વોન્ટેડ સટ્ટાકિંગ જીતુ થરાદ કેવી રીતે પહોંચ્યો રાજભવન અને રાજ્યપાલ સાથે ભોજન લીધું? તસ્વીર વાયરલ

wanted satta king jitu tharad with governer : અમદાવાદના 2 હજાર કરોડના સટ્ટાકાંડનો મુખ્ય સૂત્રધાર જિતુ ઠક્કર આચાર્ય દેવવ્રત સાથે દેખાયો

Gandhinagar News : અમદાવાદના બહુચર્ચિત સટ્ટાકાંડનો આરોપી જીતુ થરાદ હાલ ફરાર છે અને પોલીસ પકડથી દૂર છે. પરંતુ તેની એક તસવીરો હાલ સોશિયલ મીડિયામાં ધૂમ મચાવી રહી છે. આ તસવીરો છે ગુજરાતના રાજ્યપાલ આચાર્ય દેવવ્રત સાથેની. આ તસવીરોમાં સટ્ટા કિંગ જીતુ થરાદ રાજ્યપાલ સાથે ભોજન લઈ રહ્યો છે. બંને રાજભવનમાં એક જ ડાઈનિંગ પર બેસીને ભોજન લઈ રહ્યાં છે. 

આ તસવીરો ક્યાની છે તે માહિતી હજી મળી નથી, પરંતુ હાલ આ તસવીરો સોશિયલ મીડિયા પર વાયરલ થઈ રહી છે. જીતુ થરાદ રાજ્યપાલની પાસેની ખુરશીમાં બેસેલો છે, અને બંને સાથે ભોજન લઈ રહ્યાં છે. ત્યારે આ તસવીરો અનેક સવાલો પેદા કરી રહી છે. કારણ કે, શું રાજભવનમાં કોઈને જીતુ થરાદના ગુનાહિત ઈતિહાસ વિશે નહિ ખબર હોય. 

રાજ્યપાલના અતિથિ તરીકે જતાં પહેલાં રાજભવનના અધિકારીઓએ આ સંબંધિત શું કોઈ પણ તપાસ કરી હતી કે નહિ. જિતુ થરાદની સાથે રાજભવનમાં આવેલા અન્ય કેટલાક લોકોનો ભૂતકાળ પણ સારો ન હતો. છતા કેવી રીતે તેને રાજ્યપાલ સાથે ભોજનની પરમિશન આપવામાં આવી. 

ખાસ વાત તો એ છે કે, એવુ પણ કહેવાય છે કે, જીતુ થરાદ અવારનવાર રાજભવન જતો હતો. તે અનેકવાર રાજભવનનો મહેમાન બની ચૂક્યો છે. આ ઉપરાંત જિતુ થરાદ સિવાય તેની સાથે તેના પારિવારિક સભ્યો અને અન્ય મિત્રો પણ તસવીરોમાં દેખાય છે.