କାଶ୍ମୀର ବରଫରେ ଆଇଫୋନ ହଜେଇ ଓଡ଼ିଶା ଫେରିଥିଲେ ଯୁବତୀ, ଫେରାଇଦେଲା ପୋଲିସ

ଭୁବନେଶ୍ୱର:  ଡିସେମ୍ୱର ଦ୍ୱିତୀୟ ସପ୍ତାହରେ ନିଜ ସାଥୀଙ୍କ ସହ ଓଡ଼ିଶାରୁ କାଶ୍ମୀର ବୁଲିବାକୁ ଯାଇଥିଲେ ଜଣେ ଯୁବତୀ । ତେବେ ବୁଲିବା ସମୟରେ ସେ ତାଙ୍କ ଫୋନଟିକୁ ହଜାଇ ଦେଇଥିଲେ । ଫଳରେ ନିରାଶ ହୋଇ ଘରକୁ ଫେରିଥିଲେ । କିନ୍ତୁ ଖୁସିର କଥା ଏହା ଯେ, ଏକ ମାସ ମଧ୍ୟରେ ସେ ତାଙ୍କ ଫୋନଟିକୁ ଫେରି ପାଇଛନ୍ତି ।

ସୂଚନା ମୁତାବକ, ଯୁବତୀଙ୍କ ୨୫ ବର୍ଷିୟା ସନ୍ଧ୍ୟାରାଣୀ ନିଜ ସାଥୀ ଏବଂ ଭାଈ ଭଉଣୀଙ୍କ ସହ କାଶ୍ମୀର ବୁଲିବାକୁ ଯାଇଥିଲେ । ଡିସେମ୍ୱର ୮ରେ କାଶ୍ମୀରରେ ପହଞ୍ଚିଥିବା ସମୟରେ ସେ ୪ ଦିନ ଧରି ବିଭିନ୍ନ ସ୍ଥାନ ବୁଲିବାକୁ ଯାଇଥିଲେ । ତେବେ ସୋନମାର୍ଗ ବୁଲିବାକୁ ଯାଇଥିବା ସମୟରେ ସାଥୀମାନଙ୍କ ସହ ଅନେକ ଫଟୋ ଏବଂ ଭିଡିଓ ନିଜ ଆଇଫୋନ ମାଧ୍ୟମରେ ଉତ୍ତଳନ କରିଥିଲେ । କିନ୍ତୁ ସୋନମାର୍ଗ ବୁଲିବା ପରେ ସନ୍ଧ୍ୟା ସମୟରେ ଘୋଡାରେ ଫେରିବାବେଳେ ନିଜ ଫୋନଟି ଅଜାଣତରେ କେଉଁଠି ଖସିପଡିଥିଲା । ଏହା ପରେ ସେ ଓ ତାଙ୍କ ସାଥୀମାନେ ଖୁବ ବ୍ୟସ୍ତ ହୋଇପଡିଥିଲେ । ରାତି ବଢିବା ସହ ସୋନମାର୍ଗରେ ଥଣ୍ଡାର ପ୍ରକୋପ ମଧ୍ୟ ବଢିବାରେ ଲାଗିଥିଲା । ଫୋନ ପାଇବା ଆଶାରେ ରାତି ସମୟରେ ମଧ୍ୟ ଖୁବ୍ ଖୋଜା କୋଜି କରିଥିଲେ ମଧ୍ୟ କୌଣସି ଲାଭ ମିଳିନଥିଲା । ପ୍ରାୟ ୪ ଘଣ୍ଟା ସମୟ ପ୍ରବଳ ଥଣ୍ଡାରେ ରହିବା ପରେ ସେ ନିରାଶ ହୋଇ ନିଜ ସାଥୀଙ୍କ ସହ ସୋନମାର୍ଗରୁ ଫେରି ଆସୁଥିଲେ । କିନ୍ତୁ ସ୍ଥାନୀୟ ଜଣେ ଯବାନ ଯୁବତୀଙ୍କୁ ଥାନାରେ ଏ ସମ୍ପର୍କରେ ଏତଲା ଦେବା ପାଇଁ ପରାମର୍ଶ ଦେଇଥିଲେ । ଏଥିସହ ଏହା ଆଶ୍ୱାସନା ମଧ୍ୟ ଦେଇଥିଲେ ଯେ, ବ୍ୟସ୍ତ ହୁଅନ୍ତୁ ନାହିଁ ଆପଣ ନିଜ ଫୋନ ଫେରିପାଇବେ । ଯବାନଙ୍କ କଥାମାନି ନିକଟସ୍ଥ ଥାନାରେ ଫୋନ ହଜିବା ସମ୍ପର୍କରେ ଲିଖିତ ଅଭିଯୋଗ କରିବା ସହ ପୋଲିସକୁ ଫୋନର ଆଇଏମଇଆଇ ନମ୍ୱର (phone imei number) ପ୍ରଦାନ କରିଥିଲେ ।

ବିନା ଫୋନରେ ନିଜ ସାଥୀଙ୍କ ସହ ଗୁଲମର୍ଗ, ଦୁଧପତ୍ରୀ, ଡାଲ୍ ଲେକ୍ ଓ ଅନ୍ୟାନ୍ୟ ଅଞ୍ଚଳ ବୁଲିବା ପରେ ଟ୍ରେନ ମାଧ୍ୟମରେ ଘରକୁ ଫେରିଥିଲେ ଯୁବତୀ । କିନ୍ତୁ ସେ କାଶ୍ମୀର ପୋଲିସ ସହ ନିରନ୍ତର ଯୋଗାଯୋଗରେ ରହିଥିଲେ । ତେବେ ମାତ୍ର କିଛି ଦିନ ମଧ୍ୟରେ ପୋଲିସ ଟ୍ରାକିଂ କରି ହଜିଯାଇଥିବା ଆଇଫୋନଟିକୁ ପାଇବାରେ ସଫଳ ହୋଇଥିଲା । ଏ ସମ୍ପର୍କରେ ଯୁବତୀଙ୍କୁ ପୋଲିସ ପକ୍ଷରୁ ସୂଚନା ଦିଆଯାଇଥିଲା । ଏହା ଜାଣିବା ପରେ ଯୁବତୀ ଅତ୍ୟନ୍ତ ଖୁସିବ୍ୟକ୍ତ କରିଥିଲେ ଏବଂ ନିଜ ଠିକଣାରେ ଆଇଫୋନଟିକୁ ପଠାଇବା ପାଇଁ ପୋଲିସକୁ ଅନୁରୋଧ କରିଥିଲେ । କାଶ୍ମୀର ପୋଲିସ ଯୁବତୀଙ୍କୁ ଭାରତୀୟ ଡାକ ଯୋଗେ ଭୁବନେଶ୍ୱରକୁ ଫୋନଟି ପଠାଇଥିଲେ । ହଜିଯାଇଥିବା ଦାମୀ ଆଇଫୋନ ଫେରି ପାଇ ଯୁବତୀ ଖୁସିର ସହ କାଶ୍ମୀର ପୋଲିସକୁ ଧନ୍ୟବାଦ ଜଣାଇଥିଲେ ।