સરકારે મચક ન આપતા ST કર્મચારીઓએ બાયો ચઢાવી, અર્ધનગ્ન થઈ કહ્યું-અમારી લાશ પરથી કાઢો ખાનગી વાહનો

ગુજરાત : એક તરફ આજે રાજ્યમાં શિક્ષકો હડતાળ પર ઉતર્યા છે. ત્યારે એસટી કર્મચારીઓની હડતાળનો આજે બીજો દિવસ છે. પોતાની માંગણીઓને સરકારે કોઈ મચક ન આપતા એસટી કર્મચારીઓનો રોષ હવે ફાટી નીકળ્યો છે. એસટી કર્મચારીઓએ આજે બીજા દિવસે વિરોધ માટે એક નવું શસ્ત્ર આગામ્યું છે. રાજ્યભરમાં અનેક શહેરોમાં એસટી કર્મચારીઓ આજે અર્ધનગ્ન થઈને વિરોધ કરી રહ્યા છે. તો બીજી તરફ, સુરતમાં એસટી કર્મચારીઓ ખાનગી વાહનોના વિરોધમાં રસ્તા પર ઉતર્યા છે. 

સુરતમાં રસ્તા પર ઉતર્યા કર્મચારીઓ
સુરતમાં એસટી કર્મચારીઓનું આંદોલન વધુ ઉગ્ર બનતુ જોવા મળ્યું છે. રોષે ભરાયેલા એસટી કર્મચારીઓ મોટી સંખ્યામાં રસ્તા પર ઉતરી આવ્યા છે. તો બીજી તરફ, સરકારે ખાનગી વાહનોની સુવિધા શરૂ કરતા રોષે ભરાયેલા કર્મચારીઓ અર્ધનગ્ન થઈને રસ્તા પર સૂઈ ગયા હતા. તેમની એક જ માંગણી છે કે સરકાર અમારી માંગણી પૂરી કરો. તેમણે કહ્યું કે, અમારી માંગણી પૂરી નહિ થાય તો પ્રાઈવેટ ગાડીઓ નહિ જવા દાઈએ. પગારપંચની જાહેરાત થશે તો હડતાળ સમેટી લઈશું. નહિ તો વોલ્વો બસ કાઢવી હોય તો અમારી લાશ પરથી કાઢો.

લોકસભાની ચૂંટણીનો બહિષ્કાર કરીશું
જામનગરમાં રોષે ભરાયેલા એસટી કર્મીઓ દ્વારા લોકસભા ચૂંટણીના બહિષ્કારની ચીમકી આપવામાં આવી છે. તેઓએ જામનગરમાં મુખ્યમંત્રી અને વડાપ્રધાનના કાર્યક્રમનો પણ બહિષ્કાર કરાશે તેવું જણાવ્યું છે. ઉલ્લેખનીય છે કે, જામનગરમાં હાલ મુખ્યમંત્રી અને વડાપ્રધાનના કાર્યક્રમ યોજાવાના છે, ત્યારે મુખ્યમંત્રી અને વડાપ્રધાનના કાર્યક્રમ સમયે એસટી કર્મીઓ વિરોધ પ્રદર્શન કરશે તેવી ચીમકી અપાઈ છે. તો બીજી તરફ, એસટી કર્મચારીઓએ અર્ધનગ્ન અવસ્થામાં વિરોધ કર્યો હતો. જેમાં મોટી સંખ્યામાં એસટીના કર્મચારીઓ  જોડાયા હતા. રાજ્ય સરકાર વિરોધી સૂત્રોચ્ચાર  કરીને અર્ધનગ્ન અવસ્થામાં એસટી કર્મીઓએ ડેપોની પ્રદિક્ષણા કરી હતી અને આખા ડેપોને બાનમાં લીધું હતું. એસટી કર્મીઓ દ્વારા રાજ્ય સરકાર વિરૂદ્ધ છાજીયા લેવામાં આવ્યા. એસટી ડેપોમાં વાતાવરણ ઉગ્ર બનતા પોલીસ પહોંચી હતી. nsui અને યુથ કોંગ્રેસે પણ એસટી કર્મચારીઓની હડતાળને ટેકો જાહેર કર્યો છે અને એસટી ડેપો મેનેજરની ખાલી ખુરશીને આવેદનપત્ર અપાયું હતું.

