આ રીતે 45 દિવસમાં 'ગુજરાત કોંગ્રેસ'ની થઈ જશે કાયાપલટ? જાણો કેવો છે રાહુલ ગાંધીનો પાયલોટ પ્રોજેક્ટ

Rahul Gandhi Visit Gujarat: ગુજરાતમાં કોંગ્રેસને મજબૂત કરવા માટે રાહુલ ગાંધી 15 અને 16 એપ્રિલે બે દિવસની મુલાકાતે પહોંચી ગયા છે. આ દરમિયાન, તેઓ પાર્ટીના 'સંગઠન સૃજન અભિયાન' હેઠળ જિલ્લા કોંગ્રેસ સમિતિઓ (DCC) ના પ્રમુખોની નિમંણૂકની પ્રક્રિયા શરૂ કરશે. આ કામ ગુજરાતના મોડાસા શહેરમાં કરવામાં આવશે, અને તેને એક પાયલોટ પ્રોજેક્ટ તરીકે જોવામાં આવી રહ્યું છે, જે પછીથી સમગ્ર દેશમાં લાગુ કરે એમ છે.

Rahul Gandhi  Rebuilding Gujarat Congress: કોંગ્રેસના પૂર્વ અધ્યક્ષ રાહુલ ગાંધી પાર્ટીના 'સંગઠન સૃજન અભિયાન' હેઠળ જિલ્લા પ્રમુખોની પસંદગીની પ્રક્રિયા શરૂ કરવા મંગળવારથી ગુજરાતની બે દિવસની મુલાકાતે આવી ચૂક્યા છે. રાહુલની આ મુલાકાત ગુજરાત કોંગ્રેસને પુનર્જીવિત કરવાના પ્રયાસનો એક ભાગ છે, જ્યાં છેલ્લા બે દાયકાથી ભાજપનો દબદબો છે.

ગુજરાતમાં કોંગ્રેસને મજબૂત કરવાનો પ્લાન
માર્ચમાં રાહુલે અમદાવાદમાં કાર્યકરોને કહ્યું હતું કે કેટલાક નેતાઓ ભાજપ માટે કામ કરી રહ્યા છે અને તેમને દૂર કરવાની જરૂર છે. આ પ્રવાસ દરમિયાન તેઓ નવા નેતૃત્વની નિમણૂક દ્વારા પક્ષને પાયાના સ્તરે મજબૂત કરવાનો પ્રયાસ કરશે. ગુજરાતમાં આગામી સ્થાનિક સ્વરાજ્યની ચૂંટણીઓ માટે પણ આ પગલું મહત્વપૂર્ણ છે. 12 એપ્રિલના રોજ અખિલ ભારતીય કોંગ્રેસ સમિતિ (AICC) એ ગુજરાતના 33 જિલ્લાઓ અને 8 મોટા શહેરોમાં પાર્ટી એકમોના પ્રમુખોની નિમણૂકની પ્રક્રિયા પર દેખરેખ રાખવા માટે 42 AICC અને 183 પ્રદેશ કોંગ્રેસ સમિતિ (PCC) નિરીક્ષકોની નિમણૂક કરી હતી.

ગુજરાતમાંથી રાહુલ ગાંધીનો પાયલોટ પ્રોજેક્ટ
ગુજરાત પ્રદેશ કોંગ્રેસ સમિતિના પ્રમુખ શક્તિસિંહ ગોહિલે જણાવ્યું હતું કે 41 જિલ્લા એકમોના પ્રમુખોની પસંદગીની રાજ્યવ્યાપી પ્રક્રિયા શરૂ કરતા પહેલા રાહુલ ગાંધી મંગળવારે અમદાવાદમાં આ AICC અને PCC નિરીક્ષકો સાથે પરિચયાત્મક બેઠક કરશે. તેમણે જણાવ્યું હતું કે તેઓ બુધવારે મોડાસા શહેરમાં પાર્ટી કાર્યકર્તાઓને સંબોધિત કરશે અને આ પ્રક્રિયા દ્વારા જિલ્લા એકમના વડાઓની પસંદગીનો પાયલોટ પ્રોજેક્ટ શરૂ કરશે.

જિલ્લા અધ્યક્ષને સત્તા આપવાનો પ્રયોગ
ગોહિલે જણાવ્યું હતું કે, "AICC દ્વારા નિયુક્ત નવ સભ્યોની સમિતિએ જિલ્લા એકમોને મજબૂત કરવા અને તેમના પ્રમુખોને વધુ સત્તા આપવાની ભલામણ કરી હતી. કોંગ્રેસ વર્કિંગ કમિટી (CWC) એ આ ભલામણોને મંજૂરી આપી છે. મારી વિનંતી પર પાર્ટીએ ગુજરાતમાં આ ભલામણોના અમલીકરણ માટે એક પાયલોટ પ્રોજેક્ટ શરૂ કરવાનો નિર્ણય લીધો છે."

ગુજરાતમાં 45 દિવસમાં તમામ જિલ્લા પ્રમુખોના નામ થઈ જશે ફાઈનલ
તેમણે કહ્યું કે, એક અલગ પાંચ સભ્યોનું જૂથ 41 જિલ્લા એકમોમાંના દરેક માટે નવા જિલ્લા એકમોના વડાઓની નિમણૂકની પ્રક્રિયા પર દેખરેખ રાખશે. આવા એક જૂથમાં એક AICC નિરીક્ષક અને ચાર PCC નિરીક્ષકોનો સમાવેશ થાય છે, તેમણે ઉમેર્યું હતું કે ગુજરાતમાં સમગ્ર પ્રક્રિયા 45 દિવસમાં પૂર્ણ કરવામાં આવશે. કોંગ્રેસે દેશભરમાં ‘સંગઠન સર્જન’ અભિયાન અંતર્ગત જિલ્લા પ્રમુખોને વધુ સત્તા આપવાનો નિર્ણય કર્યો છે. રાહુલ ગાંધીએ 9 એપ્રિલે પાર્ટીના અમદાવાદ અધિવેશનમાં કહ્યું હતું કે જિલ્લા પ્રમુખોને સંગઠનનો પાયો બનાવવામાં આવશે.

ત્યારબાદ સમગ્ર દેશમાં લાગુ કરવામાં આવશે પાયલોટ પ્રોજેક્ટ 
આ અભિયાનનો હેતુ જિલ્લા પ્રમુખોને વધુ સત્તા આપવાનો છે. રાહુલ ગાંધીએ 9 એપ્રિલે અમદાવાદમાં આયોજિત AICC સંમેલનમાં કહ્યું હતું કે જિલ્લા પ્રમુખો સંગઠનનો પાયો હશે. તે ઉમેદવારોની પસંદગીમાં પણ મહત્વની ભૂમિકા ભજવશે. પાર્ટી અધ્યક્ષ મલ્લિકાર્જુન ખડગેએ 2025ને સંગઠનાત્મક સુધારાનું વર્ષ જાહેર કર્યું છે.