ગુજરાતના આ વિસ્તારોમાં થશે ભારે વરસાદ; ચોમાસુ ફરીથી સક્રિય થવાનો સંકેત, આ તારીખથી આગળ વધશે!

અરબી સમુદ્ર અને બંગાળના ઉપસાગરમાં સિસ્ટમ સક્રિય થાય છે. તેથી 11 જૂનથી ચોમાસું સક્રિય થશે. મુંબઈ અને મહારાષ્ટ્રમાં ભારેથી અતિભારે વરસાદ થવાની શક્યતા છે. 12થી 15 જૂન સુધીમાં દક્ષિણ ગુજરાત, દક્ષિણ સૌરાષ્ટ્ર અને મધ્ય ગુજરાતમાં ભારે વરસાદની શક્યતા છે. એટલું જ નહીં, 22 જૂન સુધીમાં રાજ્યના મોટાભાગના ભાગોને ચોમાસું આવરી લેશે.   

રાજ્યમાં 15 જૂન પછી વરસાદની સિસ્ટમ આગળ વધી શકે છે. કારણ કે 12 જૂને આંધ્રપ્રદેશ અને ઓરિસ્સાના કાંઠે એક સિસ્ટમ ડેવલપ થવાથી બંગાળની ખાડીમાં લો-પ્રેશર સર્જાશે. આ સિસ્ટમ ધીમી ગતિએ આગળ વધીને મહારાષ્ટ્ર સુધી પહોંચતાં મુંબઈ પાસે અટકેલું ચોમાસું ફરી સક્રિય થઈ 15 જૂનની આસપાસ આગળ વધશે, જેની અસરોથી 16, 17 જૂનની આસપાસ સૌરાષ્ટ્ર અને દક્ષિણ ગુજરાતના કાંઠા વિસ્તારો સુધી ચોમાસું બેસી શકે છે. 

17 જૂનની આસપાસ વધુ એક અપર એર સાઇક્લોનિક સરક્યુલેશનની સિસ્ટમ સક્રિય થવાથી રાજ્યમાં ચોમાસું એક્ટિવ થઈ શકે છે અને 22 જૂન સુધીમાં રાજ્યના મોટા ભાગના વિસ્તારોમાં હળવાથી મધ્યમ વરસાદનો એક રાઉન્ડ આવવાની શક્યતા છે. ત્યાર બાદ 30 જુન સુધીમાં રાજ્યના મોટા ભાગના વિસ્તારોમાં સાર્વત્રિક વરસાદ પડી શકે છે. 

હવામાન વિભાગના આંકડા મુજબ, હાલમાં વરસાદની કોઈ સિસ્ટમ સક્રિય ન હોવાથી ચારથી પાંચ દિવસ ગરમી 42 ડિગ્રી અને લઘુતમ તાપમાન 28 ડિગ્રીની આસપાસ રહેવાની શક્યતા છે. પશ્ચિમ દિશામાં પવન ફૂંકાઈ રહ્યો છે. બીજી તરફ તાપમાનનો પારો પણ ઊંચકાઈ રહ્યો છે. જેના કારણે ગરમી અને અસહ્ય બફારાથી લોકો બેહાલ બન્યા છે.

આગામી 7 દિવસ સુધી સૌરાષ્ટ્ર, દક્ષિણ અને ઉત્તર ગુજરાતના કેટલાક વિસ્તારોમાં હળવાથી મધ્યમ વરસાદ રહેશે. 9થી 12 જૂન સુધી દરિયાકાંઠા વિસ્તારોમાં વરસાદી માહોલ રહેશે. ઉત્તર ગુજરાતમાં ગરમી પડવા માટે ઉત્તર તરફથી ગરમ પવનોને કારણે તાપમાન વધી રહ્યું છે. ગુજરાતમાં 12થી 18 જૂન દરમિયાન ચોમાસું આવવાની સંભાવના છે.

10, 11 અને 12મી જૂન: અમરેલી, ભાવનગર, ગીર સોમનાથ, તાપી, ડાંગ, નવસારી, વલસાડ, દમણ અને દાદરા નગર હવેલીમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે. 

13 જૂન: ફરી વરસાદનું જોર વધવાની વકી છે. અમરેલી, ભાવનગર, ગીર સોમનાથ, ભરૂચ, વડોદરા, પંચમહાલ, દાહોદ, છોટા ઉદેપુર, નર્મદા, સુરત, તાપી, ડાંગ, નવસારી, વલસાડ, દમણ અને દાદરા નગર હવેલીમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની શક્યતા છે. 

14 જૂન: ઉત્તર ગુજરાતના ભાગોનો સમાવેશ થશે. રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, અરવલ્લી, મહીસાગર, ભરૂચ, વડોદરા, પંચમહાલ, દાહોદ, નર્મદા, તાપી, ડાંગ, સુરત, નવસારી, વલસાડ, દમણ અને દાદરા નગર હવેલીમાં મધ્યમ વરસાદની આગાહી છે. 

15 જૂન: રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, સાબરકાંઠા, અરવલ્લી, મહીસાગર, ભરૂચ, વડોદરા, પંચમહાલ, દાહોદ, નર્મદા, તાપી, ડાંગ, સુરત, નવસારી, વલસાડ, દમણ અને દાદરા નગર હવેલીમાં હળવાથી મધ્યમ વરસાદની આગાહી છે.