આખરે ઝૂક્યું ચીન! લદાખમાં ચીની સૈનિકોની પાછળ હટવાની પ્રક્રિયા શરૂ, ટેન્ટ હટાવતા જોવા મળ્યાં: સૂત્ર

નવી દિલ્હી: લદાખમાં (Ladakh)  ચીનના સૈનિકોની પાછળ હટવાની પ્રક્રિયા શરૂ થઈ ગઈ છે. ગલવાનથી ચીન (China) ના સૈનિકોની ગાડીઓ, બખ્તરબંધ ગાડીઓ પાછી જઈ રહી છે. ચીનના સૈનિકો પીએલએ પીપી 14થી ટેન્ટ હટાવતા જોવા મળ્યાં. ચીનના સૈનિકો ગલવાન, હોટસ્પ્રિંગ અને ગોગરામાં પાછા જતા જોવા મળ્યાં. અત્રે જણાવવાનું કે બંને દેશો વચ્ચે તણાવ ઓછો કરવા માટે અનેક તબક્કાની કમાન્ડર સ્તરની બેઠકો થઈ ચૂકી છે. લદાખમાં તણાવ ન ઘટતા નરેન્દ્ર મોદીએ NSA અજીત ડોભાલને પણ મોરચે લગાવી દીધા હતાં. 

સૂત્રોના જણાવ્યાં મુજબ હજુ એ સ્પષ્ટ નથી થયું કે ચીનના સૈનિકો કેટલા કિલોમીટર સુધી પાછળ હટ્યા છે. પણ જાણકારો ચીનના આ પગલાંને તણાવ ઘટાડવા તરફનું પહેલું પગલું માની રહ્યાં છે. અત્રે જણાવવાનું કે 15 જૂનના રોજ મોડી રાતે જવાનો વચ્ચે થયેલા લોહિયાળ સંઘર્ષમાં ભારતના 20 જવાનો શહીદ થયા હતાં. જ્યારે ચીનના પણ 40થી વધુ જવાનો મર્યા હતાં

3 પોસ્ટ પર પાછળ હટવા લાગ્યા સૈનિકો
સૂત્રોના જણાવ્યાં મુજબ ચીનના સૈનિકો ત્રણ પોસ્ટ ગલવાન, હોટસ્પ્રિંગ અને ગોગરાથી પાછા હટતા જોવા મળી રહ્યાં છે. આગામી 24 કલાક ખુબ મહત્વપૂર્ણ છે. છેલ્લા બે મહિનાથી બંને દેશની સેનાઓ આમને સામને છે. ભારત હજુ પણ ચીનના સૈનિકોની પાછળ હટવાની પ્રક્રિયા પર બારીકાઈથી નજર રાખી રહ્યું છે. પેંગોન્ગ પર હજુ પણ ચીનના સૈનિકો જામી બેઠા છે. ભારતનું સ્પષ્ટ કહેવું છે કે ચીની સૈનિકોએ ફિંગર 8થી પાછળ હટવું પડશે. 

LAC પર ભારતના મક્કમ વલણ આગળ ચીને આખરે નમવું જ પડ્યું. ગલવાનથી ચીનના સૈનિકોનું પાછળ હટવું એનો અર્થ છે કે ગલવાનમાં ભારતની મોટી જીત છે. LAC પર ચીનની આર્મી પીપી 14થી ટેન્ટ હટાવતી જોવા મળી છે. જેનો અર્થ છે કે વિસ્તારવાદ પર ભારતના વિકાસવાદની જીત થઈ છે.