HeatWave: କଲବଲ କରୁଛି ତାତି, ଦିଲ୍ଲୀରେ ୪୫ ପଞ୍ଜାବ ଓ ରାଜସ୍ଥାନରେ ୪୭ ଡିଗ୍ରୀ ଡେଇଁଲା ପାରଦ

HeatWave: ମଙ୍ଗଳବାର ଦିଲ୍ଲୀ ସଫଦରଜଙ୍ଗରେ ୪୩.୮ ଡିଗ୍ରୀ ସେଲସିୟସ୍, ପାଲମରେ ୪୪.୬ ଡିଗ୍ରୀ ସେଲସିୟସ୍ , ଲୋଧି ରୋଡରେ ୪୩.୬ ଡିଗ୍ରୀ ସେଲସିୟସ୍, ରିଜ୍ ଅଞ୍ଚଳ ୪୫.୦ ଡିଗ୍ରୀ ସେଲସିୟସ୍ ଏବଂ ଆୟନଗରରେ ୪୫.୫ ଡିଗ୍ରୀ ସେଲସିୟସ୍ ସର୍ବୋଚ୍ଚ ତାପମାତ୍ରା ରେକର୍ଡ କରାଯାଇଛି। ଆଇଏମଡି ଅନୁଯାୟୀ, ଦିଲ୍ଲୀରେ କେବଳ ଦିନବେଳା ତାପମାତ୍ରା ଅସହ୍ୟ ନୁହେଁ, ବରଂ ରାତିରେ ମଧ୍ୟ ତାପମାତ୍ରା ସ୍ୱାଭାବିକଠାରୁ ଅଧିକ ରହୁଛି ।

HeatWave: ଉତ୍ତର ଭାରତରେ ପ୍ରବଳ ଗ୍ରୀଷ୍ମ ପ୍ରବାହ ଜନ ଜୀବନକୁ ଖରାପ ବେଶ୍ ପ୍ରଭାବିତ କରିଛି। ମଙ୍ଗଳବାର ଦିନ, ଦିଲ୍ଲୀର ଆୟନଗରରେ ସର୍ବାଧିକ ତାପମାତ୍ରା ୪୫.୫ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି । ଭାରତୀୟ ପାଣିପାଗ ବିଭାଗ (IMD) କହିଛି ଯେ, ରବିବାର ଠାରୁ ତାପମାତ୍ରା କ୍ରମାଗତ ଭାବରେ ବୃଦ୍ଧି ପାଇବାରେ ଲାଗିଛି । ଆଗାମୀ ତିନି ଦିନ ପର୍ଯ୍ୟନ୍ତ ପରିସ୍ଥିତି ସମାନ ରହିବ ବୋଲି ଆକଳନ କରାଯାଇଛି ।

୧୦ ଜୁନ ମଙ୍ଗଳବାର ଦିଲ୍ଲୀ ସଫଦରଜଙ୍ଗରେ ୪୩.୮ ଡିଗ୍ରୀ ସେଲସିୟସ୍, ପାଲମରେ ୪୪.୬ ଡିଗ୍ରୀ ସେଲସିୟସ୍ , ଲୋଧି ରୋଡରେ ୪୩.୬ ଡିଗ୍ରୀ ସେଲସିୟସ୍, ରିଜ୍ ଅଞ୍ଚଳ ୪୫.୦ ଡିଗ୍ରୀ ସେଲସିୟସ୍ ଏବଂ ଆୟନଗରରେ ୪୫.୫ ଡିଗ୍ରୀ ସେଲସିୟସ୍ ସର୍ବୋଚ୍ଚ ତାପମାତ୍ରା ରେକର୍ଡ କରାଯାଇଛି। ଆଇଏମଡି ଅନୁଯାୟୀ, ଦିଲ୍ଲୀରେ କେବଳ ଦିନବେଳା ତାପମାତ୍ରା ଅସହ୍ୟ ନୁହେଁ, ବରଂ ରାତିରେ ମଧ୍ୟ ତାପମାତ୍ରା ସ୍ୱାଭାବିକଠାରୁ ଅଧିକ ରହୁଛି ।

