ମିଜାଇଲ୍‌ ଆକ୍ରମଣ ପାଇଁ ବଦଳିଲା ଏୟାର ଇଣ୍ଡିଆ ବିମାନ ଗତିପଥ

ନୂଆଦିଲ୍ଲୀ: ଆଜି (ରବିବାର) ଦିନ ହୁଥି ବିଦ୍ରୋହୀମାନେ ଇସ୍ରାଏଲର ବେନ୍ ଗୁରିଅନ୍ ବିମାନବନ୍ଦର ଉପରେ ଏକ ବାଲିଷ୍ଟିକ୍ କ୍ଷେପଣାସ୍ତ୍ର ଆକ୍ରମଣ କରିଛନ୍ତି। ଇସ୍ରାଏଲୀ ସୁରକ୍ଷା ବାହିନୀ ଏହି ଆକ୍ରମଣକୁ ରୋକିବାରେ ବିଫଳ ହୋଇଛନ୍ତି । କ୍ଷେପଣାସ୍ତ୍ରଟି ବେନ୍ ଗୁରିଅନ୍ ବିମାନବନ୍ଦର ଉପରେ ପଡ଼ିଥିଲା। କ୍ଷେପଣାସ୍ତ୍ର ଆକ୍ରମଣ ପୂର୍ବରୁ ବିମାନବନ୍ଦରରେ ଉଭୟ ଅବତରଣ ଏବଂ ଉଡ଼ାଣ ସେବା ବନ୍ଦ କରାଯାଇଥିଲା। ଏହି ମିଜାଇଲ୍ ଆକ୍ରମଣରେ ଛଅ ଜଣ ସାମାନ୍ୟ ଆହତ ହୋଇଥିବା ଖବର ମିଳିଛି । ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି ।

ଅନ୍ୟପଟେ, ଦିଲ୍ଲୀରୁ ତେଲ ଅଭିଭ ଯାଉଥିବା ଏୟାର ଇଣ୍ଡିଆର ବିମାନ AI139କୁ ୩ ମଇ (ଶନିବାର) ସକାଳେ ଆବୁଧାବିକୁ ସ୍ଥାନାନ୍ତରିତ କରାଯାଇଥିଲା। ଏୟାର ଇଣ୍ଡିଆ ଅନୁଯାୟୀ, ବିମାନଟି ଆବୁଧାବିରେ ସ୍ୱାଭାବିକ ଭାବରେ ଅବତରଣ କରିଛି । ପରେ ବିମାନଟି ଦିଲ୍ଲୀକୁ ଫେରିବ ବୋଲି କୁହାଯାଇଛି ।

ଏୟାର ଇଣ୍ଡିଆ ପକ୍ଷରୁ ବିଜ୍ଞପ୍ତିରେ କୁହାଯାଇଛି ଯେ, ଯାତ୍ରୀ ଏବଂ କର୍ମଚାରୀଙ୍କ ସୁରକ୍ଷାକୁ ଧ୍ୟାନରେ ରଖି, ତେଲ୍ ଅଭିଭକୁ ଆସୁଥିବା ଏବଂ ତେଲ୍ ଅଭିଭରୁ ଯିବାକୁ ଥିବା ସମସ୍ତ ବିମାନ ଉଡ଼ାଣ ୬ ମଇ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ଏୟାରଲାଇନ୍ସ ପକ୍ଷରୁ ଏହା ମଧ୍ୟ କୁହାଯାଇଛି ଯେ, ଗ୍ରାଉଣ୍ଡ ଷ୍ଟାଫ୍ ଯାତ୍ରୀମାନଙ୍କୁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦେଉଛନ୍ତି ଏବଂ ସେମାନଙ୍କ ପାଇଁ ବିକଳ୍ପ ବ୍ୟବସ୍ଥା ଉପଲବ୍ଧ କରାଯାଉଛି।

୨୦୨୫ ମସିହାର ୩ ରୁ ୬ ମଇ ମଧ୍ୟରେ ବିମାନରେ ବୁକ୍ କରିଥିବା ଯାତ୍ରୀମାନଙ୍କୁ ଟିକେଟ ପୁନଃନିର୍ଦ୍ଧାରିତ କରିବା ଉପରେ ଏକକାଳୀନ ରିହାତି କିମ୍ବା ଟିକେଟ ବାତିଲ କରିବା ଉପରେ ପୂର୍ଣ୍ଣ ଫେରସ୍ତ ମିଳିବ ବୋଲି ସୂଚନା ମିଳିଛି । ଏୟାର ଇଣ୍ଡିଆ ସ୍ପଷ୍ଟ କରିଛି ଯେ, ଯାତ୍ରୀ ଏବଂ କ୍ରୁ ସଦସ୍ୟଙ୍କ ସୁରକ୍ଷା ସେମାନଙ୍କର ସର୍ବୋଚ୍ଚ ପ୍ରାଥମିକତା । ତେଣୁ ଏପରି ନିଷ୍ପତ୍ତି ନିଆଯାଇଛି।

ହୁଥି ବିଦ୍ରୋହୀମାନେ ବେନ୍ ଗୁରିଅନ୍ ବିମାନବନ୍ଦରକୁ ବାଲିଷ୍ଟିକ୍ କ୍ଷେପଣାସ୍ତ୍ର ଦ୍ୱାରା ଆକ୍ରମଣ କରିବା ପରେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଥିଲେ। ଆଜି ସନ୍ଧ୍ୟାରେ ନେତାନ୍ୟାହୁ ଏକ କ୍ୟାବିନେଟ୍ ବୈଠକ କରିବେ ବୋଲି ସୂଚନା ମିଳିଛି । ଏହି ବୈଠକରେ ହୁଥି ବିଦ୍ରୋହୀଙ୍କ ବିରୋଧରେ ତାଙ୍କର କାର୍ଯ୍ୟାନୁଷ୍ଠାନ ସମ୍ପର୍କରେ ଆଲୋଚନା ହୋଇପାରେ ।