Virat-Rohit: 'જાની દુશ્મન' બની ગયા હતા વિરાટ અને રોહિત, પછી શાસ્ત્રીએ કરાવ્યું હતું સમાધાન, પુસ્તકમાં થયો ખુલાસો

Virat Kohli Rohit Sharma Controversy: એક સમય એવો હતો જ્યારે ટીમ ઈન્ડિયાનો પૂર્વ કેપ્ટન વિરાટ કોહલી વિરોધી ટીમ વિરુદ્ધ પોતાની આક્રમકતા માટે જાણીતો હતો પરંતુ 2019માં પોતાની ટીમની અંદર સીનિયર ખેલાડી રોહિત શર્માની સાથે અણબનાવ થઈ ગયો હતો. પરંતુ આ દરમિયાન મુદ્દાને શાંત કરાવી દેવામાં આવ્યો હતો.

નવી દિલ્હીઃ વર્ષ 2019 ભારતીય ક્રિકેટ ટીમ માટે ખૂબ જ ખરાબ માની શકાય છે. તે જ વર્ષે, ટીમ ઈન્ડિયા ઈંગ્લેન્ડમાં ODI વર્લ્ડની સેમીફાઈનલમાં ન્યૂઝીલેન્ડ સામે હાર્યા બાદ ટાઇટલની રેસમાંથી બહાર થઈ ગઈ હતી. ત્યારથી ટીમ ઈન્ડિયામાં ઘણી વસ્તુઓ બદલાઈ ગઈ છે. વિરાટ કોહલીએ ટીમની કેપ્ટનશીપ છોડી દીધી અને કમાન રોહિત શર્માના હાથમાં આવી ગઈ છે. આ દરમિયાન વિરાટ અને રોહિત વચ્ચેના ઝઘડાના સમાચારે પણ ઘણી હેડલાઈન્સ બનાવી હતી. જોકે સમય જતાં મામલો ઠંડો પડી ગયો હતો, પરંતુ ભૂતપૂર્વ ફિલ્ડિંગ કોચ આર શ્રીધરના પુસ્તકે ફરી એકવાર આ મુદ્દો ઉઠાવ્યો છે.

વાસ્તવમાં, શ્રીધરે તેના પુસ્તક 'કોચિંગ બિયોન્ડ'માં ખુલાસો કર્યો છે કે 2019 વર્લ્ડ કપ દરમિયાન રોહિત શર્મા અને વિરાટ કોહલી વચ્ચે બધુ બરાબર ન હતું. આ કારણે તે સમયે કોચ રહેલા રવિ શાસ્ત્રીએ દરમિયાનગીરી કરવી પડી હતી, ત્યાર બાદ મામલો થાળે પડ્યો હતો.

આર શ્રીધરે પોતાના પુસ્તકમાં લખ્યું છે કે, 2019 વર્લ્ડ કપના ડ્રેસિંગ ફોર્મમાં ઘણી બધી બાબતો ખોટી થઈ હતી. આ દરમિયાન, વિરાટ કોહલી અને રોહિત શર્મા વચ્ચેના ઝઘડાના સમાચાર પણ સામે આવ્યા હતા અને કહેવામાં આવ્યું હતું કે ટીમમાં બે કેમ્પ બનાવવામાં આવ્યા છે. એટલું જ નહીં વિરાટ અને રોહિતે સોશિયલ મીડિયા પર એકબીજાને અનફોલો પણ કરી દીધા છે. મામલો એ હદે વધી ગયો હતો કે જો સમયસર ઉકેલ ન આવ્યો તો મામલો વધુ બગડી શકતો હતો.

આ પણ વાંચોઃ ટીમ ઈન્ડિયાના આ 2 ખેલાડીઓએ 'તિલક' લગાવવાની પાડી ના! વાયરલ વીડિયોથી બબાલ શરૂ

તેણે લખ્યું, વર્લ્ડ કપ બાદ ભારતીય ટીમ વેસ્ટ ઈન્ડિઝના પ્રવાસે ગઈ હતી. અહીં ટીમ ઈન્ડિયાના મુખ્ય કોચ રહી ચૂકેલા રવિ શાસ્ત્રીએ વિરાટ અને રોહિત વચ્ચે સમાધાનનું કામ કર્યું હતું. શાસ્ત્રીએ બંનેને સાથે બોલાવીને તમામ પ્રકારની ફરિયાદો દૂર કરી.

જોકે, રવિ શાસ્ત્રીએ ક્યારેય મીડિયામાં વિરાટ કોહલી અને રોહિત વચ્ચેના વિવાદ અંગે ખુલીને વાત કરી નથી.