ગુજરાત પોલીસમાં PSI- LRD બંને ફોર્મ ભરનાર ઉમેદવાર માટે સમાચાર, 3 ડિસેમ્બરથી લેવાશે શારીરિક કસોટી

ઝી ન્યૂઝ/ ગાંધીનગર: PSI-LRD બંને ફોર્મ ભરનાર ઉમેદવાર માટે એક મહત્ત્વપૂર્ણ સમાચાર મળી રહ્યા છે. PSI અને LRD એમ બન્નેમાં ફોર્મ ભરનારા ઉમેદવારોએ માત્ર એક જ વાર શારીરિક પરીક્ષા આપવાની રહેશે. આ બન્ને ભરતી માટે આગામી 3 ડિસેમ્બરથી શારીરિક પરીક્ષા શરૂ થશે. 26 નવેમ્બરથી કોલલેટર ડાઉનલોડ કરી શકાશે. PSI અને LRD એમ બન્નેમાં ફોર્મ ભરનારા ઉમેદવારો ઓજસની વેબસાઈટ પરથી કોલ લેટર ડાઉનલોડ કરી શકશે. 

રવિવારે શારીરિક કસોટી લેવામાં આવશે નહીં. હાલ સંદર્ભે IPS હસમુખ પટેલે ટ્વીટ કરી જાણકારી આપી છે. ગુજરાત પોલીસમાં LRDમાં 10,459 જેટલી અને PSIની 1,382 જગ્યાઓ માટે ભરતી કરવામાં આવશે. LRD ભરતી માટે 9.50 લાખ જેટલા ઉમેદવારો છે, જેમાં ખાસ કરીને 3 લાખ જેટલી મહિલા ઉમેદવારો પણ છે.

પોલીસ ભરતી બોર્ડના ચેરમેન હસમુખ પટેલ મુજબ, લોકરક્ષકની ભરતીમાં શારીરિક કસોટીના 25 માર્ક છે અને PSIના 50 માર્ક છે. એટલે કે ઉદાહરણ તરીકે તમે 20 મિનિટ લીધી હોય એટલે શારીરિક કસોટીના 25 માર્કમાંથી મળવાપાત્ર માર્ક લોકરક્ષકમાં જતા રહેશે. તેવી રીતે PSIમાં 50માંથી લેખિત-શારીરિક કસોટીના માર્ક મળ્યા હોય એનું કુલ ટોટલ થશે. આ બન્ને પરીક્ષા અલગ જ છે. પરતુ બન્ને માટે અલગ અલગ ફોર્મ છે.

પોલીસ ભરતીની શારીરીક કસોટી ૩ ડિસેમ્બરથી શરૂ થશે. ૨૬ નવેમ્બરથી ઓજસ વેબસાઇટ પરથી કોલ લેટર ડાઉનલોડ કરી શકાશે. માહિતી માટે લોકરક્ષક તથા પી.એસ.આઇ ભરતી બોર્ડની વેબસાઈટ જોતા રહેવું

— Hasmukh Patel (@Hasmukhpatelips) November 18, 2021

પોલીસ ભરતીની શારીરીક કસોટી રવિવારના દિવસે રાખવામાં આવેલ નથી. રવિવારના દિવસે અન્ય સ્પર્ધાત્મક પરીક્ષાઓ આપનાર ઉમેદવારોની જાણ સારું.

— Hasmukh Patel (@Hasmukhpatelips) November 18, 2021

અત્રે નોંધનીય છે કે, LRD માટે ઉમેદવારોએ પૂરા 25 માર્ક્સ લેવા માટે 20 મિનિટ કે એનાથી ઓછા સમયમાં દોડ પૂરી કરવાની રહેશે. વધુમાં 24થી 25 મિનિટની વચ્ચે જો દોડ પૂરી થશે તો માત્ર 10 જ માર્ક્સ મળશે. જ્યારે મહિલા ઉમેદવારોએ પૂરા 25 માર્ક્સ લેવા માટે 7 મિનિટ કે એનાથી ઓછા સમયમાં દોડ પૂરી કરવાની રહેશે. 9થી 9.30 મિનિટ વચ્ચે દોડ પૂરી કરનારને માત્ર 10 માર્ક્સ મળશે.