Billionaire left Britain: 'ବ୍ରିଟେନ ଯାଉ ନର୍କକୁ, ମୁଁ ଚାଲିଲି ଦେଶ ଦୁବାଇ' ଏଭଳି କହି ଦେଶ ଛାଡ଼ିଲେ କୋଟିପତି

Billionaire left Britain: ନୂଆଦିଲ୍ଲୀ: ବ୍ରିଟେନରେ ରହିବା ବିଶ୍ୱର ପ୍ରାୟତଃ ଅଧିକାଂଶ ଲୋକଙ୍କ ସ୍ୱପ୍ନ ରହିଥାଏ। ଏପରିକି ବହୁ ଭାରତୀୟମଧ୍ୟ ସେଠାରେ ନିଜର ବ୍ୟବସାୟ, ଚାକିରି କରିବା ସହିତ ନାଗରିକତା ମଧ୍ୟ ହାସଲ କରିଥିବାର ସୂଚନା ରହିଛି। କିନ୍ତୁ ବର୍ତ୍ତମାନ ସମୟରେ ଅଧିକାଂଶ କୋଟିପତି ବର୍ତ୍ତମାନ ଦେଶ ଛାଡୁଥିବା ଦେଖିବାକୁ ମିଳିଛି। ବର୍ତ୍ତମାନ ସମୟରେ ଧନୀ ଲୋକଙ୍କ ପାଇଁ ବ୍ରିଟେନରେ ରହିବା କଷ୍ଟକର ହୋଇପଡୁଛି। ଦେଶର ପରିବର୍ତ୍ତନଶୀଳ ଟିକସ ନୀତି ଏବଂ ରାଜନୈତିକ ଅସ୍ଥିରତା ଯୋଗୁଁ କୋଟିପତିମାନେ ଦ୍ରୁତ ଗତିରେ ପ୍ରବାସ କରୁଛନ୍ତି। ସମ୍ପ୍ରତି, ନରୱେରେ ଜନ୍ମିତ ଏବଂ ବ୍ରିଟେନର ଶ୍ରେଷ୍ଠ ୧୦ ଧନୀ ବ୍ୟକ୍ତିଙ୍କ ମଧ୍ୟରୁ ଜଣେ ଜନ୍ ଫ୍ରେଡ୍ରିକ୍ସନ୍ ଲଣ୍ଡନରେ ତାଙ୍କର ବିଳାସପୂର୍ଣ୍ଣ ପ୍ରାସାଦ ବିକ୍ରି କରି ଦୁବାଇ ଯିବାକୁ ନିଷ୍ପତ୍ତି ନେଇଛନ୍ତି। ସେ ଖୋଲାଖୋଲି ଭାବରେ ବ୍ରିଟେନର ଅର୍ଥନୈତିକ ନୀତିକୁ ସମାଲୋଚନା କରି କହିଥିଲେ ଯେ "ବ୍ରିଟେନ ନର୍କ ପାଲଟିଛି"। ତାଙ୍କର ପ୍ରତିକ୍ରିୟା ପୁଣି ଥରେ ଧନୀ ଲୋକଙ୍କ ପ୍ରବାସ ପ୍ରସଙ୍ଗକୁ ଆଲୋଚନାକୁ ଆଣିଛି।

ଦୁବାଇରେ ରହିବାକୁ ଯୋଜନା
ଜନ୍ ଫ୍ରେଡ୍ରିକ୍ସନ୍ ଲଣ୍ଡନର 300 ବର୍ଷ ପୁରୁଣା ମାନ୍ସନ୍ ଦି ଓଲ୍ଡ ରେକ୍ଟୋରୀକୁ $337 ନିୟୁତ ବା ପ୍ରାୟ 2800 କୋଟି ଟଙ୍କାରେ ବିକ୍ରି କରିଛନ୍ତି। ଏହି ମାନ୍ସନ୍‌ରେ 10ଟି ଶୟନ କକ୍ଷ, ଏକ ବ୍ୟକ୍ତିଗତ ବଲରୁମ୍ ଏବଂ ଦୁଇ ଏକର ପରିମିତ ଏକ ବଗିଚା ରହିଛି। ଏବେ ସେ ତାଙ୍କର ଅଧିକାଂଶ ସମୟ ଦୁବାଇରେ ବିତାଇବେ ଏବଂ ସେଠାରୁ ତାଙ୍କର ବ୍ୟବସାୟିକ ସାମ୍ରାଜ୍ୟ ପରିଚାଳନା କରିବେ।

ବ୍ରିଟେନର ଟ୍ୟାକ୍ସ ନୀତିକୁ ନେଇ କ୍ଷୁବ୍ଧ ଧନୀବ୍ୟକ୍ତି
ଫ୍ରେଡ୍ରିକ୍ସନଙ୍କ ସମେତ ଅନେକ ଧନୀ ବ୍ୟକ୍ତି ବ୍ରିଟେନର ଟିକସ ନୀତିରେ ଅସନ୍ତୁଷ୍ଟ। 2025 ମସିହାରେ, ସରକାର ନନ୍-ଡୋମ୍ ଟିକସ ଛାଡ଼କୁ ଉଚ୍ଛେଦ କରିଦେଇଛନ୍ତି, ଯାହା ଫଳରେ 10 ବର୍ଷରୁ ଅଧିକ ସମୟ ଧରି ବ୍ରିଟେନରେ ରହୁଥିବା ବିଦେଶୀ ନାଗରିକମାନଙ୍କୁ ଏବେ ସେମାନଙ୍କର ସମଗ୍ର ବିଶ୍ୱ ସମ୍ପତ୍ତି ଉପରେ ଟିକସ ଦେବାକୁ ପଡିବ। ଏହା ବ୍ୟତୀତ, ପୁଞ୍ଜି ଲାଭ ଟିକସ ଏବଂ ଜାତୀୟ ବୀମା ମଧ୍ୟ ବୃଦ୍ଧି କରାଯାଇଛି।

୧୦ ହଜାରରୁ ଅଧିକ କୋଟିପତି ଛାଡ଼ିଲେଣି ଦେଶ
୨୦୨୪ ମସିହାରେ ପ୍ରାୟ ୧୦,୮୦୦ କୋଟିପତି ବ୍ରିଟେନ ଛାଡିଥିବା ନେଇ ରିପୋର୍ଟରୁ ଜଣାଯାଏ। ଯାହା ଗତ ବର୍ଷ ତୁଳନାରେ ୧୫୭ ପ୍ରତିଶତ ଅଧିକ। NDTV ର ଏକ ରିପୋର୍ଟ ଅନୁଯାୟୀ, ୨୦୨୫ ମସିହାରେ ଏହି ସଂଖ୍ୟା ୧୬,୫୦୦ କୁ ବୃଦ୍ଧି ପାଇପାରେ। ଏହା ଦେଶରୁ ପ୍ରାୟ ୬୬ ବିଲିୟନ ପାଉଣ୍ଡ ମୂଲ୍ୟର ସମ୍ପତ୍ତି ନେଇଯିବ। ଏକଦା ବିଶ୍ୱର ଆର୍ଥିକ ରାଜଧାନୀ ଭାବରେ ବିବେଚିତ ଲଣ୍ଡନ ୨୦୧୪ ପରଠାରୁ ୩୦ ହଜାର କୋଟିପତିଙ୍କୁ ହରାଇଛି। ବ୍ରେକ୍ସିଟ୍, ଦୁର୍ବଳ ପାଉଣ୍ଡ ଏବଂ ଲଣ୍ଡନ ଷ୍ଟକ୍ ଏକ୍ସଚେଞ୍ଜର ମୂଲ୍ୟ ହ୍ରାସ ଯୋଗୁଁ, ଧନୀ ନିବେଶକମାନେ ଏବେ ପ୍ୟାରିସ, ଦୁବାଇ ଏବଂ ଆମଷ୍ଟରଡାମ ଭଳି ସହର ଆଡକୁ ମୁହାଁଇଛନ୍ତି।