સરકારના આ નિર્ણયથી લોકોનું વધી જવાનું ટેન્શન, CNG અને PNGના ભાવમાં થઈ શકે છે વધારો!

CNG-PNG price : જો તમે CNG વાહનનો ઉપયોગ કરો છો અથવા તમારા ઘરમાં પાઇપ્ડ ગેસ (PNG) કનેક્શન છે, તો આગામી દિવસોમાં તમારા ખિસ્સા પર બોજ વધી શકે છે. વાસ્તવમાં, સિટી ગેસ ડિસ્ટ્રિબ્યુશન (CGD) કંપનીઓને સસ્તા એડમિનિસ્ટર્ડ પ્રાઈસ મિકેનિઝમ (APM) ગેસની ફાળવણી 16 એપ્રિલથી વધુ ઘટાડવામાં આવશે. આના કારણે IGL અને MGL જેવી કંપનીઓએ CNG અને PNGની કિંમતોની સમીક્ષા કરવી પડશે. હાલ એવું અનુમાન લગાવવામાં આવી રહ્યું છે કે ગેસનો ભાવ વધશે.  

IGLને અત્યાર સુધી CNG માટે 51 ટકા APM ગેસ મળતો હતો, જે હવે ઘટાડીને 40 ટકા કરવામાં આવશે. એક રિપોર્ટમાં એક અધિકારીને ટાંકીને જણાવ્યું હતું કે હજુ સુધી તેની સત્તાવાર જાહેરાત કરવામાં આવી નથી. અધિકારીએ નામ જાહેર ન કરવાની શરતે આ માહિતી પ્રકાશકને આપી હતી. તેમણે એમ પણ જણાવ્યું છે કે APM ગેસની જગ્યાએ નવા-વેલ ગેસ (new-well gas) આપવામાં આવશે.

આ ઘટાડાથી ડિસ્ટ્રિબ્યુશન કંપનીઓના ખર્ચમાં વધારો થશે, જેના કારણે CNGના ભાવ ફરી વધી શકે છે. યસ સિક્યોરિટીઝના એક્ઝિક્યુટિવ વાઈસ પ્રેસિડેન્ટ હર્ષરાજ અગ્રવાલે કહ્યું કે આ કટ અનપેક્ષિત છે. કંપનીઓએ ભાવ વધારવો પડી શકે છે. મહાનગર ગેસના મેનેજિંગ ડિરેક્ટર આશુ શિંઘલે જણાવ્યું હતું કે કંપની પરિસ્થિતિનું વિશ્લેષણ કરી રહી છે અને ભાવો અંગે પછીથી નિર્ણય લેશે. તેમણે કહ્યું કે તેઓ અંતિમ જાહેરાતની રાહ જોશે અને પછી કિંમતો નક્કી કરશે.  

તાજેતરમાં સરકારે જૂના ગેસ ફિલ્ડમાંથી મેળવવામાં આવતા કુદરતી ગેસના ભાવમાં વધારો કર્યો હતો. આ કારણે IGLએ 7 એપ્રિલે CNGના ભાવમાં પ્રતિ કિલોગ્રામ રૂ. 1 અને નોઇડા અને ગાઝિયાબાદમાં રૂ. 3 પ્રતિ કિલોનો વધારો કર્યો હતો. 9 એપ્રિલના રોજ MGLએ CNGના ભાવમાં પ્રતિ કિલોગ્રામ રૂ. 1.5 અને PNGના ભાવમાં પ્રતિ SCM (સ્ટાન્ડર્ડ ક્યુબિક મીટર) રૂ. 1નો વધારો કર્યો હતો.

APM ગેસ સિટી ગેસ ડિસ્ટ્રીબ્યૂશન કંપનીઓને  સસ્તા દરે આપવામાં આવે છે, જેથી સ્થાનિક PNG અને CNG જેવી આવશ્યક સેવાઓ સસ્તી રહે. APM ગેસની કિંમત હવે $6.50 થી વધીને $6.75 પ્રતિ mmBtu થઈ ગઈ છે. પાછલા મહિનાઓમાં સ્થાનિક ઉત્પાદનમાં ઘટાડાને કારણે સરકારે ગેસ વિતરણ કંપનીઓને APM ગેસનો પુરવઠો ઘટાડી દીધો હતો. ઓક્ટોબરમાં આ પુરવઠો 68 ટકાથી ઘટાડીને 50.75 ટકા અને નવેમ્બરમાં 37 ટકા કરવામાં આવ્યો હતો. CGD કંપનીઓએ મોંઘો ગેસ ખરીદવો પડ્યો, જેના કારણે તેમના નફા પર અસર પડી. જાન્યુઆરીમાં CNG માટે APM ગેસનો પુરવઠો વધારીને 51.48 ટકા કરવામાં આવ્યો હતો.