 "Top 10 News Today:୪୮ ଘଣ୍ଟାରେ ପ୍ରବଳ ବର୍ଷା ସମ୍ଭାବନା, ମୁକୁଳିଲେ ୧୪ ଭାରତୀୟ ମତ୍ସ୍ୟଜୀବୀ ଓ ସକାଳର ୧୦ ବଡ଼ ଖବର")
ବଙ୍ଗୋପସାଗରରେ ବଡ଼ ଲଘୁଚାପ, ୪୮ ଘଣ୍ଟାରେ ପ୍ରବଳ ବର୍ଷା !
ଉପାନ୍ତରୁ ଉପକୂଳ,ପଶ୍ଚିମରୁ ଦକ୍ଷିଣ ସବୁଠି ପ୍ରବଳ ତାତି ସାଙ୍ଗକୁ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିଦେଉଥିବା ବେଳେ ଆଗାମୀ ୪୮ ଘଣ୍ଟା ମଧ୍ୟରେ ବଙ୍ଗୋପସାଗରରେ ଆସିପାରେ ଲଘୁଚାପ । ପାଣିପାଗରେ ହେବାକୁ ଯାଉଛି ବଡ଼ ପରିବର୍ତ୍ତନ । ଦକ୍ଷିଣପୂର୍ବ ବଙ୍ଗୋପସାଗର ଓ ପାର୍ଶ୍ବବର୍ତ୍ତୀ ଅଞ୍ଚଳରେ ଘୂର୍ଣ୍ଣିବଳୟ ସକ୍ରିୟ ଥିବାରୁ ଏହାର ପ୍ରଭାବରେ ୪୮ ଘଣ୍ଟାରେ ଦକ୍ଷିଣ ବଙ୍ଗୋପସାଗର ଲଘୁଚାପ କ୍ଷେତ୍ର ସମ୍ଭାବନା ସୃଷ୍ଟି ହୋଇଛି ।
ଆଜି ବିଶ୍ୱ ସ୍ୱାସ୍ଥ୍ୟ ଦିବସ
ପ୍ରତିବର୍ଷ, ସାରା ବିଶ୍ୱରେ ୭ ଏପ୍ରିଲକୁ ବିଶ୍ୱ ସ୍ୱାସ୍ଥ୍ୟ ଦିବସ ଭାବରେ ପାଳନ କରାଯାଏ। ଏହି ଦିବସ ପାଳନ କରିବାର ଉଦ୍ଦେଶ୍ୟ ହେଉଛି ବିଶ୍ୱ ସ୍ତରରେ ଗୁରୁତ୍ୱପୂର୍ଣ୍ଣ ସ୍ୱାସ୍ଥ୍ୟ ସମସ୍ୟା ଏବଂ ସ୍ୱାସ୍ଥ୍ୟ ଅଧିକାର ବିଷୟରେ ସଚେତନତା ବୃଦ୍ଧି କରିବା। ଆସନ୍ତୁ ଜାଣିବା ଏହି ଦିନଟିକୁ ପାଳନ କରିବା ପାଇଁ କାହିଁକି ୭ ଏପ୍ରିଲ ତାରିଖକୁ ବାଛି ଦିଆଯାଇଥିଲା। ପ୍ରକୃତରେ, ବିଶ୍ୱ ସ୍ୱାସ୍ଥ୍ୟ ସଂଗଠନ ୭ ଏପ୍ରିଲ ୧୯୪୮ରେ ପ୍ରତିଷ୍ଠିତ ହୋଇଥିଲା। ବିଶ୍ୱ ସ୍ୱାସ୍ଥ୍ୟ ସଂଗଠନ ପ୍ରତିଷ୍ଠା ସହିତ, ବିଶ୍ୱ ସ୍ୱାସ୍ଥ୍ୟ ଦିବସର ମୂଳଦୁଆ ମଧ୍ୟ ସ୍ଥାପିତ ହୋଇଥିଲା। ତଥାପି, ଏହା ପ୍ରଥମେ ୧୯୫୦ ମସିହାରେ ପାଳନ କରାଯାଇଥିଲା ଏବଂ ସେବେଠାରୁ ପ୍ରତିବର୍ଷ ୭ ଏପ୍ରିଲରେ ବିଶ୍ୱ ସ୍ୱାସ୍ଥ୍ୟ ଦିବସ ପାଳନ କରାଯାଏ। ପ୍ରତିବର୍ଷ ଏଥିପାଇଁ ଭିନ୍ନ ଭିନ୍ନ ବିଷୟବସ୍ତୁ ସ୍ଥିର କରାଯାଏ।
