પહેલા શારીરિક સંબંધ બાંધ્યા, પછી લગ્ન કરવાનો કર્યો ઇનકાર...IPL વચ્ચે આ ગુજરાતી ક્રિકેટરની ધરપકડ

IPL Player : જોધપુરની એક યુવતીએ ગુજરાતના IPL ક્રિકેટર પર બળાત્કારનો આરોપ લગાવ્યો હતો. યુવતીએ આરોપ લગાવ્યો હતો કે લગ્નના બહાને આ ક્રિકેટર ઘણી વખત બળાત્કાર ગુજાર્યો હતો. આ અંગે યુવતીએ પોલીસ કેસ નોંધાવતા આ ક્રિકેટરની ધરપકડ કરવામાં આવી છે.

Shivalik Sharma : IPL 2025 વચ્ચે એક મોટા સમાચાર સામે આવ્યા છે. મુંબઈ ઈન્ડિયન્સનો પૂર્વ ખેલાડી શિવાલિક શર્મા જેલના સળિયા પાછળ ધકેલાયો છે. જોધપુર પોલીસે તેની બળાત્કારના ગંભીર આરોપમાં ધરપકડ કરી છે. રાજસ્થાન પોલીસે કાર્યવાહી કરી અને ગુજરાતના વડોદરાથી ક્રિકેટરની ધરપકડ કરી છે. શિવાલિક શર્મા પર એક યુવતીએ લગ્નના બહાને તેનું જાતીય શોષણ કરવાનો સનસનાટીભર્યો આરોપ લગાવ્યો છે.

જોધપુર પોલીસે આ ધરપકડની પુષ્ટિ કરી અને કહ્યું કે છોકરીની ફરિયાદ પર તાત્કાલિક કાર્યવાહી કરવામાં આવી છે. પીડિતાની તબીબી તપાસ કરવામાં આવી છે અને મેજિસ્ટ્રેટ સમક્ષ કલમ 164 હેઠળ તેનું નિવેદન પણ નોંધવામાં આવ્યું છે. પોલીસ હવે આ કેસમાં નક્કર પુરાવા એકત્રિત કરીને આગળની કાનૂની કાર્યવાહી શરૂ કરી રહી છે.

શું છે સમગ્ર મામલો ?

હકીકતમાં 2 જાન્યુઆરી, 2024ના રોજ જોધપુરની એક છોકરીએ કુડી ભગતાસની પોલીસ સ્ટેશનમાં ફરિયાદ નોંધાવી હતી. ફરિયાદમાં તેણીએ આરોપ લગાવ્યો હતો કે ગુજરાતના વડોદરાના રહેવાસી 27 વર્ષીય ક્રિકેટર શિવાલિક શર્માએ લગ્નનું ખોટું વચન આપીને તેની સાથે બળાત્કાર કર્યો હતો અને બાદમાં તેની સાથે લગ્ન કરવાનો ઇનકાર કર્યો હતો. યુવતીના જણાવ્યા મુજબ, ફેબ્રુઆરી 2023માં તે વડોદરા ફરવા ગઈ હતી જ્યાં તેની મુલાકાત શિવાલિક સાથે થઈ હતી. આ પછી બંને વચ્ચે વાતચીત શરૂ થઈ અને ધીમે ધીમે તેઓ નજીક આવ્યા. ઓગસ્ટ 2023માં શિવાલિક તેના પરિવાર સાથે જોધપુર આવ્યો અને બંનેએ સગાઈ પણ કરી.

સગાઈ પછી બળાત્કારનો આરોપ

યુવતીનો આરોપ છે કે 27 મે, 2023ના રોજ જ્યારે શિવાલિક તેના ઘરે આવ્યો અને ઘરે કોઈ ન હતું, ત્યારે તેણે તેની સાથે બળજબરીથી શારીરિક સંબંધ બાંધ્યા. જ્યારે તેણીએ વિરોધ કર્યો, ત્યારે તેણે તેની સાથે લગ્ન કરવાનું વચન આપ્યું. આ પછી તે 3 જૂન સુધી છોકરીના ઘરે રહ્યો અને તેની સાથે ઘણી વખત શારીરિક સંબંધ બાંધ્યા. યુવતીએ એવો પણ આરોપ લગાવ્યો છે કે આ પછી શિવાલિક તેને મહેંદીપુર બાલાજી, જયપુર અને ઉજ્જૈન લઈ ગયો જ્યાં તેણે તેની સાથે શારીરિક સંબંધો બાંધ્યા અને લગ્ન કરવાનું વચન આપતો રહ્યો.

પરંતુ જૂન 2023માં જ્યારે છોકરી લગ્નની વાત કરવા વડોદરા પહોંચી, ત્યારે શિવાલિકના પરિવારે સગાઈ તોડવાની વાત કરી અને તેને ઘરમાંથી કાઢી મૂકી. યુવતીએ એવો પણ આરોપ લગાવ્યો હતો કે તેની સાથે ધક્કા-મુક્કી કરી હતી. 

કોણ છે શિવાલિક શર્મા ?

28 નવેમ્બર 1998ના રોજ વડોદરામાં જન્મેલા શિવાલિક શર્માને બાળપણથી જ ક્રિકેટનો શોખ હતો. અભ્યાસમાં ઓછો રસ હોવાથી, તેના પિતાએ તેને ક્રિકેટ રમવાની સંપૂર્ણ સ્વતંત્રતા આપી. શિવાલિકે 2016માં બિન્નુ અંડર-19 ટ્રોફીથી પોતાની ક્રિકેટ કારકિર્દીની શરૂઆત કરી હતી. ત્યારબાદ તેણે 2018-19 રણજી ટ્રોફી સીઝનમાં બરોડા માટે ફર્સ્ટ-ક્લાસ ડેબ્યૂ કર્યું. તેને 2024માં મુંબઈ ઇન્ડિયન્સે 20 લાખ રૂપિયામાં ખરીદ્યો હતો. જોકે, તાજેતરના સમયમાં તેણે ક્રિકેટથી દૂરી બનાવી લીધી હતી અને આ સિઝન પહેલા મુંબઈ ઇન્ડિયન્સ દ્વારા તેને રિલીઝ કરવામાં આવ્યો હતો. હવે આ ગંભીર બળાત્કાર કેસમાં તેની ધરપકડથી તેના ભવિષ્ય પર ગંભીર પ્રશ્નો ઉભા થયા છે.