લોકસભા ચૂંટણી 2019: અમદાવાદ પૂર્વ બેઠક પર ભાજપ તરફથી હસમુખ પટેલ

હસમુખ પટેલ અમરાઈવાડી વિધાનસભા બેઠક પરથી ભાજપના ધારાસભ્ય છે, તેઓ 2012 અને 2017માં ધારાસભ્ય તરીકે ચૂંટાઈ આવ્યા છે, આ અગાઉ તેઓ કોર્પોરેટર પણ રહી ચૂક્યા છે

નવી દિલ્હીઃ ભારતીય જનતા પાર્ટી દ્વારા મોડી રાત્રે આગામી લોકસભા ચૂંટણી 2019 માટે અમદાવાદ પૂર્વની સંસદીય બેઠકના ઉમેદવારના નામની જાહેરાત કરાઈ હતી. ભાજપ દ્વારા અમરાઈવાડીના વર્તમાન ધારાસભ્ય એવા હસમુખ પટેલને લોકસભાની ટિકિટ આપવામાં આવી છે. 

કડવા પાટીદાર સમાજના એવા હસમુખ પટેલને ઉભા રાખીને ભાજપે નારાજ પાટીદાર સમાજને પોતાની તરફ ખેંચવાનો પ્રયાસ કર્યો છે. કોંગ્રેસ તરફથી આ બેઠક પર પાસના ગીતાબેન પટેલને ટિકિટ આપવામાં આવી છે. 

હસમુખ પટેલ અમદાવાદ મ્યુનિસિપલ કોર્પોરેશનમાં કોર્પોરેટર રહી ચૂક્યા છે. તેઓ વર્ષ 2012 અને 2017માં અમરાઈવાડી વિધાનસભા બેઠક પરથી સતત બે વખત ચૂંટાઈને ધારાસભ્ય રહી ચૂક્યા છે. 

આ જાહેરાત સાથે જ ભાજપના ગુજરાતની તમામ 26 લોકસભા બેઠકના ઉમેદવારના નામની જાહેરાત થઈ ગઈ છે. કોંગ્રેસ દ્વારા પણ મંગળવારે મોડી રાત્રે રાજ્યની ચાર બેઠકના ઉમેદવાર જાહેર કરાયા હતા. જેમાં ગીતાબેન પટેલનું નામ પણ સામેલ હતું. 

કોંગ્રેસ દ્વારા હજુ રાજ્યની 8 લોકસભા બેઠકો સાબરકાંઠા, અમરેલી, સુરત, ભાવનગર, ખેડા, દાહોદ, ભરૂચ અને બનાસકાંઠાના ઉમેદવારની સત્તાવાર જાહેરાત બાકી છે. આ નામ આવતીકાલે સવારે જાહેર થાય તેવી સંભાવના છે.