ବୈତରଣୀରେ ବନ୍ୟା ଜଳ ହ୍ରାସ, ଅନ୍ୟ ସ୍ଥାନରେ ତଦାରଖ କରୁଛନ୍ତି ମନ୍ତ୍ରୀ

ଭୁବନେଶ୍ୱର: ​ବୈତରଣୀ ନଦୀରେ ବନ୍ୟା ଜଳ ହ୍ରାସ ପାଉଛି । ଆନନ୍ଦପୁର ଠାରେ ଜଳ ସ୍ତର ୩୫.୭୮ ମିଟର ରହିଥିଲା ଯାହା ବର୍ତ୍ତମାନ ଏହା ହ୍ରାସ ​ପାଉଥିବା ଜଣାଯାଉଛି । ଏଠାରେ ବିପଦ ସଂକେତ ସ୍ତର ୩୮.୩୬ ମିଟର । ସେହିପରି, ​ଆଖୁଆପଦା ଠାରେ ଜଳସ୍ତର ୧୮. ୫୪ ମିଟର ରହିଛି ଓ ଏହା ହ୍ରାସ ପାଉଥିବା ସ୍ଥିତିରେ ଅଛି । ​ଏଠାରେ ବିପଦ ସଂକେତ ସ୍ତର ୧୮. ୩୩ ମିଟର । 

ସେହିପରି ଜଳକା ନଦୀରେ ମଥାନୀ ଠାରେ ଜଳସ୍ତର ୬.୬୭ ମିଟରରେ ରହିଥିଲା ଓ ଏଠାରେ ଜଳପ୍ରବାହ ​କ୍ରମାଗତ ହ୍ରାସ ପାଉଥିବା ପରିଲକ୍ଷିତ ହେଉଛି । ଏଠାରେ ବିପଦ ସଂକେତ ସ୍ତର ୬.୫୦ ​ମିଟର ।

ସୁବର୍ଣ୍ଣରେଖା ନଦୀର ଜାମଶୋଳା ଘାଟ ଠାରେ ଜଳସ୍ତର ୫୧.୬ ମିଟର ରହିଛି ଓ ଏଠାରେ ​ଜଳପ୍ରବାହ ହ୍ରାସ ପାଉଥିବା ଜଣାଯାଉଛି । ଏଠାରେ ବିପଦ ସଂକେତ ସ୍ତର ୪୯ . ୧୬ ମିଟର । ​ସେହିପରି ରାଜଘାଟ ଠାରେ ଜଳ ସ୍ତର ୧୦.୨୦ ମିଟର ରହିଛି ଓ ଏହା ବୃଦ୍ଧି ପାଉଥିବା ଲକ୍ଷ୍ୟ ​କରାଯାଉଛି । ଏହାର, ​ବିପଦ ସଂକେତ ସ୍ତର ୧୦. ୩୬ ମିଟର । ଏହି ପରିପ୍ରେକ୍ଷୀରେ ​୨୭.୦୭.୨୦୨୫  ରାତି ୯ ଟା ସୁଦ୍ଧା ସୁବର୍ଣ୍ଣରେଖା ନଦୀରେ ସର୍ବୋଚ୍ଚ ଜଳସ୍ତର ୧୧ . ୪୦ ​ମିଟର ​ପର୍ଯ୍ୟନ୍ତ ବୃଦ୍ଧି ପାଇପାର ଆକଳନ କରାଯାଇଛି ।

ଜଳସମ୍ପଦ ବିଭାଗର ରାଜ୍ୟ ବନ୍ୟା ନିୟନ୍ତ୍ରଣ କକ୍ଷ ଚବିଶ ଘଣ୍ଟିଆ( ୨ ୪ X୭ ) କାର୍ଯ୍ୟରତ ଅଛି ଓ ​ସ୍ଥିତି ଉପରେ ନିକଟରୁ ନିରୀକ୍ଷଣ କରାଯାଉଛି ।

ଯାଜପୁର, ଭଦ୍ରକ ଓ ବାଲେଶ୍ୱର ଜିଲ୍ଲାପାଳମାନଙ୍କୁ ଯେଉଁଠି ଆବଶ୍ୟକ, ସ୍ଥାନୀୟ ବନ୍ୟା ସ୍ଥିତିକୁ ​ଦେଖି ତଳିଆ ଅଞ୍ଚଳର ଲୋକମାନଙ୍କୁ ଶୀଘ୍ର ନିରାପଦ ଉଚ୍ଚସ୍ଥାନକୁ ସ୍ଥାନାନ୍ତରଣ ଓ ରିଲିଫ କାର୍ଯ୍ୟ ​ପରିଚାଳନା କରିବାକୁ ସତର୍କ କରାଯାଇଛି ।

​ମୁଖ୍ୟ ଯନ୍ତ୍ରୀ ତଥା ଅବବାହିକା ପରିଚାଳକ (ଚିଫ୍ ଇଞ୍ଜିନିୟର ତଥା ବେସିନ୍ ମ୍ୟାନେଜର)- ​ସୁବର୍ଣ୍ଣରେଖା ଓ ବୁଢ଼ାବଳଙ୍ଗ ବେସିନ୍), ମହାନଦୀ-ବ୍ରାହ୍ମଣୀ-ବୈତରଣୀ ସିଷ୍ଟମର ଚିଫ୍ ଇଞ୍ଜିନିୟର ​ତଥା ବେସିନ୍ ମ୍ୟାନେଜର, ମୁଖ୍ୟ ଯନ୍ତ୍ରୀ ଓ ବେସିନ୍ ମ୍ୟାନେଜର ,ବୈତରଣୀ ବେସିନ୍ ​କ୍ଷେତ୍ରସ୍ତରରେ ଜିଲ୍ଲା ପ୍ରଶାସନ ସହିତ ସମନ୍ୱୟ ରଖି ବନ୍ୟାସ୍ଥିତି ତଦାରଖ କରୁଛନ୍ତି ।

