MS ધોનીની ટીકા વચ્ચે રવિન્દ્ર જાડેજાએ એવી તે શું પોસ્ટ કરી કે મચી ખલબલી

IPL 2025 : IPL 2025માં જીત સાથે શરૂઆત કર્યા બાદ ચેન્નાઈ સુપર કિંગ્સને સતત બે મેચોમાં હારનો સામનો કરવો પડ્યો છે. ટીમની હાર બાદ ધોનીના બેટિંગ ઓર્ડરને લઈને પણ ઘણી ચર્ચાઓ થઈ રહી છે, ત્યારે આ બધાની વચ્ચે જાડેજાએ સોશિયલ મીડિયા પર એક પોસ્ટ મુકી છે, જે ઝડપથી વાયરલ થઈ રહી છે.

IPL 2025 : પાંચ વખતની વિજેતા ટીમ ચેન્નાઈ સુપર કિંગ્સે IPL 2025ની શરૂઆત જીત સાથે કરી હતી. પરંતુ હવે ટીમને હારના ડબલ ડોઝનો સામનો કરવો પડી રહ્યો છે. છેલ્લી મેચમાં ચેન્નાઈને રાજસ્થાન સામે હારનો સામનો કરવો પડ્યો હતો. રવિન્દ્ર જાડેજા અને એમએસ ધોની જીતની છેલ્લી આશા હતા, પરંતુ તેમણે ચાહકોની આશા પણ તોડી. ફિનિશર ધોની પર પણ ઘણી જગ્યાએ સવાલો ઉઠાવવામાં આવ્યા હતા. પરંતુ રવિન્દ્ર જાડેજાએ સોશિયલ મીડિયા પોસ્ટ દ્વારા બધાને એક ખાસ સંદેશ આપ્યો છે.

આ મેચમાં રાજસ્થાનનો વિજય થયો હતો

રાજસ્થાને છેલ્લી ઓવરમાં ચેન્નાઈની ટીમને માત્ર 6 રનના માર્જિનથી હરાવ્યું હતું. 183 રનના લક્ષ્યનો પીછો કરતી વખતે CSK સંઘર્ષ કરતી જોવા મળી હતી. કેપ્ટન રૂતુરાજ ગાયકવાડે અડધી સદી રમીને ટીમને પાટા પર લાવી દીધી હતી. CSKને છેલ્લી 2 ઓવરમાં 40 રનની જરૂર હતી. એમએસ ધોની 7મા નંબરે બેટિંગ કરવા આવ્યો હતો, તેને જાડેજાએ ટેકો આપ્યો હતો જેણે 32 રનની શાનદાર ઇનિંગ રમી હતી.

ધોની છેલ્લી ઓવરમાં આઉટ થયો 

એમએસ ધોનીએ એક સિક્સર અને એક ફોર ફટકારીને તમામ ચાહકોની આશા જીવંત રાખી હતી. છેલ્લી ઓવરમાં CSKને જીતવા માટે 20 રનની જરૂર હતી, પરંતુ હેટમાયરના શાનદાર કેચને કારણે ધોનીએ પહેલા જ બોલ પર પોતાની વિકેટ ગુમાવી દીધી હતી. જે બાદ CSKને 6 રનથી હારનો સામનો કરવો પડ્યો હતો.

જાડેજાની પોસ્ટ વાયરલ થઈ 

રવિન્દ્ર જાડેજાએ એમએસ ધોની સાથેની એક ઇન્સ્ટાગ્રામ સ્ટોરી પોસ્ટ કરી છે, જેમાં તેણે લખ્યું છે, 'Things Will Change.' આ જાડેજાનો સીધો સંદેશ છે કે ચેન્નાઈની ટીમ પુનરાગમન કરશે. CSKએ અત્યાર સુધી 3 મેચ રમી છે જેમાં આ ટીમને માત્ર એક જ જીત મળી છે. હવે ટીમની આગામી મેચ 5મી એપ્રિલે દિલ્હી કેપિટલ્સ સાથે થશે. દિલ્હીનો વિજયરથ અટકે છે કે નહીં તે જોવું રસપ્રદ રહેશે.