રાજ્ય સરકારમાં વર્ગ-3ના કર્મચારીની ભરતીમાં લઘુત્તમ લાયકાત સ્નાતક કક્ષા કરાઈ

હીતલ પારેખ/ગાંધીનગરઃ ગુજરાત સરકારે રાજ્ય સરકારમાં કર્મચારીઓની ભરતી અંગે એક મહત્વનો નિર્ણય લીધો છે. જેના અનુસાર હવે રાજ્ય સરકારમાં ઓફિસ આસિસ્ટન્ટની વર્ગ-3ની જગ્યાની ભરતી માટે ઉમેદવારની લઘુત્તમ લાયકાત સ્નાતક કક્ષાની રહેશે. આ સાથે જ વર્ગ-3ના પદ માટે ઉમેદવારની મહત્તમ વયમર્યાદા વધારીને 35 વર્ષ કરવામાં આવી છે. 

રાજ્ય સરકારના સામાન્ય વહીવટ વિભાગ દ્વારા 20 નવેમ્બરના રોજ બહાર પાડવામાં આવેલા એક નોટિફિકેશન દ્વારા રાજ્ય સરકારનાં વિવિધ વિભાગોને આ નિર્ણયની જાણ કરવામાં આવી હતી. સામાન્ય વહીવટ વિભાગ દ્વારા બહાર પાડવામાં આવેલા નોટિફિકેશનમાં જણાવાયું છે કે, ભારતના બંધારણની કલમ-309ની જોગવાઈઓ અંતર્ગત રાજ્યના રાજ્યપાલ દ્વારા સચિવાલયના વિભાગોમાં વર્ગ-3ની ઓફિસ આસિસટન્ટની ભરતીમાં ઉમેદવારની લાયકાત સહિતની જોગવાઈઓમાં ફેરફાર કરવામાં આવ્યો છે. 

વર્ગ-3 ઓફિસ આસિસટન્ટના પદ માટેની લાયકાત

• ઉમેદવારની ઉંમર 35 વર્ષથી વધુ ન હોવી જોઈએ. 
• માન્ય કોઈ પણ યુનિવર્સિટીની સ્નાતકની ડિગ્રી અનિવાર્ય. 
• ગુજરાત જાહેર સેવા નિયમો 1967ની જોગવાઈઓ અનુસાર કમ્પ્યુટરનું પ્રાથમિક જ્ઞાન હોવું જરૂરી. 
• અંગ્રેજી અને ગુજરાતી ભાષાના ડેટા એન્ટ્રી વર્ગ માટે પ્રતિ કલાક 5000 અક્ષર ટાઈપ કરવાની ઝડપ હોવી જરૂરી.
• ગુજરાતી અથવા હિન્દી અથવા બંને ભાષાનું જ્ઞાન હોવું જરૂરી. 

નોટિફિકેશનમાં જણાવ્યું છે કે, ગુજરાત સિવિલ સર્વિસ ક્લાસિફિકેશન એન્ડ રેક્રૂટમેન્ટ (જનરલ) રૂલ્સ, 1967ના નિયમ-9એમાં કરવામાં આવેલી જોગવાઈઓ અનુસાર સંબંધિત ઉમેદવારની ભરતી કરવાની રહેશે. જો કોઈ ઉમેદવારની સીધી ભરતી કરવામાં આવે તેણે સરકાર દ્વારા નિર્ધારિત પરીક્ષા પાસ કરવાની રહેશે અને તાલીમના કાર્યક્રમમાંથી પસાર થવાનું રહેશે. સાથે જ સીધી ભરતીના ઉમેદવારે સરકારે નક્કી કરેલા બોન્ડ પણ ભરવાના રહેશે. 

જુઓ LIVE TV....