ધારાસભ્ય બલરામ થાવાણીની 'ગુંડાગીરી' : પહેલા મુક્કાને લાત, પછી મુલાકાતને રાખડી!!

ધારાસભ્ય બલરામ થાવાણીની 'ગુંડાગીરી' : એનસીપી મહિલા નેતાને જાહેરમાં માર મારવાનો વીડિયો વાઈરલ થવાનો મુદ્દો નેશનલ મીડિયામાં ચમકતા, તથા ચારેબાજુથી વિરોધ થતા અમદાવાડના ભાજપના ધારાસભ્ય બલરામ થવાણીએ આખરે મહિલાની માફી માંગી હતી.

અમદાવાદ :એનસીપી મહિલા નેતાને જાહેરમાં માર મારવાનો વીડિયો વાઈરલ થવાનો મુદ્દો નેશનલ મીડિયામાં ચમકતા, તથા ચારેબાજુથી વિરોધ થતા અમદાવાડના ભાજપના ધારાસભ્ય બલરામ થવાણીએ આખરે મહિલાની માફી માંગી હતી. નરોડાના ભાજપના બલરામ થવાણી મહિલાની માફી માંગતા તેમના ઘરે પહોંચ્યા હતા. ત્યાર બાદ પીડિત મહિલાએ બલરામ થવાણીના હાથે રાખડી બાંધી હતી તેમજ મહિલા દ્વારા તેમનુ મોઢું પણ મીઠું કરાવાયું હતું. ત્યારે આ સમગ્ર મુદ્દે સમાધાન થયુ હોવાની વાત સામે આવી હતી. પીડિત મહિલાએ આ સાથે જ બાંહેધરી લીધી હતી કે, આવુ તેઓ ફરીવાર નહિ કરે. 

ભાજપે ધારાસભ્ય સામે નોટિસ ફટકારી
આ ઘટનાના પડઘા દેશભરમાં પડ્યા હતા, અને લોકોએ આ નેતા પર ફીટકાર વરસાવ્યો હતો. ત્યારે ભાજપનું તંત્ર પણ એક્શનમાં આવી ગયું છે. ભાજપે ધારાસભ્ય બલરામ થવાણીને નોટિસ મોકલીને અશોભનીય વર્તન બદલ ખુલાસો માંગ્યો છે. ધારાસભ્ય તરીકે આ પ્રકારના વર્તનને લઈને ભાજપે તેમને નોટિસ ફટકારી છે. જેમાં ધારાસભ્યનો ખુલાસો આવ્યા બાદ પ્રદેશ પ્રમુખ નિર્ણય લેશે.

મીડિયાના પ્રશ્નોનો જવાબ આપ્યા વગર ત્યાઁથી નીકળી ગયા
બલરામ થવાણીએ મીડિયા સામે સમાધાન કરતા કહ્યું હતું કે, અમારી અપાસમાં જે ગેરસમજ હતી તે દૂર થઈ છે. સમાધાન થઈ ગયું છે. આ મારી નાની બહેન સમાન છે. મેં બહેનને કહ્યું કે, કોઈ પણ કામકાજ હશે, તો હું મદદ માટે બેસ્યો છું. મે મારા બહેનની માફી માંગી છે. મેં તેમને મદદગાર થવાનું વચન આપ્યું છે. ઘરનો મામલો છે, ઘરમાં જ સોલ્વ થયો છે. દૂધ અને ખાંડ મળી ગઈ છે. જાણેઅજાણ્યે જે ભૂલ થઈ તે મેં કબૂલી લીધી છે. જોકે, મીડિયા સમક્ષ બાદમાં કોઈ પણ પ્રશ્નોનો જવાબ આપવાનું ટાળ્યું હતું. તો બીજી તરફ, પીડિત મહિલાએ કહ્યું કે, આશા છે કે આ મીઠાશ બની રહેશે.

ઉલ્લેખનીય છે કે, મહિલા આયોગે અમદાવાદ પોલીસ કમિશનર પાસે સમગ્ર ઘટનાનો અહેવાલ માંગ્યો છે. રાજ્યના મહિલા આયોગનો મહિલાને માર મામલે હસ્તક્ષેપ કરી છે. મહિલા આયોગે સુઓમોટો ફરિયાદ દાખલ કરી છે. અમદાવાદ પોલીસ કમિશનર પાસે અહેવાલ માંગીને જરૂર લાગશે તો પીડિત મહિલાને બોલાવવાની તૈયારી બતાવી છે.