ପାମ୍ବନ ବ୍ରିଜର ଶୁଭାରମ୍ଭ
ରାମନବମୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ତାମିଲନାଡ଼ୁରେ ଦେଶର ପ୍ରଥମ ଭର୍ଟିକାଲ୍-ଲିଫ୍ଟ ସମୁଦ୍ର ସେତୁ (ପାମ୍ବନ ବ୍ରିଜ୍)ର ଉଦ୍ଘାଟନ କରିଛନ୍ତି। ପ୍ରଧାନମନ୍ତ୍ରୀ ମୋଦୀ ବ୍ରିଜ୍ ତଳେ ଯାଇଥିବା ତଟରକ୍ଷୀ ବାହିନୀର ଏକ ଜାହାଜ ଏବଂ ନୂତନ ରାମେଶ୍ୱରମ୍-ତାମ୍ବରମ୍ (ଚେନ୍ନାଇ) ଟ୍ରେନ୍କୁ ମଧ୍ୟ ପତାକା ଦେଖାଇ ଶୁଭାରମ୍ଭ କରିଥିଲେ। ତିନିଦିନିଆ ଶ୍ରୀଲଙ୍କା ଗସ୍ତ ସାରି ଆଜି ତାମିଲନାଡୁରେ ପହଞ୍ଚିଥିବା ପ୍ରଧାନମନ୍ତ୍ରୀ ମୋଦୀ ରାମେଶ୍ୱରମର ରାମନାଥସ୍ୱାମୀ ମନ୍ଦିରରେ ପୂଜାର୍ଚ୍ଚନା କରିବା ସହ ରାଜ୍ୟରେ ୮,୩୦୦ କୋଟିରୁ ଅଧିକ ଟଙ୍କାର ବିଭିନ୍ନ ରେଳ ଓ ସଡ଼କ ପ୍ରକଳ୍ପର ଶିଳାନ୍ୟାସ କରିଥିଲେ।
ମହିଳା ସାମ୍ବାଦିକଙ୍କୁ ଶ୍ରୀମନ୍ଦିର ସେବାୟତଙ୍କ ଅସଦାଚରଣ
ଶ୍ରୀମନ୍ଦିରର ସିଂହଦ୍ୱାର ସମ୍ମୁଖରେ ଦଣେ ମହିଳା ସାମ୍ବାଦିକାଙ୍କୁ ସେବାୟତଙ୍କ ଆକ୍ରମଣ ଅଭିଯୋଗ ସାମ୍ନାକୁ ଆସିଛି । ରାମନବମୀ ସମ୍ପର୍କିତ ଖବର ପ୍ରସାରଣ ସମୟରେ କିଛି ସେବାୟତ ଉଭୟ ସାମ୍ବାଦିକା ଏବଂ ତାଙ୍କ କ୍ୟାମେରାମ୍ୟାନଙ୍କୁ ଗାଳିଗୁଲଜ କରିବା ସହ ଧକ୍କା ମାରିଥିଲେ । ଏଥିସହ ତାଙ୍କ ମୋବାଇଲ୍ ଫୋନ୍ ଛଡ଼େଇ ନେଇଥିଲେ ବୋଲି କୁହାଯାଉଛି । ତେବେ ଏନେଇ ସିଂହଦ୍ୱାର ଥାନାରେ ମାମଲା ହୋଇଥିବା ସୂଚନା ମିଳିଛି ।
ଆଜି ଟ୍ରମ୍ପ-ନେତାନ୍ୟାହୁ ଭେଟ
ଗାଜାରେ ଚାଲିଥିବା ସଂଘର୍ଷ ଏବଂ ଅନ୍ତର୍ଜାତୀୟ ପରିସ୍ଥିତି ମଧ୍ୟରେ ସୋମବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ମଧ୍ୟରେ ସାକ୍ଷାତ ହେବ। ନେତାନ୍ୟାହୁଙ୍କ କାର୍ଯ୍ୟାଳୟ ଏବଂ ହ୍ୱାଇଟ୍ ହାଉସ୍ ଅଧିକାରୀ ଏହି ବୈଠକକୁ ନିଶ୍ଚିତ କରିଛନ୍ତି। ଟ୍ରମ୍ପ୍ଙ୍କ ପୁନଃନିର୍ବାଚନ ପରେ ଏହା ଦୁଇ ନେତାଙ୍କ ମଧ୍ୟରେ ଦ୍ୱିତୀୟ ସାକ୍ଷାତ ହେବାକୁ ଯାଉଛି। ଇସ୍ରାଏଲ ଗାଜା ଷ୍ଟ୍ରିପରେ ଏକ ନୂତନ ସୁରକ୍ଷା କରିଡରରେ ସୈନ୍ୟ ମୁତୟନ କରିବା ଆରମ୍ଭ କରିଛି ଏବଂ ହମାସ ବିରୁଦ୍ଧରେ ତାର ଆଭିମୁଖ୍ୟକୁ ଆହୁରି କଠୋର କରିଛି।
ଆମେରିକାରେ ଟ୍ରମ୍ପ୍-ମସ୍କଙ୍କୁ ବିରୋଧ
ଚଳିତ ବର୍ଷ ଜାନୁଆରିରେ ଆମେରିକାର ରାଷ୍ଟ୍ରପତି ଭାବରେ ଦାୟିତ୍ୱ ଗ୍ରହଣ କରିଥିବା ଡୋନାଲ୍ଡ ଟ୍ରମ୍ପ୍ଙ୍କ ବିରୋଧରେ ଦେଶବ୍ୟାପୀ ପ୍ରତିବାଦ ପ୍ରଦର୍ଶନ କରାଯାଉଛି। ଶନିବାର ଦିନ, ହଜାର ହଜାର ପ୍ରଦର୍ଶନକାରୀ ଡୋନାଲ୍ଡ ଟ୍ରମ୍ପ୍ଙ୍କ ନୀତି ବିରୁଦ୍ଧରେ ସେମାନଙ୍କର ଅସନ୍ତୋଷ ପ୍ରକାଶ କରିବା ପାଇଁ ରାସ୍ତାକୁ ଓହ୍ଲାଇଥିଲେ। ଟ୍ରମ୍ପ୍ଙ୍କ ସହିତ, ପ୍ରତିବାଦକାରୀମାନେ ତାଙ୍କର ଘନିଷ୍ଠ ସହଯୋଗୀ, ପ୍ରସିଦ୍ଧ ବ୍ୟବସାୟୀ ଏଲନ ମସ୍କଙ୍କ ଉପରେ ମଧ୍ୟ କ୍ଷୁବ୍ଧ। ଏହି ପ୍ରତିବାଦକୁ ଆମେରିକାରେ ହ୍ୟାଣ୍ଡସ୍ ଅଫ୍ ନାମ ଦିଆଯାଇଛି। ଏହି ପ୍ରତିବାଦକୁ 'ହ୍ୟାଣ୍ଡସ୍ ଅଫ୍' ନାମ ଦେବାର ଉଦ୍ଦେଶ୍ୟ ହେଉଛି ଟ୍ରମ୍ପ୍ଙ୍କୁ ଏକ ବାର୍ତ୍ତା ଦେବା ଯେ, ସେ ଲୋକଙ୍କ ବ୍ୟକ୍ତିଗତ ମାମଲାରେ ହସ୍ତକ୍ଷେପ କରିବା ବନ୍ଦ କରିବା ଉଚିତ୍।
ଦେଶବ୍ୟାପୀ ରାମନବମୀ ପାଳିତ
ରାଜ୍ୟ ତଥା ଦେଶର ବିଭିନ୍ନ ସ୍ଥାନରେ ଆନନ୍ଦ ଉଲ୍ଲାସର ସହ ଶ୍ରୀରାମ ନବମୀ ପାଳନ କରାଯାଇଛି । ହୋମଯଜ୍ଞ ଓ ରାମନାମରେ ମୁଖରିତ ହୋଇଛି ସମସ୍ତ ରାମମନ୍ଦିର। ଉପବାସ ଓ ବ୍ରତ କରି ପୂଜାର୍ଚ୍ଚନାରେ ମଗ୍ନ ହୋଇଛନ୍ତି ଶ୍ରଦ୍ଧାଳୁ । ଶ୍ରୀରାମଙ୍କ ନୀତି ଆଦର୍ଶରେ ଅନୁପ୍ରାଣିତ ହେବାର ବାର୍ତ୍ତା ଦେଇ ଅନେକ ସ୍ଥାନରେ ଶୋଭାଯାତ୍ରା ମଧ୍ୟ ଆୟୋଜିତ ହୋଇଛି । ଆଜି ଅଯୋଧ୍ୟା ରାମଜନ୍ମଭୂମୀରେ ପ୍ରଭୁ ଶ୍ରୀରାମଙ୍କୁ ସୂର୍ଯ୍ୟତିଳକ ଅର୍ପଣ କରାଯାଇଥିଲା । ଏହି ଅପୂର୍ବ ଦୃଶ୍ୟ ଦେଖିବା ପାଇଁ ହଜାର ହଜାର ଶ୍ରଦ୍ଧାଳୁ ଭିଡ ଜମାଇଥିଲେ ।
