ખાણીપીણીની શોખીનો માટે મોટો ઝટકો : ડુંગળી-બટાકા, ટામેટાના ભાવ વધતા મોંઘી થઈ વેજ-થાળી

Veg Thali Price Hike In India : શાકભાજીના ભાવમાં વધારાને કારણે શાકાહારી થાળીની કિંમતમાં 8 ટકાનો વધારો થયો છે, પરંતું બીજી તરફ નોનવેજ ચાહકો માટે સારા સમાચાર એ છે કે, બ્રોઈલરના ભાવમાં ઘટાડાથી માંસાહારી થાળીની કિંમતમાં ઘટાડો થયો છે

Veg Thali Price Rise Latest Update: રેટિંગ એજન્સી ક્રિસિલે બુધવારે એક રિપોર્ટ જાહેર કર્યો છે, જે અત્યંત ચોંકાવનારો છે. આ રિપોર્ટમાં કહેવામાં આવ્યું છે કે ડુંગળી, ટામેટા અને બટાકાની કિંમતના કારણે એપ્રિલમાં ઘરમાં બનેલી શાકાહારી થાળીની કિંમત 8 ટકા વધીને 27.4 રૂપિયા થઈ ગઈ છે. જ્યારે ગયા વર્ષે આ મહિનામાં તેની કિંમત 25.4 રૂપિયા હતી. રેટિંગ એજન્સી ક્રિસિલના 'રોટી ચાવલ રેટ' રિપોર્ટ અનુસાર, નોનવેજ ચાહકો માટે સારા સમાચાર છે. કારણ કે, સસ્તા બ્રોઈલરને કારણે માંસાહારી થાળીની કિંમતમાં મોટો ઘટાડો થયો છે. આ સમયગાળા દરમિયાન માંસાહારી થાળીની કિંમત 58.9 રૂપિયાથી 4 ટકા ઘટીને 56.3 રૂપિયા થઈ ગઈ છે.

શાકાહારી થાળીમાં રોટલી, ડુંગળી, ટામેટા, બટેટા, ચોખા, દાળ, દહીં અને સલાડનો સમાવેશ થાય છે. માંસાહારી થાળીમાં સમાન ખાદ્ય પદાર્થો હોય છે, પરંતુ દાળની જગ્યાએ ચિકન (બ્રોઈલર) આવે છે. ઘરે બનાવેલી થાળીની સરેરાશ કિંમત ઉત્તર, દક્ષિણ, પૂર્વ અને પશ્ચિમ ભારતમાં ઇનપુટ કિંમતોના આધારે ગણવામાં આવે છે.

ક્રિસિલે જણાવ્યું હતું કે રવી પાકોમાં રેકોર્ડબ્રેક ઘટાડો અને પશ્ચિમ બંગાળમાં બટાકાના પાકને નુકસાન થવાને કારણે ડુંગળીની ઓછી આવકને કારણે ભાવમાં વધારો થયો છે. ચોખા અને કઠોળના ભાવમાં પણ વર્ષ-દર-વર્ષે (Y-o-Y) 14 ટકા અને 20 ટકાનો વધારો જોવા મળ્યો છે. તો જીરું, મરચાં અને વનસ્પતિ તેલના ભાવમાં અનુક્રમે 40 ટકા, 31 ટકા અને 10 ટકાનો ઘટાડો થયો છે, જેના કારણે શાકાહારી થાળીની કિંમતમાં વધુ વધારો થયો નથી.

રિપોર્ટ કહે છે કે, બ્રોઈલર ચિકનના ભાવમાં વાર્ષિક ધોરણે 12 ટકાનો ઘટાડો જોવા મળ્યો હતો, જે પ્લેટની કુલ કિંમતના 50 ટકા હિસ્સો બ્રોઈલર ચિકનના ભાવમાં ઘટવાને કારણે આવ્યો હતો. તમને જણાવી દઈએ કે, ડુંગળીના ભાવમાં 4 ટકા અને ઈંધણની કિંમતમાં 3 ટકાના ઘટાડાને કારણે એપ્રિલમાં શાકાહારી થાળીની કિંમત સ્થિર રહી હતી. ટામેટાં અને બટાકાના ભાવ સતત વધી રહ્યા છે.

માંસાહારી થાળીની કિંમતમાં માર્ચની સરખામણીમાં 3 ટકાનો વધારો થયો છે કારણ કે બ્રોઈલર માંગમાં વધારો અને ઇનપુટ ખર્ચમાં વધારો થયો છે. ક્રિસિલ માર્કેટ ઇન્ટેલિજન્સ એન્ડ એનાલિટિક્સનાં ડાયરેક્ટર પુષણ શર્માના જણાવ્યા અનુસાર, શાકભાજીના ભાવ નજીકના ભવિષ્યમાં "ઉંચા" રહેવાની શક્યતા છે.

તેમણે કહ્યું કે નવેમ્બર 2023થી શાકાહારી અને માંસાહારી થાળીના ભાવમાં મોટો તફાવત જોવા મળી રહ્યો છે. શાકાહારી થાળી દર વર્ષે મોંઘી બની રહી છે, જ્યારે માંસાહારી થાળી સસ્તી થઈ રહી છે. તેનું મુખ્ય કારણ બ્રોઈલરના ભાવમાં ઘટાડો છે, જ્યારે ડુંગળી, બટેટા અને ટામેટા જેવા શાકભાજીના ભાવમાં વધારો થયો છે.

તેમણે વધુમાં કહ્યું કે અમને આશા છે કે શાકભાજીના ભાવ સ્થિર રહેશે. જોકે, ઘઉં અને કઠોળના ભાવમાં અપેક્ષિત ઘટાડો થોડી રાહત આપશે.