પ્યાર કિયા તો ડરના ક્યા... શિખર ધવને નવા રિલેશનશિપની કરી પુષ્ટિ, ખુલ્લેઆમ કર્યો પ્રેમ જાહેર

ટીમ ઈન્ડિયાના પૂર્વ ક્રિકેટર શિખર ધવન છેલ્લા કેટલાક મહિનાઓથી પોતાના અંગત જીવનને લઈને ચર્ચામાં છે. તેનું નામ સોફી સાઈન સાથે જોડાઈ રહ્યું છે અને તે ઘણી વખત ધવન સાથે જોવા મળી છે. હવે સોશિયલ મીડિયા પર ગબ્બરે ખુલ્લેઆમ પોતાનો પ્રેમ વ્યક્ત કર્યો છે. તેમણે એક એવી પોસ્ટ શેર કરી છે કે, ફેન્સ કોમેન્ટમાં 'નવી ભાભી' લખી રહ્યા છે. સોશિયલ મીડિયા પર ધવન અને સોફી સાઇનનો ફોટો ખૂબ જ વાયરલ થઈ રહ્યો છે.

ધવન અને સોફી સાઇન દ્વારા ઇન્સ્ટાગ્રામ પર જે ફોટો શેર કર્યો છે, તેમાં બન્ને સાથે બેઠેલા જોવા મળે છે. પોસ્ટના કેપ્શનમાં 'માય' પછી એક હાર્ટ ઇમોજી છે, જેને સોશિયલ મીડિયાની ભાષામાં 'માય લવ' કહેવામાં આવશે. સોફી અને ધવન એરપોર્ટ પર અને વાસ્તવિક જીવનમાં પણ એકસાથે જોવા મળ્યા છે. બન્ને સોશિયલ મીડિયા પર ખૂબ જ એક્ટિવ છે. આ દિવસોમાં ધવન કોમેન્ટ્રીમાં યોગદાન આપી રહ્યો છે.

મીડિયા રિપોર્ટ્સ અનુસાર સોફી સાઇન આયર્લેન્ડની છે. તે એક પ્રોડક્ટ કન્સલ્ટન્ટ તરીકે કામ કરે છે. તેણે આયર્લેન્ડમાં જ પોતાનો અભ્યાસ પૂર્ણ કર્યો. તે હાલમાં નોર્ધન ટ્રસ્ટ કોર્પોરેશનમાં વાઇસ પ્રેસિડેન્ટ તરીકે સેવા આપે છે અને હાલમાં અબુ ધાબીમાં રહે છે. છેલ્લા કેટલાક મહિનાઓથી સોફી સાઇન અને ધવન વચ્ચે સારું બોન્ડિંગ જોવા મળી રહ્યું છે.

શિખર ધવને વર્ષ 2012માં આયેશા મુખર્જી સાથે લગ્ન કર્યા હતા. પરંતુ લગ્નના થોડા વર્ષો પછી બન્ને વચ્ચે મતભેદોના સમાચાર ફેલાવા લાગ્યા. વર્ષ 2021માં ધવને દિલ્હી હાઈકોર્ટમાં છૂટાછેડાની અરજી દાખલ કરી હતી. 2021માં બન્નેએ તેમના અલગ થવાની પુષ્ટિ કરી. જો કે, હવે તેણે નવા સંબંધની પુષ્ટિ પણ કરી દીધી છે.