Bhagawant Mann: 'ଗୋଟିଏ ଦେଶ, ଗୋଟିଏ ସ୍ୱାମୀ' ମନ୍ତବ୍ୟ ଦେଇ ବିବାଦରେ ପଞ୍ଜାବ ମୁଖ୍ୟମନ୍ତ୍ରୀ

Bhagawant Mann: ନୂଆଦିଲ୍ଲୀ: ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ଅପରେସନ ସିନ୍ଦୁର ଉପରେ ଦେଇଥିବା ମନ୍ତବ୍ୟକୁ ବିଜେପି କଡ଼ା ନିନ୍ଦା କରିଛି। ବିଜେପି ଦାବି କରିଛି ଯେ ମୁଖ୍ୟମନ୍ତ୍ରୀ ମାନ ତାଙ୍କ ବୟାନ ପାଇଁ କ୍ଷମା ପ୍ରାର୍ଥନା କରନ୍ତୁ ଏବଂ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦିଅନ୍ତୁ। ବିଜେପି ନେତାମାନେ ଭଗବନ୍ତ ମାନଙ୍କ ବୟାନକୁ ଦାୟିତ୍ୱହୀନ ଏବଂ ଆପତ୍ତିଜନକ ବୋଲି କହିଛନ୍ତି। ଦଳ କହିଛି ଯେ ଏକ ଗୁରୁତ୍ୱପୂର୍ଣ୍ଣ ସୁରକ୍ଷା ଅପରେସନ ସିନ୍ଦୁର ଉପରେ ପଞ୍ଜାବ ମୁଖ୍ୟମନ୍ତ୍ରୀଙ୍କ ମନ୍ତବ୍ୟ କେବଳ ଅନୁପଯୁକ୍ତ ନୁହେଁ ବରଂ ଜାତୀୟ ସ୍ୱାର୍ଥ ବିରୁଦ୍ଧ ମଧ୍ୟ। ବିଜେପି ଏହାକୁ ପଞ୍ଜାବ ସରକାରଙ୍କ ବିଫଳତା ଏବଂ ସମ୍ବେଦନହୀନତାର ପ୍ରତୀକ ବୋଲି କହିଛି।

ଭଗୱନ୍ତ ମାନଙ୍କ ବିବାଦୀୟ ବୟାନ
ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ ବିଜେପି ଘର ଘର ଯାଇ ସିନ୍ଦୁର ବାଣ୍ଟିବ। ସେ କହିଥିଲେ, ଆପଣ ମୋଦିଙ୍କ ନାମରେ ସିନ୍ଦୁର ଲଗାଇବେ କି? ଏହା କ'ଣ 'ଏକ ରାଷ୍ଟ୍ର, ଏକ ସ୍ୱାମୀ' ଯୋଜନା ? ଏ ସମ୍ପର୍କରେ ପଞ୍ଜାବ ବିଜେପି ମୁଖପାତ୍ର ପ୍ରୀତପାଲ ସିଂହ ବାଲିୱାଲ କହିଛନ୍ତି, "ଭଗବନ୍ତ ମାନଙ୍କର ଏହି ବକ୍ତବ୍ୟ ଅତ୍ୟନ୍ତ ନିନ୍ଦନୀୟ। ତାଙ୍କୁ ତୁରନ୍ତ କ୍ଷମା ମାଗିବା ଉଚିତ ଏବଂ ତାଙ୍କ ଦାୟିତ୍ୱରୁ ଇସ୍ତଫା ଦେବା ଉଚିତ।" ଦଳ ଏହା ମଧ୍ୟ ଦାବି କରିଛି ଯେ ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ପଞ୍ଜାବର ଜନସାଧାରଣ ଏବଂ ସୁରକ୍ଷା ବାହିନୀକୁ ଅପମାନିତ କରୁଛି। ବିଜେପି ମୁଖପାତ୍ର ଟ୍ୱିଟରରେ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ବିବାଦୀୟ ବୟାନର ଏକ କ୍ଲିପ୍ ମଧ୍ୟ ପୋଷ୍ଟ କରିଛନ୍ତି।

ବିଜେପି ପଞ୍ଜାବ ସରକାରଙ୍କୁ ଟାର୍ଗେଟ କରି କହିଛି ଯେ ଆମ ଆଦମୀ ପାର୍ଟି (ଆପ) ସରକାର ନିଜର ଭୁଲ ନୀତି ଏବଂ ବୟାନ ଦ୍ୱାରା ରାଜ୍ୟର ପ୍ରତିଛବିକୁ ବାରମ୍ବାର କ୍ଷତି ପହଞ୍ଚାଇଛି। ଦଳ ଏହି ମାମଲାରେ କେନ୍ଦ୍ର ସରକାରଙ୍କୁ ହସ୍ତକ୍ଷେପ କରିବାକୁ ମଧ୍ୟ ଦାବି କରିଛି। ବିଜେପି ଦାବି କରିଛି ଯେ ଭଗବନ୍ତ ମାନଙ୍କ ବୟାନର ତଦନ୍ତ କରାଯାଉ। ତାଙ୍କ ବିରୁଦ୍ଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଦଳ କହିଛି ଯେ ଏପରି ବୟାନ ଦେଶର ଏକତା ଏବଂ ଅଖଣ୍ଡତା ପାଇଁ ବିପଦ ସୃଷ୍ଟି କରିପାରେ।