હોળી પહેલા સરકારી કર્મચારીઓને મળી શકે છે સૌથી મોટા ખુશખબર, આ વખતે સરકાર કેટલો વધારશે DA?

7th Pay Commission DA Hike 2025: જો તમે કેન્દ્ર સરકારના કર્મચારી છો અથવા તમારા પરિવારમાં કોઈ કેન્દ્રીય કર્મચારી છે, તો આ સમાચાર તમારા માટે ઉપયોગી સાબિત થઈ શકે છે. હા, હોળી પહેલા કેન્દ્રીય કર્મચારીઓ માટે સારા સમાચાર મળવાની આશા છે. મીડિયા રિપોર્ટ્સ અનુસાર સરકાર હોળી પહેલા મોંઘવારી ભથ્થા (DA)માં 2%નો વધારો કરી શકે છે. મોંઘવારી ભથ્થામાં આ વધારો જાન્યુઆરી-જૂન 2025ના પગાર હેઠળ કરવામાં આવશે. કેન્દ્રીય કર્મચારીઓના ડીએમાં સરકાર દ્વારા વર્ષમાં બે વખત વધારો કરવામાં આવે છે.

આમાં પ્રથમ વધારો જાન્યુઆરીમાં અને બીજો જુલાઈમાં થવાનો છે. જો કે, જાન્યુઆરી ડીએ માર્ચ સુધીમાં કેબિનેટ દ્વારા નક્કી કરવામાં આવે છે અને જુલાઈ ડીએ સપ્ટેમ્બર-ઓક્ટોબર સુધીમાં નક્કી કરવામાં આવે છે. ડીએ વધારવાનો હેતુ કર્મચારીઓને મોંઘવારી દર મુજબ પગાર વધારો આપવાનો છે, જેથી તેમની ખરીદ શક્તિ અકબંધ રહે. 

મીડિયા રિપોર્ટ્સમાં દાવો કરવામાં આવી રહ્યો છે કે હોળી પહેલા કર્મચારીઓના DAમાં 2%નો વધારો થઈ શકે છે. આના કારણે કેન્દ્રીય કર્મચારીઓનું મોંઘવારી ભથ્થું 53% થી વધીને 55% થઈ શકે છે. જો કે આ અંગેનો અંતિમ નિર્ણય વડાપ્રધાન નરેન્દ્ર મોદીની અધ્યક્ષતામાં મળનારી કેબિનેટ બેઠકમાં લેવામાં આવશે.

આ વખતે હોળીનો તહેવાર 14 માર્ચ 2025ના રોજ છે. આથી સરકાર આ અંગે ટૂંક સમયમાં જાહેરાત કરે તેવી શક્યતા છે. છેલ્લી વખત ઓક્ટોબર 2024માં કેન્દ્રીય કર્મચારીઓના ડીએમાં 3%નો વધારો કરવામાં આવ્યો હતો. તે 1 જુલાઈ, 2024 થી અમલી બનાવવામાં આવ્યું હતું અને તે સમયે તે 50% થી વધીને 53% થયું હતું. સરકારી પેન્શનરો (pensioners)ને પણ સમાન દરે મોંઘવારી રાહત (DR) આપવામાં આવે છે.

જો સરકાર મોંઘવારી ભથ્થામાં 2% વધારો કરે છે, તો તેની અસર ભવિષ્યમાં તેમના પગાર પર પડશે. ઉદાહરણ તરીકે, જો એન્ટ્રી-લેવલના કર્મચારીનો બેઝિક પગાર દર મહિને રૂ. 18,000 છે, તો તેને વર્તમાન 53% DA પર દર મહિને રૂ. 9,540 મળે છે. 2 ટકા ડીએ વધારા બાદ આ DA  9,900 રૂપિયા પ્રતિ માસ થઈ જશે. એટલે કે દર મહિને મળનાર DAમાં દર મહિને 360 રૂપિયાનો વધારો થશે. તેવી જ રીતે જો કોઈ વ્યક્તિની બેઝિક સેલરી 30,000 રૂપિયા પ્રતિ માસ છે, તો તેનું 15,900 રૂપિયાનું DA વધીને 16,500 રૂપિયા પ્રતિ માસ થઈ જશે.

મોંઘવારી વધવાની સાથે કર્મચારીઓના પગારમાં પણ વધારો કરવો જરૂરી છે. સરકાર દર વર્ષે જાન્યુઆરી અને જુલાઈ મહિનામાં DAની સમીક્ષા કરે છે. DA સીધા ફુગાવાના દર અને જીવન ખર્ચ સાથે સંબંધિત છે. સરકારી કર્મચારીઓ અને પેન્શનરોને તેનો લાભ મળે છે. કેટલાક મીડિયા રિપોર્ટ્સમાં એવો પણ દાવો કરવામાં આવી રહ્યો છે કે આ વખતે સરકાર તરફથી મોંઘવારી ભથ્થું 3 ટકાથી વધારીને 56 ટકા કરવામાં આવી શકે છે.

મોંઘવારી ભથ્થું (DA) અને મોંઘવારી રાહત (DR)માં વધારો જૂન 2022 સુધી ઓલ ઈન્ડિયા કન્ઝ્યુમર પ્રાઈસ ઈન્ડેક્સ (AICPI) ની 12 મહિનાની સરેરાશમાં ટકાવારીના આધારે નક્કી કરવામાં આવે છે. જો કે, કેન્દ્ર સરકાર દર વર્ષે 1 જાન્યુઆરી અને 1 જુલાઈના રોજ ભથ્થાઓમાં સુધારો કરે છે. પરંતુ સામાન્ય રીતે તેની જાહેરાત માર્ચ અને સપ્ટેમ્બરમાં કરવામાં આવે છે. વર્ષ 2006માં કેન્દ્ર સરકારે કેન્દ્ર સરકારના કર્મચારીઓ અને પેન્શનરો માટે મોંઘવારી ભથ્થું (DA) અને મોંઘવારી રાહત (DR)ની ગણતરીની ફોર્મ્યુલામાં ફેરફાર કર્યો હતો.