22 લાખની ગાડી વેચીને કોરોનાકાળમાં સેવા કરે છે આ વ્યક્તિ, રોજ 500 ફોન આવે છે

દેશભરમાં કોરોના વાયરસ ભયંકર કેર વર્તાવી રહ્યો છે. જેના કારણે હોસ્પિટલોમાં અનેક વસ્તુઓની અછત ઉભી થઈ છે જેમાંથી એક છે ઓક્સિજન. ઓક્સિજનને લઈને હાલ સમગ્ર દેશમાં હાહાકાર મચી ગયો છે.

નવી દિલ્હી: દેશભરમાં કોરોના વાયરસ (Corona Virus)  ભયંકર કેર વર્તાવી રહ્યો છે. જેના કારણે હોસ્પિટલોમાં અનેક વસ્તુઓની અછત ઉભી થઈ છે જેમાંથી એક છે ઓક્સિજન. ઓક્સિજનને લઈને હાલ સમગ્ર દેશમાં હાહાકાર મચી ગયો છે. તેને જોતા કેટલાક લોકો તેની કાળાબજારી પણ કરી રહ્યા છે. જ્યારે કેટલાક લોકો મસીહા બનીને લોકોને સેવા કરી રહ્યા છે. આવા જ એક વ્યક્તિ છે શાહનવાઝ શેખ જે  ઓક્સીજન મેન તરીકે ઓળખાય છે. 

મુંબઈ (Mumbai) ના રહીશ શાહનવાઝ શેખ  લોકોને મોતના મોઢામાંથી બહાર કાઢવા માટે દરેક શક્ય કોશિશ કરી રહ્યા છે. શાહનવાઝ શેખ જરૂરિયાતવાળા લોકોના એક ફોન પર ઓક્સિજન પહોંચાડે છે. આ માટે તેમણે એક ટીમ અને કંટ્રોલ રૂમ બનાવ્યો છે. તેમના આ નેક કામના કારણે તેમને ઓક્સિજન મેન તરીકે પણ લોકો ઓળખે છે. 

પોતાની 22 લાખની SUV વેચી નાખી
અત્રે જણાવવાનું કે શાહનવાઝ શેખ ગત વર્ષથી લોકોની મદદ કરી રહ્યા છે. અત્યાર સુધીમાં 4 હજારથી વધુ લોકોને મદદ પહોંચાડી છે. શાહનવાઝ  અને તેમની ટીમ પાસે હાલ લગભગ 200 જેટલા સિલિન્ડર છે. જેમાંથી 40 ભાડે લીધા છે. તેમનું કહેવું છે કે ગત વર્ષે લોકોની મદદ કરતા કરતા તેમની પાસે પૈસા ખતમ થઈ ગયા. ત્યારબાદ તેમણે પોતાની 22 લાખની SUV ફોર્ડ એન્ડેવર વેચી નાખી.

રોજ 500થી વધુ ફોન આવે છે
એન્ડેવર વેચ્યા બાદ જે પૈસા મળ્યા તેમાથી શાહનવાઝ શેખ લોકોની મદદ કરી રહ્યા છે. તેમણે જણાવ્યું કે ગત વર્ષની સરખામણીએ આ વર્ષે ઓક્સિજનની ડિમાન્ડ વધુ છે. એક રિપોર્ટ મુજબ શાહનવાઝ શેખે જણાવ્યું કે પહેલા જ્યાં 50 સિલિન્ડરના કોલ આવતા હતા ત્યાં હવે 500થી વધુ લોકો તેમને ઓક્સિજન માટે ફોન કરે છે.