Stock Split: ટાટા ગ્રુપની મોટી જાહેરાત, આ કંપનીનો 1 શેર વહેંચાશે 10 ટુકડાઓમાં, જાણો

TATA Stock Split: ટાટા ગ્રુપની કંપનીએ સોમવારે તેના પ્રથમ ક્વાર્ટરના નાણાકીય પરિણામોની જાહેરાત કરવાની સાથે સ્ટોક વિભાજનની મોટી જાહેરાત કરી છે. ટાટાની આ કંપનીએ સોમવારે શેરબજારને માહિતી આપી હતી કે તે તેના એક શેરને 10 ટુકડાઓમાં વિભાજીત કરવા જઈ રહી છે. કંપનીના ડિરેક્ટર બોર્ડે 10 રૂપિયાના ફેસ વેલ્યુવાળા એક ઇક્વિટી શેરને 1 રૂપિયાના ફેસ વેલ્યુવાળા 10 ફુલ્લી પેઇડ ઇક્વિટી શેરમાં પેટાવિભાજનને મંજૂરી આપી છે.

આ સ્ટોક સ્પ્લિટનો ઉદ્દેશ્ય કંપનીના શેરમાં લિક્વિડિટી વધારવાનો અને રિટેલ રોકાણકારો માટે ઇક્વિટી શેરને વધુ સસ્તો બનાવવાનો છે. જોકે, આ સ્ટોક સ્પ્લિટને કંપનીના શેરધારકો દ્વારા હજુ સુધી મંજૂરી આપવામાં આવી નથી. શેરધારકો પાસેથી મંજૂરી મળ્યા પછી, કંપની શેરના પેટાવિભાજન માટે એક અલગ રેકોર્ડ તારીખ જાહેર કરશે.  

ટાટા ઇન્વેસ્ટમેન્ટ કોર્પોરેશન લિમિટેડે(Tata Investment Corporation Limited) ચાલુ નાણાકીય વર્ષના પ્રથમ ક્વાર્ટર (એપ્રિલ-જૂન ક્વાર્ટર)ના પરિણામો પણ જાહેર કર્યા છે. આ સમયગાળા દરમિયાન, કંપનીનો ચોખ્ખો નફો 11.6 ટકા વધીને 146.3 કરોડ રૂપિયા થયો છે.   

ગયા નાણાકીય વર્ષના પ્રથમ ક્વાર્ટરમાં કંપનીનો ચોખ્ખો નફો 131.07 કરોડ રૂપિયા હતો. ટાટા ઇન્વેસ્ટમેન્ટ કોર્પોરેશન લિમિટેડ (TICL) એ સોમવારે એક એક્સચેન્જ ફાઇલિંગમાં જણાવ્યું હતું કે પ્રથમ ક્વાર્ટરમાં તેની કાર્યકારી આવક 145.46 કરોડ રૂપિયા હતી, જે ગયા નાણાકીય વર્ષના પ્રથમ ક્વાર્ટરમાં 142.46 કરોડ રૂપિયા હતી.  

કંપનીએ જણાવ્યું હતું કે તેનો કુલ ખર્ચ નજીવો વધીને 12.15 કરોડ રૂપિયા થયો છે જે એક વર્ષ અગાઉના સમાન ક્વાર્ટરમાં 11.77 કરોડ રૂપિયા હતો. આ સમયગાળા દરમિયાન કંપનીની ડિવિડન્ડ આવક વાર્ષિક ધોરણે 84.08 કરોડ રૂપિયાથી વધીને 89.16 કરોડ રૂપિયા થઈ છે.

ટાટા ઇન્વેસ્ટમેન્ટ કોર્પોરેશન લિમિટેડ એક પ્રણાલીગત રીતે મહત્વપૂર્ણ નોન-બેંકિંગ ફાઇનાન્શિયલ કંપની (NBFC) છે. ભારતીય રિઝર્વ બેંક (RBI) દ્વારા તેને મધ્યમ સ્તરની NBFC તરીકે વર્ગીકૃત કરવામાં આવી છે.

ડિસ્ક્લેમર: અહીં સ્ટોકમાં રોકાણ કરવાની સલાહ બ્રોકરેજ હાઉસ દ્વારા આપવામાં આવી છે. આ ZEE 24 કલાકના વિચાર નથી. રોકાણ કરતા પહેલા તમારા સલાહકારની સલાહ લો.