ସୁବର୍ଣ୍ଣରେଖା ଓ ବୈତରଣୀରେ ଜଳସ୍ତର ବୃଦ୍ଧିପାଉଥିବାକୁ ଦୃଷ୍ଟିରେ ରଖି ଜଳ ସମ୍ପଦ ବିଭାଗର ​ଦୁଇଜଣ ସର୍ବୋଚ୍ଚ ଯନ୍ତ୍ରୀ ଭୁବନେଶ୍ୱରରୁ ସୁବର୍ଣ୍ଣରେଖା ବେସିନ୍ ଓ ବୈତରଣୀ ବେସିନକୁ ​ଯାଇଛନ୍ତି । ସେମାନେ ସଂପୃକ୍ତ ବେସିନ୍ ଗୁଡ଼ିକରେ ବନ୍ୟା ପରିଚାଳନା କରୁଛନ୍ତି ।

ଭଦ୍ରକରେ, ଉଚ୍ଚ ଶିକ୍ଷା ମନ୍ତ୍ରୀ, ବିଭିନ୍ନ ଅଞ୍ଚଳରେ ବୈତରଣୀ ବାମ ତଟ ନଦୀ ବନ୍ଧ  ନିରୀକ୍ଷଣ କରି ସ୍ଥିତି ଅନୁଧ୍ୟାନ କରିଥିଲେ । ଜିଲ୍ଲାପାଳ, ଭଦ୍ରକ ଏବଂ ଅରିରିକ୍ତ ମୁଖ୍ୟ ଯନ୍ତ୍ରୀ ​ସେମାନଙ୍କ ସହିତ ଥିଲେ ।

ବାଲେଶ୍ୱରରେ, ସର୍ବୋଚ୍ଚ ଯନ୍ତ୍ରୀ, ମନିଟରିଂ(ତଦାରଖ), ଜଳକା ନଦୀର ମଥାନୀ, ମାଟିଆସୋଲ ​ଏବଂ ବୁଢାବଳଙ୍ଗ ନଦୀର ଫୁଲାଡ଼ି ଠାରେ ଜଳସ୍ତର ନିରୀକ୍ଷଣ କରିବା ସହିତ ଅନ୍ୟ ବିଭିନ୍ନ ସ୍ଥାନ ​ଗସ୍ତ କରି ସ୍ଥିତି ଅନୁଧ୍ୟାନ କରିଛନ୍ତି ।  

ମୟୂରଭଞ୍ଜରେ ବୋଧି ଅଂଚଳରେ ଥିବା ଜମ୍ଭିରା ନଦୀର ଦକ୍ଷିଣ ପାର୍ଶ୍ୱରେ ଏକ ଘାଇ ସୃଷ୍ଟି ​ହୋଇଥିଲା, ଯାହାକୁ ବାଲି ବସ୍ତା ପକାଇ ବନ୍ଦ କରାଯାଇଛି । ସୁବର୍ଣ୍ଣରେଖା ନଦୀରେ ଜଳ ପ୍ରହାହ ​ବୃଦ୍ଧି ପାଉଥିବାରୁ ସାରସକଣା ବ୍ଲକର ନେଡ଼ାକୁ ଯିବା ରାସ୍ତା ଉପରେ ପାଣି ଚାଲୁଛି ।  

ଯାଜପୁର ​ଜିଲ୍ଲାପାଳ ଏବଂ ସର୍ବୋଚ୍ଚ ଯନ୍ତ୍ରୀ, ଯୋଜନା ଓ ପରିକଳ୍ପନା ବୈତରଣୀ ନଦୀର ​ସମ୍ବେଦନଶୀଳ ଦଶରଥପୁର ବ୍ଲକର ନୂଆପାଟଣା ଅଞ୍ଚଳ ବିଭିନ୍ନ ସ୍ଥାନରେ ନଦୀ ବନ୍ଧ ​ପରିଦର୍ଶନ କରିଛନ୍ତି । ଜିଲ୍ଲା ପ୍ରଶାସନ ତରଫରୁ ତଳିଆ ଅଞ୍ଚଳ ଲୋକମାନଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର ​କରାଯାଉଛି ।

ଜଳ ସଂପଦ ବିଭାଗର ଅଧିକାରୀ ଓ କର୍ମଚାରୀମାନେ ବିଭିନ୍ନ ସ୍ତରରେ ପରସ୍ପର ସହଯୋଗ ଏବଂ ​ସଂପୃକ୍ତ ଜିଲ୍ଲା ପ୍ରଶାସନ ସହିତ ସମନ୍ୱୟ ରଖି ବନ୍ୟା ପରିଚାଳନା କାର୍ଯ୍ୟ ଜାରି ରଖିଛନ୍ତି । ଏନେଇ ​​​ସୂଚନା ଅଧିକାରୀ ପଠାଣି ରାଉତ ​ସୂଚନା ଦେଇଛନ୍ତି ।