જેના કારણે એરપોર્ટ ઓથોરિટી દ્વારા મુસાફરોને અંદર પણ પ્રવેશ અપાયો ન હતો અને તેમને બહાર જ બેસાડી રખાયા હતા. 

આટલું જ નહીં ફ્લાઈટ ક્યારે આવશે તેના અંગેની કોઈ જ જાહેરાત કરાઈ ન હતી. ચાર-ચાર કલાક વીતિ ગયા બાદ પણ ગો એરની ફ્લાઈટ અંગે એરપોર્ટ ઓથોરિટી પાસે કોઈ જ માહિતી ન હતી. ચાર કલાક સુધી મુસાફરોને કોઈ પણ પ્રકારની સુવિધા વગર બેસાડી રાખવામાં આવ્યા હતા. મહિલાઓ અને બાળકો પાણી વગર ટળવતા હતા, છતાં પણ એરપોર્ટ ઓથોરિટી દ્વારા કોઈ જ દરકાર કરવામાં આવી ન હતી. 

મુસાફરોએ જ્યારે એરપોર્ટ પર હોબાળો મચાવ્યો ત્યારે બધા એક-બીજા પર દોષનો ટોપલો ઢોળતા જોવા મળ્યા હતા. છેલ્લે તેમણે સિક્યોરિટી જવાનોને આગળ ધરી દીધા હતા. મુસાફરોને સાચી માહિતી ન મળતાં ખુબ જ નારાજ થયા હતા.