સુરતની બજારોમાં સોના-ચાંદીમાંથી બનેલી આ રાખડીઓ આકર્ષણનું કેન્દ્ર, રક્ષાબંધને દેખાશે શૌર્ય

સુરતના બજારમાં હાલ સોના અને ચાંદીમાંથી બનેલી બ્રહ્મોસ મિસાઈલની ડિઝાઈનવાળી નાની રાખડીઓની માંગ આસમાને પહોંચી છે. "બ્રહ્મોસ રાખડી" તરીકે જાણીતી થયેલી આ રાખડીઓ ખૂબ જ લોકપ્રિય બની રહી છે. ચાંદીની બ્રહ્મોસ મિસાઈલવાળી રાખડી લગભગ 10 ગ્રામ વજનની છે અને તેની કિંમત અંદાજે 2500 રૂપિયા છે. 

આ ખાસ રાખડીઓની વધુ એક વિશેષતા એ છે કે તે તિરંગાના રંગોવાળી દોરી સાથે સજ્જ છે. આ તિરંગાની દોરી ભારતીય હોવાનો ગર્વ અને રાષ્ટ્રપ્રેમનો સંદેશ આપે છે. જ્યારે, સોનાની બ્રહ્મોસ મિસાઈલવાળી રાખડી ખાસ 9 કેરેટ ગોલ્ડમાં તૈયાર કરવામાં આવી છે, જેથી તે લોકોના બજેટમાં સરળતાથી આવી શકે. 5 થી 6 ગ્રામ વજનમાં તૈયાર થતી આ સોનાની રાખડીઓની કિંમત 60000 થી 80000 રૂપિયા છે.

ડી. ખુશાલદાસ જ્વેલર્સના દીપક ચોકસીએ આ પહેલ વિશે જણાવ્યું હતું કે ઓપરેશન સિંદૂર શૌર્યનું પ્રતીક હતું. ભારતમાં બનેલી બ્રહ્મોસ મિસાઈલના સ્વરૂપને અમે ચાંદી અને સોનામાં બનાવીને રાખડી બનાવી છે. લોકો તેને ખૂબ સારી રીતે વખાણી રહ્યા છે અને રાખડી લેવા માટે પણ આવી રહ્યા છે." 

તેમણે ઉમેર્યું કે, "અમે હાલ સોના અને ચાંદીના વધતા ભાવને ધ્યાનમાં રાખીને તેને બજેટમાં આવે તેવી રીતે બનાવી છે. જ્યારે બ્રહ્મોસ મિસાઈલની રાખડી બનાવવામાં આવે ત્યારે તે તિરંગામાં જ હોવી જોઈએ, આ હેતુથી અમે રાખડીની દોરી તિરંગા ડિઝાઈનમાં રાખી છે. આ રાખડી સિલ્વર અને હાલ સોનાના ભાવ વધતાં 9 કેરેટ ગોલ્ડમાં બનાવી છે, જેને લોકો સૌથી વધુ પસંદ કરી રહ્યા છે. આ લાઇટવેટ અને ખૂબ જ એક્સપેન્સિવ લાગે તેવી રાખડી છે.

તેમણે જણાવ્યું હતું કે તેમના શોરૂમમાં 500 રૂપિયાથી લઈને 'નો લિમિટ' સુધીની રાખડીઓ ઉપલબ્ધ છે, જેને રાખડી તરીકે પહેર્યા પછી પેન્ડન્ટ તરીકે પણ પહેરી શકાય છે. બહેનનો જે રક્ષાનો પ્રતીક છે તે વર્ષો વર્ષ રહે તે માટે અમે પેન્ડન્ટની ડિઝાઈનમાં પણ રાખડીઓ બનાવી છે.