Odisha Student Union Elections: ଛାତ୍ର ସଂସଦ ନିର୍ବାଚନକୁ ନେଇ ଆସିଲା ବଡ଼ ଅପଡେଟ୍

Odisha Student Union Elections: ଉଚ୍ଚଶିକ୍ଷା ବିଭାଗ ସେପ୍ଟେମ୍ବର ୨୫ କିମ୍ବା ୨୬ ତାରିଖରେ କଲେଜ ଏବଂ ବିଶ୍ୱବିଦ୍ୟାଳୟଗୁଡ଼ିକରେ ଛାତ୍ର ସଂସଦ ନିର୍ବାଚନ କରିବାକୁ ଯୋଜନା କରୁଛି। ଯଦିଓ ଏହା ନେଇ ଏପର୍ଯ୍ୟନ୍ତ ଅଫସିଆଲ୍ ବିଜ୍ଞପ୍ତି ପ୍ରକାଶିତ ହୋଇନାହିଁ। ଖବର ଅନୁଯାୟୀ ସେପ୍ଟେମ୍ବର ୧୫ କିମ୍ବା ୧୬ ତାରିଖରେ ପ୍ରତିଷ୍ଠାନ ସ୍ତରରେ ନିର୍ବାଚନ ବିଜ୍ଞପ୍ତି ଜାରି କରାଯିବ। ସମ୍ପୂର୍ଣ୍ଣ ନିର୍ବାଚନ ପ୍ରକ୍ରିୟା ଲିଙ୍ଗଡୋ କମିଶନଙ୍କ ନିର୍ଦ୍ଦେଶାବଳୀ ଅନୁସାରେ ହେବ ବୋଲି କୁହାଯାଉଛି।

୧୭ କିମ୍ବା ୧୮ ସେପ୍ଟେମ୍ବର ସକାଳ ୯ଟାରୁ ୧୨ଟା ପର୍ଯ୍ୟନ୍ତ ନାମାଙ୍କନ ଦାଖଲ କରିବା ସମୟ ରହିବ। ଏହାପରେ ସେହି ଦିନ ଅପରାହ୍ନ ୨ଟାରୁ ୪ଟା ମଧ୍ୟରେ ନାମାଙ୍କନ ପତ୍ର ଯାଞ୍ଚ କରାଯିବ। ୧୮ କିମ୍ବା ୧୯ ସେପ୍ଟେମ୍ବର ସକାଳ ୧୧ଟା ସୁଦ୍ଧା ଯୋଗ୍ୟ ପ୍ରାର୍ଥୀଙ୍କ ତାଲିକା ପ୍ରକାଶିତ ହେବ ଏବଂ ପ୍ରାର୍ଥୀମାନେ ଅପରାହ୍ନ ୨ଟାରୁ ୪ଟା ମଧ୍ୟରେ ସେମାନଙ୍କର ନାମାଙ୍କନ ପ୍ରତ୍ୟାହାର କରିପାରିବେ। ଅପରାହ୍ନ ୫ଟାରେ ଚୂଡ଼ାନ୍ତ ପ୍ରାର୍ଥୀଙ୍କ ତାଲିକା ପ୍ରକାଶିତ ହେବ।

ନିର୍ବାଚନ ପୂର୍ବରୁ ସେପ୍ଟେମ୍ବର ୨୪ କିମ୍ବା ୨୫ ତାରିଖରେ କଲେଜ ଏବଂ ବିଶ୍ୱବିଦ୍ୟାଳୟ କ୍ୟାମ୍ପସରେ “What I Stand For?" ବୈଠକ ଅନୁଷ୍ଠିତ ହେବ। ସେପ୍ଟେମ୍ବର ୨୫ କିମ୍ବା ୨୬ ତାରିଖ ସକାଳ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ମତଦାନ ହେବାର ସମ୍ଭାବନା ଅଛି ଏବଂ ଭୋଟ ଗଣତି ତୁରନ୍ତ ଅପରାହ୍ନ ୨ଟାରେ ଆରମ୍ଭ ହେବ। ସନ୍ଧ୍ୟା ସୁଦ୍ଧା ଫଳାଫଳ ଘୋଷଣା କରାଯିବ ଏବଂ ସେପ୍ଟେମ୍ବର ୨୬ କିମ୍ବା ୨୭ ତାରିଖ ସକାଳ ୧୧ଟାରେ ଶପଥ ଗ୍ରହଣ ସମାରୋହ ସ୍ଥିର କରାଯାଇଛି। ଯାହା ପରେ ଦଶହରା ଛୁଟି ଘୋଷଣା କରାଯିବ।

କ୍ୟାମ୍ପସରେ ମୁଦ୍ରିତ ପୋଷ୍ଟର, ଲାଉଡସ୍ପିକର, ଯାନବାହାନ, ପଶୁପକ୍ଷୀ ଏବଂ ସାଧାରଣ ସଭା ବ୍ୟବହାର ନିଷେଧ ରହିବ। ଶିକ୍ଷାନୁଷ୍ଠାନଗୁଡ଼ିକ ପ୍ରଚାର ବ୍ୟାନର ପାଇଁ ନିର୍ଦ୍ଦିଷ୍ଟ ସ୍ଥାନ ବଣ୍ଟନ କରିବେ ଏବଂ ଶାନ୍ତିପୂର୍ଣ୍ଣ ନିର୍ବାଚନ ପ୍ରକ୍ରିୟା ସୁନିଶ୍ଚିତ କରିବା ପାଇଁ ପୋଲିସ ସହାୟତା ନିଆଯିବ। ଯଦି କୌଣସି ବିଶୃଙ୍ଖଳା ଦେଖାଯାଏ ତେବେ କର୍ତ୍ତୃପକ୍ଷଙ୍କ ମଧ୍ୟ ନିର୍ବାଚନ ବାତିଲ କରିବାର ଅଧିକାର ଅଛି।