ક્યાં ક્યાં અર્ધનગ્ન અવસ્થામાં પ્રદર્શન 

• અમદાવાદમાં એસટી કર્મીઓએ અર્ધનગ્ન અવસ્થામાં વિરોધ કર્યો. રાજ્ય સરકાર વિરોધી સૂત્રોચ્ચાર કરીને અર્ધનગ્ન અવસ્થામાં એસટી કર્મીઓએ ડેપોની પ્રદિક્ષણા કરીને આખા ડેપોને બાનમાં લીધું હતું. એસટી કર્મીઓ દ્વારા રાજ્ય સરકાર વિરૂદ્ધ છાજીયા લેવામાં આવ્યા હતા. એસટી ડેપોમાં વાતાવરણ ઉગ્ર બનતા પોલીસ પહોંચી
• સંતરામપુરમાં બસ સ્ટેશન ખાતે મુખ્યમંત્રીના ફોટા ઉપર ચપ્પલનો હાર પહેરાવ્યો હતો અને ત્યાર બાદ છાજીયા બોલાવી મુખ્યમંત્રીના પૂતળા સાથે અર્થી યાત્રા કાઢવામાં આવ્યા હતા. પગાર આપ્યા વગર મરી ગયાના છાજીયા બોલાવ્યા
• ગોધરા બસ સ્ટેન્ડ ખાતે એસ.ટી. કર્મીઓએ અર્ધનગ્ન અવસ્થામાં બસ સ્ટેન્ડ વચ્ચે બેસીને વિરોધ કર્યો. એસ.ટી. કર્મીઓએ મુખ્યમંત્રી હાય હાયના નારા લગાવ્યા
• કચ્છમાં એસટી કર્મીઓએ અર્ધનગ્ન અવસ્થામાં એસટી ડેપોના ગેટ પર મુખ્યમંત્રી હાયહાયના નારા લગાવીને ડેપોને બાનમાં લીધું
• અંબાજી બસ ડેપો ઉપર એસટી કર્મચારીઓએ સરકાર વિરુદ્ધ સૂત્રોચ્ચાર કર્યા તેમની માંગણીઓ સ્વીકારવા સૂત્રોચ્ચાર કર્યા. મુખ્યમંત્રીના પૂતળાનું દહન કર્યું
• હારીજ, પાટણના એસટી ડેપોના કર્મચારીઓએ અર્ધનગ્ન થઈ સરકાર વિરુદ્ધ સુત્રોચ્ચાર કર્યાં
• મોડાસામાં એસટી કર્મચારીઓએ મુખ્યપ્રધાન વિજય રૂપાણીના ફોટોને ચપ્પલનો હાર પહેરાવ્યો. મુખ્યમંત્રાના મરશિયા ગાઈને ઉગ્ર વિરોધ કર્યો. 
• અમરેલીના કર્મચારીઓએ અર્ધ નગ્ન અવસ્થામાં રસ્તા પર ઉતરી આવ્યા હતા. મહિલા કંડકટરો દ્વારા પણ સરકાર સામે કર્યો દેખાવો.
• ભાવનગરમાં એસ.ટી કર્મચારીઓએ શર્ટ કાઢી વિરોધ કર્યો. કર્મચારીઓએ કહ્યું કે, જો સરકાર નહિ સમજે તો આગામી લોકસભાની ચૂંટણીમાં રાજ્યભરનાં કર્મચારીઓ ભાજપ વિરુદ્ધ મતદાન કરશે.
• મહેસાણામાં અર્ધ નગ્ન હાલતમાં એસટી કર્મચારીઓએ હાય હાયના નારા લગાવ્યા. રામધૂન અને બેસણું કરી કર્મચારીઓએ વિરોધ દર્શાવ્યો. 
• ભરુચ એસટી કર્મીઓએ અર્ધ નગ્નન થઈ વિરોધ નોંધાવ્યો
• બનાસકાંઠાના પાલનપુરમાં એસટીના કર્મચારીઓએ શર્ટ કાઢી ગરબા રમીને વિરોધ નોંધાવ્યો 

સરકાર એકપણ એસટી કર્મચારીનો વાળ વાંકો નહિ કરી શકે
એસટી કર્મીઓની હડતાળના પગલે ખાનગી વાહનોને મંજૂરી આપવાના સરકારના નિર્ણયથી એસટી યુનિયનમાં રોષ જોવા મળ્યો છે. આ મામલે એસટી કર્મચારી યુનિયનના મહામંત્રી વી.આર.વાછાણીએ કહ્યું કે, ખાનગી વાહન ચાલકો અમને સહકાર આપે. નહિ તો કાયદેસરની કાર્યવાહી કરીશું. સરકાર હાથે કરીને ઘર્ષણનું વાતાવરણ ઉભું કરી રહી છે. અમે શાંતિપૂર્વક આંદોલન કરી રહ્યા છે. ખાનગી વાહન માલિકોને અમારી વિનંતી છે, કે અમને સહકાર આપો. સરકાર દબાણ કરીને અમને ફરજ પાડી રહી છે. સરકાર એકપણ ફિક્સ પગાર કર્મચારીનો વાળ પણ વાંકો નહિ કરી શકે