ଦିଲ୍ଲୀ ଗସ୍ତରେ ମୁଖ୍ୟମନ୍ତ୍ରୀ : ଓଡିଶାରେ ପୁଞ୍ଜି ନିବେଶ ନେଇ କରିବେ ଆଲୋଚନା
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରବିବାର ଦୁଇଦିନିଆ ନୂଆଦିଲ୍ଲୀ ଗସ୍ତରେ ଯାଇଛନ୍ତି। ସେ ଓଡ଼ିଶାକୁ ବୃହତ ଶିଳ୍ପ ପ୍ରଗତି ଏବଂ ଆର୍ଥିକ ଅଭିବୃଦ୍ଧି ଆଡକୁ ଆଗେଇ ନେବା ପାଇଁ ଗୁରୁତ୍ୱପୂର୍ଣ୍ଣ ଆଲୋଚନା କରିବେ। ଓଡିଶାରେ ପୁଞ୍ଜି ନିବେଶ ନେଇ ଆଲୋଚନା କରିବେ। ସେଠାରେ ବିଭିନ୍ନ ଶିଳ୍ପପତିମାନଙ୍କୁ ସମ୍ବୋଧିତ କରିବେ। ଓଡ଼ିଶାର ନିବେଶ ପାଇଁ ଉପଯୁକ୍ତ ପରିବେଶ ସୃଷ୍ଟି କରିବା ଲାଗି ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ସଂସ୍କାର ଏବଂ ପଦକ୍ଷେପ ଉପରେ ଗୁରୁତ୍ୱାରୋପ କରିବେ। ସେଠାରେ ସେ ରାଜ୍ୟ ସରକାରଙ୍କ ତରଫରୁ ଇଣ୍ଡିଆନ ଅଏଲ କର୍ପୋରେସନ ଲିମିଟେଡ (ଆଇଓସିଏଲ୍), ପେଟ୍ରୋନେଟ ଏଲ୍ଏନ୍ଏଜି ଏବଂ ଇଣ୍ଡିଆନ ଷ୍ଟ୍ରାଟେଜିକ ପେଟ୍ରୋଲିୟମ ରିଜର୍ଭ ଲିମିଟେଡ ସମେତ ପ୍ରମୁଖ ଉଦ୍ୟୋଗ ସହିତ ଏମଓୟୁ ସ୍ୱାକ୍ଷର କରିବାର ସମ୍ଭାବନା ରହିଛି।
ବିଷ ପିଇ ଗୋଟିଏ ପରିବାରର ୩ ଜଣଙ୍କ ମୃତ୍ୟୁ
ବିଷ ପିଇ ଜୀବନ ହାରିଲେ ଗୋଟିଏ ପରିବାରର ୪୦ ବର୍ଷୀୟ ମାଆ, ୧୬ ବର୍ଷିୟ ଝିଅ ଏବଂ ୨୨ ବର୍ଷର ପୁଅ । ଏମ୍କେସିଜି ହସ୍ପିଟାଲ୍ରେ ସମସ୍ତଙ୍କୁ ମୃତ୍ୟୁ ଘୋଷଣା କରିଲେ ଡାକ୍ତର । ଘଟଣା ସ୍ଥଳରେ ପହଞ୍ଚି ଛାନଭିନ୍ କରୁଛି ପୋଲିସ। ଗଞ୍ଜାମ ଜିଲ୍ଲା ପାଳିବନ୍ଧ ଗାଁରେ ଏଭଳି ଅଭାବନୀୟ ଘଟଣା ଘଟିଛି। ସକାଳୁ କୌଣସି କାମରେ ପଡୋଶୀ ଲୋକ ମୃତକଙ୍କ ଘରକୁ ଯାଇଥିଲେ । ବହୁ ସମୟ ଧରି କବାଟ ବାଡ଼େଇବା ପରେ କୌଣସି ଉତ୍ତର ମିଳିନଥିଲା। ଶେଷରେ ସନ୍ଦେହ କରି ପଡୋଶୀ ଆଉ କିଛି ଲୋକଙ୍କୁ ଆଣି ଘର ଭିତରେ ପ୍ରବେଶ କରିଥିଲେ। ଘରେ ପ୍ରବେଶ କରିବା ପରେ ମାଆ, ପୁଅ ଏବଂ ଝିଅଙ୍କୁ ଅଚେତ ଅବସ୍ଥାରେ ଘର ଭିତରେ ପଡି ରହିଥିବା ଦେଖିଥିଲେ। ଏହା ଦେଖି ତୁରନ୍ତ ପୋଲିସକୁ ଖବର ଦେବା ସହ ସମସ୍ତଙ୍କୁ ଉଦ୍ଧାର କରି ନିକଟସ୍ଥ ଛତ୍ରପୁର ମେଡିକାଲରେ ଭର୍ତ୍ତି କରିଥିଲେ। ହେଲେ ଅବସ୍ଥା ଗୁରୁତର ଥିବାରୁ ସମସ୍ତଙ୍କୁ ବ୍ରହ୍ମପୁର ସ୍ଥିତ ଏମ୍କେସିଜି ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ଡାକ୍ତର ସମସ୍ତଙ୍କୁ ମୃତ ଘୋଷଣା କରିଛନ୍ତି।
ମୁକୁଳିଲେ ୧୪ ଭାରତୀୟ ମତ୍ସ୍ୟଜୀବୀ
ରବିବାର ଅତି କମରେ ୧୪ ଜଣ ଭାରତୀୟ ମତ୍ସ୍ୟଜୀବୀଙ୍କୁ ମୁକ୍ତ କରିଛି ଶ୍ରୀଲଙ୍କା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମତ୍ସ୍ୟଜୀବୀଙ୍କ ସମସ୍ୟା ପ୍ରତି ମାନବିକ ଦୃଷ୍ଟିକୋଣ ରଖିବାକୁ ଆହ୍ୱାନ ଦେବାର ଗୋଟିଏ ଦିନ ପରେ ଏହି ପଦକ୍ଷେପ ନେଇଛି ଶ୍ରୀଲଙ୍କା। ଶନିବାର ପ୍ରଧାନମନ୍ତ୍ରୀ ମୋଦି ଏବଂ ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାରା ଦିସାନାୟକଙ୍କ ମଧ୍ୟରେ ହୋଇଥିବା ଆଲୋଚନା ସମୟରେ ମତ୍ସ୍ୟଜୀବୀଙ୍କ ପ୍ରସଙ୍ଗ ପ୍ରମୁଖ ଭାବରେ ଉଠାଯାଇଥିଲା। ସୂତ୍ର ଅନୁସାରେ ଶ୍ରୀଲଙ୍କା ଏକ ସ୍ୱତନ୍ତ୍ର ପଦକ୍ଷେପ ସ୍ୱରୂପ ୧୪ ଜଣ ଭାରତୀୟ ମତ୍ସ୍ୟଜୀବୀଙ୍କୁ ମୁକ୍ତ କରିଛି। ଦିଶାନାୟକଙ୍କୁ ଭେଟିବା ପରେ, ମୋଦି ଗଣମାଧ୍ୟମକୁ ଦେଇଥିବା ଏକ ବିବୃତ୍ତିରେ କହିଛନ୍ତି, "ଆମେ ମତ୍ସ୍ୟଜୀବୀଙ୍କ ଜୀବିକା ସମ୍ବନ୍ଧୀୟ ପ୍ରସଙ୍ଗଗୁଡ଼ିକ ଉପରେ ମଧ୍ୟ ଆଲୋଚନା କରିଥିଲୁ। ଆମେ ଏହି କ୍ଷେତ୍ରରେ ମାନବିକ ଆଭିମୁଖ୍ୟ ଗ୍ରହଣ କରି ଆଗକୁ ବଢ଼ିବା ଉଚିତ ବୋଲି ସହମତ ହୋଇଥିଲୁ।"
Newsletter