ସେହିପରି ପଞ୍ଜାବ, ହରିୟାଣା ଏବଂ ରାଜସ୍ଥାନରେ ପରିସ୍ଥିତି ଗମ୍ଭୀର ହୋଇଛି। ଉତ୍ତର ଭାରତର ଅନ୍ୟ ରାଜ୍ୟ ଗୁଡିକରେ ମଧ୍ୟ ଗ୍ରୀଷ୍ମପ୍ରବାହ ଜାରି ରହିଛି। ପଞ୍ଜାବର ଭଟିଣ୍ଡାରେ ତାପମାତ୍ରା ୪୭.୬ ଡିଗ୍ରୀ ସେଲସିୟସ୍ ଛୁଇଁଛି । ଯାହାକୁ ଆଇଏମଡି ଏକ ଗମ୍ଭୀର ଗ୍ରୀଷ୍ମପ୍ରବାହ ପରିସ୍ଥିତି ଭାବରେ ଘୋଷଣା କରିଛି। ପଶ୍ଚିମ ରାଜସ୍ଥାନର ଶ୍ରୀ ଗଙ୍ଗାନଗରରେ ତାପମାତ୍ରା ୪୭.୪ ଡିଗ୍ରୀ ସେଲସିୟସ୍ ଏବଂ ପୂର୍ବ ରାଜସ୍ଥାନର କୋଟାରେ ୪୬.୩ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି। ହରିୟାଣାର ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି । ସିରସାରେ ୪୬.୨ ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ କରାଯାଇଥିଲା ।

ଉତ୍ତର, ପୂର୍ବ ଏବଂ ମଧ୍ୟ ଭାରତରେ ପ୍ରବଳ ଗ୍ରୀଷ୍ମ ପ୍ରବାହ କାରଣରୁ ଜନଜୀବନ ପ୍ରଭାବିତ ହୋଇଛି । ଦିଲ୍ଲୀ, ଉତ୍ତର ପ୍ରଦେଶ, ବିହାର, ଝାଡ଼ଖଣ୍ଡ, ଓଡ଼ିଶା, ମଧ୍ୟ ପ୍ରଦେଶ, ଛତିଶଗଡ଼ ଏବଂ ରାଜସ୍ଥାନ ଭଳି ବିଭିନ୍ନ ରାଜ୍ୟରେ ୪୪ ରୁ ୪୭ ଡିଗ୍ରୀ ସେଲସିୟସ୍ ମଧ୍ୟରେ ତାପମାତ୍ରା ରେକର୍ଡ କରାଯାଉଛି।

ପାଣିପାଗ ବିଜ୍ଞାନୀଙ୍କ ଅନୁଯାୟୀ, ଆଗାମୀ ତିନି ଦିନ ପର୍ଯ୍ୟନ୍ତ ବିଭିନ୍ନ ଅଞ୍ଚଳରେ ଏପରି ଗ୍ରୀଷ୍ମ ଜାରି ରହିବ। ଏହି ସମୟ ମଧ୍ୟରେ, ଅନେକ ସ୍ଥାନରେ ଗ୍ରୀଷ୍ମ ପ୍ରବାହର ତୀବ୍ରତା ଆହୁରି ବଢିପାରେ । ଆଶ୍ୱସ୍ତିର କଥା ଏହା ଯେ, ଏହା ପରେ, ତାପମାତ୍ରାରେ ୨ ରୁ ୪ ଡିଗ୍ରୀ ସେଲସିୟସ୍ ହ୍ରାସ ହୋଇପାରେ ।

ଆଇଏମଡି ପାଣିପାଗ ବିଜ୍ଞାନିକ ନରେଶ କୁମାରଙ୍କ କହିବାନୁଯାୟୀ, "ଗତ କିଛି ଦିନ ମଧ୍ୟରେ ଦେଶର ଅନେକ ସ୍ଥାନରେ ବର୍ଷା ହ୍ରାସ ଘଟିଛି। ଏହା ସହିତ, ଉତ୍ତର-ପଶ୍ଚିମ ଭାରତରେ ଆଣ୍ଟି-ସାଇକ୍ଲୋନିକ୍ ସର୍କୁଲେସନ୍ ସୃଷ୍ଟି ହେବା କାରଣରୁ ତାପମାତ୍ରା ୪୫ ଡିଗ୍ରୀ ସେଲସିୟସ୍ ଉପରେ ପହଞ୍ଚିଛି। ପଞ୍ଜାବ, ହରିୟାଣା, ଉତ୍ତର ପ୍ରଦେଶ, ଉତ୍ତର ମଧ୍ୟ ପ୍ରଦେଶ ଏବଂ ରାଜସ୍ଥାନରେ ହିଟ୍‌ୱେଭ୍ ପରିସ୍ଥିତି ଜାରି ରହିଛି।"

