India vs England: ଲିଡ୍ସର ହେଡିଂଲି ଗ୍ରାଉଣ୍ଡରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ରେ ଟିମ୍ ଇଣ୍ଡିଆକୁ ଏକ ବଡ଼ ପରାଜୟର ସାମ୍ନା କରିବାକୁ ପଡ଼ିଛି। ଏହି ମ୍ୟାଚ୍ରେ ଭାରତୀୟ ବ୍ୟାଟ୍ସମ୍ୟାନମାନେ ଚମତ୍କାର ପ୍ରଦର୍ଶନ କରିଥିଲେ ଏବଂ ପ୍ରଥମ ଓ ଦ୍ୱିତୀୟ ଇନିଂସରେ ମୋଟ ୫ଟି ଶତକ ହାସଲ କରିଥିଲେ। ଏହା ସତ୍ତ୍ୱେ ଟିମ୍ ଇଣ୍ଡିଆ ମ୍ୟାଚ୍ ବଞ୍ଚାଇବାରେ ବିଫଳ ହୋଇଥିଲା। ଚତୁର୍ଥ ଇନିଂସରେ ୩୭୧ ରନ୍ର ଏକ ବିଶାଳ ଲକ୍ଷ୍ୟ ହାସଲ କରି ଇଂଲଣ୍ଡ ଟେଷ୍ଟ କ୍ରିକେଟ୍ରେ ଇତିହାସ ସୃଷ୍ଟି କରିଛି। ଶେଷ ଦିନରେ ଇଂଲଣ୍ଡ ୩୫୨ ରନ୍ କରି ବିଜୟୀ ହୋଇଥିଲା। ଡନ୍ ବ୍ରାଡମ୍ୟାନଙ୍କ ନେତୃତ୍ୱରେ ଅଷ୍ଟ୍ରେଲିଆ ୧୯୪୮ ମସିହାରେ ହେଡିଂଲିରେ ଇଂଲଣ୍ଡ ବିପକ୍ଷରେ ଶେଷ ଦିନରେ ୪୦୪ ରନ୍ କରିଥିଲା।
ପ୍ରଥମ ଇନିଂସରେ ଯଶସ୍ୱୀ ଜୟସ୍ୱାଲ, ଅଧିନାୟକ ଶୁବମନ ଗିଲ ଏବଂ ରିଷଭ ପନ୍ତ ଉତ୍କୃଷ୍ଟ ଶତକ ହାସଲ କରିଥିଲେ। ଜୟସ୍ୱାଲ ୧୦୧, ଗିଲ ୧୪୭ ଏବଂ ପନ୍ତ ୧୩୪ ରନ କରିଥିଲେ। କେଏଲ ରାହୁଲ (୧୩୭) ଏବଂ ରିଷଭ ପନ୍ତ (୧୧୮) ଦ୍ୱିତୀୟ ଇନିଂସରେ ମଧ୍ୟ ଭଲ ପ୍ରଦର୍ଶନ କରିଥିଲେ। ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ପ୍ରଥମ ଥର ପାଇଁ ଭାରତ ଏକ ଟେଷ୍ଟ ମ୍ୟାଚ୍ରେ ମୋଟ ୫ଟି ଶତକ ହାସଲ କରିଥିଲା ଏବଂ ତଥାପି ଦଳ ହାରି ଯାଇଛି। ଟେଷ୍ଟ କ୍ରିକେଟ୍ ଇତିହାସରେ ଏହା ପ୍ରଥମ ଥର ଘଟିଛି ଯେ ୫ଟି ଶତକ ସତ୍ତ୍ୱେ କୌଣସି ଦଳକୁ ଟେଷ୍ଟ ମ୍ୟାଚ୍ରେ ପରାଜୟର ସମ୍ମୁଖୀନ ହେବାକୁ ପଡ଼ିଛି। ଯଦିଓ ଟିମ୍ ଇଣ୍ଡିଆ ମ୍ୟାଚ୍ରେ ଉଭୟ ଇନିଂସରେ ବଡ଼ ଅଗ୍ରଣୀ ନେଇ ଇଂଲଣ୍ଡ ସମ୍ମୁଖରେ ୩୭୧ ରନର ଲକ୍ଷ୍ୟ ଧାର୍ଯ୍ୟ କରିଥିଲା। ତଥାପି ଭାରତୀୟ ବୋଲରମାନେ ଏହି ବଡ଼ ସ୍କୋରକୁ ରକ୍ଷା କରିପାରି ନଥିଲେ।
ଇଂଲଣ୍ଡ ୩୭୧ ରନର ଟାର୍ଗେଟ ୫ ୱିକେଟ୍ ହାତରେ ରଖି ହାସଲ କରି ନେଇଥିଲା। ଯାହା ଭାରତ ବିପକ୍ଷରେ ଚତୁର୍ଥ ଇନିଂସରେ ଟେଷ୍ଟ ଇତିହାସର ଦ୍ୱିତୀୟ ସର୍ବାଧିକ ସଫଳ ରନ ଚେଜ୍। ପୂର୍ବରୁ ୨୦୨୨ ମସିହାରେ ଇଂଲଣ୍ଡ ବର୍ମିଂହାମରେ ୩୭୮ ରନର ଟାର୍ଗେଟ ହାସଲ କରିଥିଲା କିନ୍ତୁ ଏଥର ଲିଡ୍ସରେ ୩୭୧ ରନର ପିଛା କରିବା ମଧ୍ୟ ଐତିହାସିକ ଥିଲା।
ଲିଡ୍ସ ଟେଷ୍ଟରେ ଜସପ୍ରିତ ବୁମରାହଙ୍କୁ ଛାଡି ଟିମ୍ ଇଣ୍ଡିଆର ଅନ୍ୟ ସମସ୍ତ ବୋଲରମାନେ ବହୁତ ନିରାଶ କରିଥିଲେ। ପ୍ରସିଦ୍ଧ କ୍ରୀଷ୍ଣା, ମହମ୍ମଦ ସିରାଜ ଓ ଶାର୍ଦ୍ଦୁଳ ଠାକୁର ଇଂଲିସ୍ ବ୍ୟାଟସମ୍ୟାନଙ୍କ ଉପରେ ଚାପ ପକାଇ ପାରିନଥିଲେ। ବୁମ୍ରା ପ୍ରଥମ ଇନିଂସରେ ଇଂଲଣ୍ଡ ଦଳର ଅଧା ଖେଳାଳିଙ୍କୁ ପ୍ୟାଭିଲିୟନ ପଠାଇଥିଲେ କିନ୍ତୁ ଦ୍ୱିତୀୟ ଇନିଂସରେ ୧୯ ଓଭର ବୋଲିଂ କରିବା ସତ୍ତ୍ୱେ କୌଣସି ୱିକେଟ୍ ପାଇ ନ ଥିଲେ। ଦ୍ୱିତୀୟ ଇନିଂସରେ ଶାର୍ଦ୍ଦୁଳ ଠାକୁର ଏବଂ ପ୍ରସିଦ୍ଧ କ୍ରୀଷ୍ଣା ୨ଟି ଲେଖାଁଏ ୱିକେଟ୍ ନେଇଥିଲେ। କିନ୍ତୁ ଇଂଲଣ୍ଡକୁ ବିଜୟକୁ ରୋକିପାରି ନ ଥିଲେ।
Newsletter
