આ મારી છેલ્લી...ધોનીએ IPLમાંથી નિવૃત્તિના સસ્પેન્સનો લાવ્યો અંત, કરી દિલની વાત

MS Dhoni : ઈન્ડિયન પ્રીમિયર લીગ 2025નો ઉત્સાહ શરૂ થઈ ગયો છે. 18મી સિઝનના બીજા દિવસે ચેન્નાઈ સુપર કિંગ્સ અને મુંબઈ ઈન્ડિયન્સ વચ્ચે ડબલ હેડરમાં અલ ક્લાસિકો મેચ રમાશે. આ બ્લોકબસ્ટર મેચ પહેલા અનુભવી મહેન્દ્રસિંહ ધોનીએ પોતાની નિવૃત્તિને લઈને એક મોટું અપડેટ આપ્યું છે.

MS Dhoni : ઈન્ડિયન પ્રીમિયર લીગ 2025ની ધમાકેદાર શરૂઆત થઈ ગઈ છે. આ લીગની 18મી સિઝન છે. આઈપીએલની આ 18મી સિઝન ઘણા દિગ્ગજ ખેલાડીઓ માટે છેલ્લી ટૂર્નામેન્ટ સાબિત થઈ શકે છે. તેમાં એક મહાન ખેલાડી મહેન્દ્રસિંહ ધોનીનું પણ નામ છે. ધોની આ લીગના સૌથી સફળ કેપ્ટનોમાંથી એક રહ્યો છે. તેની કપ્તાની હેઠળ, તેણે CSK માટે પાંચ IPL ટાઇટલ જીત્યા છે. ધોની 43 વર્ષનો છે. છેલ્લી બે સિઝનથી તેના નિવૃત્તિની ઘણી ચર્ચા હતી, પરંતુ આ વખતે મનાઈ રહ્યું છે કે આ તેના માટે છેલ્લી IPL સિઝન હશે.

જો કે, ધોનીએ પોતે IPLમાંથી નિવૃત્તિ અંગેના સસ્પેન્સનો અંત લાવ્યો છે. ધોનીએ 18મી સિઝનમાં મુંબઈ ઈન્ડિયન્સ સામેની મેચ પહેલા પોતાની નિવૃત્તિ અંગે ખુલીને વાત કરી હતી અને કહ્યું હતું કે CSK હવે તેના માટે છેલ્લી ફ્રેન્ચાઈઝી છે. તેના નિવેદનથી સ્પષ્ટ થઈ ગયું છે કે ધોની પીળી જર્સીમાં જ આઈપીએલમાંથી નિવૃત્તિ લેશે.

ઈન્ટરવ્યુમાં ધોનીએ શું કહ્યું ?

તમને જણાવી દઈએ કે છેલ્લી 2 સીઝનથી ધોનીની નિવૃત્તિને લઈને અટકળો ચાલી રહી છે. જો કે, તેણે દર વખતે આવા અહેવાલોને ફગાવી દીધા હતા. આવી સ્થિતિમાં હવે તેણે ફરી એકવાર સંકેત આપ્યો છે કે હાલમાં તે આ લીગમાંથી નિવૃત્તિ લેવાનું વિચારી રહ્યો નથી. તેણે જિયોહોટસ્ટારને આપેલા ઈન્ટરવ્યુમાં કહ્યું કે, હું ઈચ્છું ત્યાં સુધી હું CSK માટે રમી શકું છું. આ મારી ફ્રેન્ચાઇઝી છે. જો હું વ્હીલચેર પર હોઉં તો પણ CSK મને ખેંચી જશે.

આ સિવાય ટીમના વર્તમાન કેપ્ટન રુતુરાજ ગાયકવાડે પણ ધોનીની IPLમાંથી નિવૃત્તિ અંગે વાત કરી અને કહ્યું કે, તે હાલમાં 43 વર્ષના છે. સચિન તેંડુલકર 50 વર્ષની ઉંમરે પણ શાનદાર પ્રદર્શન કરી રહ્યા છે. ધોની હજુ થોડા વર્ષો સુધી આ લીગમાં રમતા જોવા મળશે. આવી સ્થિતિમાં, તે સ્પષ્ટ થઈ ગયું છે કે ધોની IPL 2026માં પણ રમતા જોવા મળી શકે છે. જોકે, તે તેની ફિટનેસ પર નિર્ભર કરશે કે તે રમી શકશે કે નહીં.