ଆଇଏମଡି ପକ୍ଷରୁ ଅନେକ ରାଜ୍ୟ ପାଇଁ ଭୟଙ୍କର ହିଟ୍‌ୱେଭ୍‌ ଆଲର୍ଟ ଜାରି କରାଯାଇଛି। ପ୍ରବଳ ଗରମ କାରଣରୁ ରାଜସ୍ଥାନରେ ରେଡ୍ ଆଲର୍ଟ ଜାରି କରାଯାଇଛି। ଆଇଏମଡି ଅନୁଯାୟୀ, ଉତ୍ତର ଭାରତରେ ଆଗାମୀ ତିନି ଦିନ ପର୍ଯ୍ୟନ୍ତ ଗ୍ରୀଷ୍ମ ଲହରୀ ଜାରି ରହିବ। ତଥାପି, କିଛି ଅଞ୍ଚଳରେ ହାଲୁକା ବର୍ଷା ହେବାର ସମ୍ଭାବନା ରହିଛି । ଯାହା ତାପମାତ୍ରାକୁ ସାମାନ୍ୟ ହ୍ରାସ କରିପାରେ। ପାଣିପାଗ ବିଭାଗ ସ୍ପଷ୍ଟ କରିଛି ଯେ, ଏପର୍ଯ୍ୟନ୍ତ ବଡ଼ ଧରଣର ଆଶ୍ୱସ୍ତି ଆଶା କରାଯାଇ ନାହିଁ।

ଆସନ୍ତା ତିନି ଦିନ ପର୍ଯ୍ୟନ୍ତ ପଞ୍ଜାବ ଏବଂ ହରିୟାଣାରେ ଅରେଞ୍ଜ ଆଲର୍ଟ ଜାରି କରାଯାଇଛି । ଜମ୍ମୁ-କାଶ୍ମୀର ଏବଂ ହିମାଚଳ ପ୍ରଦେଶରେ ମଧ୍ୟ ତିନି ଦିନ ପାଇଁ ଚେତାବନୀ ଜାରି କରାଯାଇଛି। ଆଇଏମଡି ସତର୍କ କରିଛି ଯେ, ଏହି ଅଞ୍ଚଳଗୁଡ଼ିକରେ ଦିନ ଏବଂ ରାତି ଉଭୟ ସମୟରେ ତାପମାତ୍ରା ଅଧିକ ରହିବ । ଯେଉଁ କାରଣରୁ ଲୋକମାନଙ୍କୁ ବିଶେଷ ସତର୍କତା ଅବଲମ୍ବନ କରିବାକୁ ପଡିବ।

ପ୍ରଚଣ୍ଡ ଗରମ କାରଣରୁ ଲୋକମାନେ ଘରେ ରହିବାକୁ ବାଧ୍ୟ ହେଉଛନ୍ତି। ଦିନ ସମୟରେ ବଜାରରେ ଭିଡ଼ କମିଯାଉଛି । ଲୋକମାନେ ଗରମରୁ ରକ୍ଷା ପାଇବା ପାଇଁ ଥଣ୍ଡା ପାନୀୟ ଏବଂ ଏୟାର କଣ୍ଡିସନର ବ୍ୟବହାର କରୁଛନ୍ତି। ବିଶେଷଜ୍ଞମାନେ ପରାମର୍ଶ ଦେଇଛନ୍ତି ଯେ, ଜରୁରୀ କାର୍ଯ୍ୟ ନଥିଲେ ଦିନ ୧୨ ଟାରୁ ୩ ଟା ମଧ୍ୟରେ ବାହାରକୁ ଯାଆନ୍ତୁ ନାହିଁ । ପର୍ଯ୍ୟାପ୍ତ ପାଣି ପିଇବା ଏବଂ ହାଲୁକା ରଙ୍ଗର ପୋଷାକ ପିନ୍ଧିବା ପାଇଁ ପରାମର୍ଶ ଦିଆଯାଇଛି ।