બે પત્નીઓએ પતિને 3-3 દિવસ માટે વહેંચી દીધો, પતિને એક દિવસ મળશે 'વીકઓફ'; જબરદસ્ત છે સ્ટોરી

Trending News Bihar: બિહારના પૂર્ણિયામાં એક પુરુષને તેની બે પત્નીઓ વચ્ચે સમાધાન કરવું પડ્યું. ફેમિલી કાઉન્સેલિંગ સેન્ટરના નિર્ણય મુજબ તે અઠવાડિયામાં ત્રણ દિવસ બંને સાથે રહેશે અને એક દિવસ આરામ કરશે. પતિને બીજા લગ્ન કરવા ભારે પડ્યા છે.

Trending News Bihar: બિહારના પૂર્ણિયા જિલ્લામાં એક અનોખો કોન્ટ્રાક્ટ સામે આવ્યો  છે. રસપ્રદ વાત એ છે કે, "વીક-ઓફ" દિવસોમાં પણ પતિ પોતાની ઇચ્છા મુજબ કોઈપણ એક પત્ની સાથે સમય વિતાવી શકે છે. આ અનોખા નિર્ણયથી સમગ્ર વિસ્તારમાં ચર્ચાનો માહોલ છે અને લોકો સોશિયલ મીડિયા પર પણ તેના વિશે અલગ-અલગ પ્રતિક્રિયાઓ આપી રહ્યા છે.

પહેલી પત્નીને જણાવ્યા વિના જ કર્યા બીજા લગ્ન 
આ મામલો પૂર્ણિયાના રૂપૌલી પોલીસ સ્ટેશન વિસ્તારનો છે, જ્યાં એક પુરુષે સાત વર્ષ પહેલાં બીજા લગ્ન કર્યા હતા, પરંતુ તેણે તેની પહેલી પત્નીને આ વિશે કોઈ માહિતી આપી ન હતી. તેમની પહેલી પત્નીથી તેને બે બાળકો પણ છે. જ્યારે તેણીને તેના પતિના બીજા લગ્ન વિશે ખબર પડી, ત્યારે તેણીએ વિરોધ કર્યો, જેના કારણે બન્ને વચ્ચે ઝઘડા થયા હતા.

પરિસ્થિતિ એવી બની કે પતિએ પોતાની પહેલી પત્ની અને બાળકોને છોડી દીધા અને બીજી પત્ની સાથે રહેવા લાગ્યો. પહેલી પત્નીનો આરોપ છે કે, તેના પતિએ તેને તરછોડી દીધી છે. બાળકોનો ખર્ચ અને શિક્ષણનો ખર્ચ પણ આપવાનો બંધ કરી દીધો છે. તેણીએ પોલીસ અધિક્ષક કાર્તિકેય શર્માને ફરિયાદ કરી, જેમણે આ મામલો ફેમિલી કાઉન્સેલિંગ સેન્ટરમાં મોકલી દીધો હતો. જ્યાં આ અનોખો કરાર થયો.

કૌટુંબિક સલાહ કેન્દ્રમાં વિવાદ ઉકેલાયો
પોલીસ ફેમિલી કાઉન્સેલિંગ સેન્ટરે પતિ અને તેની બન્ને પત્નીઓને 14 ફેબ્રુઆરીએ હાજર રહેવા માટે નોટિસ મોકલી હતી. સુનાવણી દરમિયાન પહેલી પત્નીએ પોતાનો વાંધો વ્યક્ત કર્યો, ત્યારબાદ કેન્દ્રના સભ્યોએ છૂટાછેડા વિના બીજા લગ્ન કરવા બદલ પતિને ઠપકો આપ્યો.

આ કેસમાં બીજી પત્નીને પણ દોષિત ઠેરવવામાં આવી હતી. પતિએ પોતાની ભૂલ સ્વીકારી અને કહ્યું કે, તે બન્ને પત્નીઓ અને તેમના બાળકોની જવાબદારી લેવા માંગે છે, પરંતુ પહેલી પત્ની તેને બીજી પત્ની પાસે જતા અટકાવે છે, જેના કારણે ઘરમાં સતત ઝઘડા થતા રહે છે.

કરાર મુજબ પતિની મિલકતનું વિભાજન
આ મુદ્દાને ઉકેલવા માટે કૌટુંબિક સલાહ કેન્દ્રે ચુકાદો આપ્યો કે, પતિ અઠવાડિયામાં ચાર દિવસ પહેલી પત્ની સાથે અને ત્રણ દિવસ બીજી પત્ની સાથે રહેશે. પરંતુ બીજી પત્નીએ આ નિર્ણય સામે વાંધો ઉઠાવ્યો, જેના કારણે વિવાદ વધ્યો. આખરે કેન્દ્રએ પતિને બન્ને પત્નીઓ સાથે ત્રણ દિવસ રહેવાનો આદેશ આપ્યો, અઠવાડિયાના સાત દિવસોને સમાન રીતે વહેંચીને. આ ઉપરાંત પતિને તેની ઇચ્છા મુજબ અઠવાડિયાનો એક દિવસ વિતાવવાની સ્વતંત્રતા આપવામાં આવી હતી. ઉપરાંત તેમને બાળકોના શિક્ષણ અને ઉછેર માટે તેમની પહેલી પત્નીને દર મહિને 4,000 રૂપિયા આપવાનો નિર્દેશ આપવામાં આવ્યો હતો. બન્ને પક્ષો આ નિર્ણય પર સંમત થયા અને મામલો ઉકેલાઈ ગયો હતો.