માવઠા બાદ ગરમીનું ટોર્ચર : આ રાજ્યોમાં ભારે પવન સાથે તોફાની વરસાદ પડશે, આવી નવી આગાહી

ગુજરાત સહિત દેશના વાતાવરણમાં પલટો આવી રહ્યો છે. હવે હવામાન વિભાગ દ્વારા નવી આગાહી કરવામાં આવી છે. આ આગાહી પ્રમાણે કેટલીક જગ્યાએ વરસાદ પડશે તો દેશના કેટલાક રાજ્યોએ ગરમી સહન કરવી પડશે.

નવી દિલ્હીઃ રાજ્યમાં ઉનાળાની શરૂઆતે જ માવઠાના મારે ખેડૂતોની કમર તોડી નાંખી છે. તો કમોસમી વરસાદ થતાં ખેડૂતોને નુકસાનની સાથે સાથે રાજ્યમાં રોગચાળો પણ વકર્યો છે, ઠંડી અને માવઠા બાદ ગરમીનું ટોર્ચર પણ સહન કરવા તૈયાર રહેજો, ત્યારે શું છે ગરમી માટે હવામાન વિભાગની આગાહી, જોઈએ આ અહેવાલમાં... 

પહેલાં શિયાળાની કડકડતી ઠંડી પછી કમોસમી વરસાદનો માર અને હવે આકરી ગરમીનો વારો. જીહાં, માવઠાના માર બાદ હવે ગરમીથી શેકાવા માટે તૈયાર થઈ જાઓ. ચાલુ માર્ચ મહિનામાં માવઠા પછી હવે આકરી ગરમીનો માર સહન કરવો પડશે. અલનીનોની અસરના લીધે આ વર્ષે ઉનાળો આકરો રહેશે. માર્ચ મહિનામાં તાપમાન સામાન્ય કરતા વધુ રહેવાની શક્યતા વ્યક્ત કરાઈ છે. લઘુત્તમ તાપમાનમાં બેથી ત્રણ ડિગ્રીનો વધારો થઈ શકે છે. તો આગામી પાંચ દિવસ સુધી વાતાવરણ સુકું રહેશે. ઉલ્લેખનીય છેકે, હાલ સવારે ઠંડી અને બપોરે ગરમીનો અહેસાસ થઈ રહ્યો છે. જો કે આગામી દિવસમાં ધીમેધીમે ઉનાળો બરોબર જામશે અને આકરી ગરમી પડશે.

આ પણ વાંચોઃ લોકસભાની ટિકિટ મળતાં જ ભાજપના નેતાજીથી સોશિયલ મીડિયા ઉભરાયું, ટિકિટ પરત કરવી પડી

ભારતીય હવામાન વિભાગ (IMD) એ માર્ચથી મે 2024 માટે હવામાનની આગાહી જાહેર કરી છે. જે મુજબ આ વર્ષે દેશના મોટાભાગના વિસ્તારોમાં તાપમાન સામાન્ય કરતા વધુ રહેવાની શક્યતા છે. આ ઉપરાંત માર્ચથી મે દરમિયાન હીટ વેવના દિવસોની સંખ્યામાં પણ વધારો થવાની ધારણા છે. IMD એ આ વર્ષે માર્ચથી મે 2024 સુધીની ઉનાળાની મોસમ માટે આગાહી જારી કરી છે, જેમાં કહેવામાં આવ્યું છે કે દેશના મોટાભાગના ભાગોમાં તાપમાન સામાન્ય કરતા વધારે રહેવાની ધારણા છે. હવામાન વિભાગના જણાવ્યા અનુસાર માર્ચથી મે દરમિયાન ગરમીના મોજાની સંખ્યામાં પણ વધારો થવાની આશંકા છે. IMDએ માહિતી આપી હતી કે ઉત્તર-પશ્ચિમ, ઉત્તર-પૂર્વ, મધ્ય અને દ્વીપકલ્પના કેટલાક અલગ-અલગ વિસ્તારો સિવાય, ભારતના મોટાભાગના ભાગોમાં મહત્તમ તાપમાન સામાન્ય કરતાં વધુ રહેવાની શક્યતા છે. આ ઉપરાંત ભારતના મોટાભાગના વિસ્તારોમાં લઘુત્તમ તાપમાન પણ સામાન્ય કરતા વધુ રહેવાની ધારણા છે.

હવામાન વિભાગે ભારે ગરમીનું એલર્ટ જાહેર કર્યું 
હવામાન વિભાગે દેશના મોટાભાગના ભાગોમાં ખાસ કરીને રાજસ્થાન, ગુજરાત, હરિયાણા, પંજાબ, મધ્યપ્રદેશ, મહારાષ્ટ્ર, ઉત્તર પ્રદેશ, બિહાર, ઝારખંડ, પશ્ચિમ બંગાળ, ઓડિશા, છત્તીસગઢ, તેલંગાણામાં હીટવેવના દિવસોની સંખ્યામાં વધારો થવાની આગાહી કરી છે. માર્ચથી મેના સમયગાળા દરમિયાન આંધ્રપ્રદેશ, કર્ણાટક અને તમિલનાડુના કેટલાક ભાગોમાં તીવ્ર ગરમીની આગાહી કરવામાં આવી છે.

આ પણ વાંચોઃ ચૂંટણી ટાણે સુપ્રીમ કોર્ટમાંથી AAP ને મળ્યો જબરદસ્ત મોટો ઝટકો, ઓફિસ ખાલી કરવા કહ્યું

આ રાજ્યોમાં વાવાઝોડા સાથે વરસાદ
હવામાન વિભાગના જણાવ્યા અનુસાર આ વર્ષે સમગ્ર ભારતમાં સામાન્ય કરતાં વધુ વરસાદની શક્યતા છે. મોટાભાગના વિસ્તારોમાં સામાન્ય કરતાં વધુ વરસાદની અપેક્ષા છે, જ્યારે દક્ષિણ દ્વીપકલ્પના અત્યંત દક્ષિણ-પૂર્વીય વિસ્તારો અને ઉત્તરપૂર્વીય અને અત્યંત ઉત્તર-પશ્ચિમ વિસ્તારોમાં સામાન્યથી ઓછો વરસાદ અપેક્ષિત છે. પરિણામે, આ વિસ્તારોમાં સ્થિતિ વધુ ખરાબ થવાની ધારણા છે. આ સિવાય ઉત્તર-પૂર્વીય દ્વીપકલ્પ ભારતમાં, મહારાષ્ટ્રના ઘણા વિસ્તારો અને ઓડિશાના કેટલાક ભાગો અને આસપાસના વિસ્તારોમાં ગરમીના દિવસો વધવાની સંભાવના છે. હવામાન વિભાગે માર્ચના શરૂઆતના દિવસો માટે ખાસ કરીને પશ્ચિમ હિમાલય પ્રદેશ, પંજાબ, હરિયાણા, ચંદીગઢ, દિલ્હી, ઉત્તર પ્રદેશ, રાજસ્થાન અને ઉત્તર મધ્ય પ્રદેશમાં ભારે વરસાદ, તોફાન, વીજળી અને ભારે પવનની ચેતવણી પણ જારી કરી છે.

દિલ્હી-NCRમાં વહેલી સવારે વાદળો વરસ્યા, જાણો કેવું રહેશે હવામાન.
તમને જણાવી દઈએ કે હવામાન વિભાગની આ આગાહીઓનો હેતુ અણધારી હવામાન પરિસ્થિતિઓનો સામનો કરવા માટે સજ્જતા વધારવાનો અને આપત્તિના જોખમને ઘટાડવામાં મદદ કરવાનો છે.