AI ବିରୋଧରେ DGCAର କଡ଼ା କାର୍ଯ୍ୟାନୁଷ୍ଠାନ, ୩ ଅଧିକାରୀଙ୍କୁ ବହିଷ୍କାର କରିବାକୁ ନିର୍ଦ୍ଦେଶ

DGCA ଏୟାର ଇଣ୍ଡିଆକୁ ଏହି ୩ ଅଧିକାରୀଙ୍କ ବିରୁଦ୍ଧରେ ତୁରନ୍ତ ଆଭ୍ୟନ୍ତରୀଣ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ଏବଂ ୧୦ ଦିନ ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।

Ahmedabad Plan Crash: ଏୟାର ଇଣ୍ଡିଆରେ କ୍ରୁ ସୂଚୀ ଏବଂ ତାଲିକାଭୁକ୍ତ କାର୍ଯ୍ୟରେ ଅବହେଳାକୁ ଗମ୍ଭୀରତାର ସହ ନେଇ ଭାରତର ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ସମସ୍ତ ସମ୍ପର୍କିତ ଦାୟିତ୍ୱରୁ ତିନି ଜଣ ବରିଷ୍ଠ ଅଧିକାରୀଙ୍କୁ ବହିଷ୍କାର କରିବାକୁ ନିର୍ଦ୍ଦେଶ ଦେଇଛି। ସୂତ୍ର ଅନୁଯାୟୀ ଏହି ତିନି ଜଣ ଅଧିକାରୀଙ୍କୁ କାର୍ଯ୍ୟକ୍ଷମ ତ୍ରୁଟି ପାଇଁ ଦାୟୀ ବୋଲି ପ୍ରମାଣିତ ହୋଇଛି ଏବଂ ବର୍ତ୍ତମାନ ସେମାନଙ୍କୁ ଯେକୌଣସି କ୍ରୁ ପରିଚାଳନା କାର୍ଯ୍ୟରୁ ଦୂରରେ ରଖାଯିବ।

ଡିଜିସିଏ ଏୟାର ଇଣ୍ଡିଆକୁ ଏହି ଅଧିକାରୀଙ୍କ ବିରୁଦ୍ଧରେ ତୁରନ୍ତ ଆଭ୍ୟନ୍ତରୀଣ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ଏବଂ ଏହାର ଅଗ୍ରଗତି ଏବଂ ଫଳାଫଳ ବିଷୟରେ ଜଣାଇ ୧୦ ଦିନ ମଧ୍ୟରେ ସଂସ୍ଥାକୁ ଏକ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛି। ବିମାନ କମ୍ପାନୀର ସୁରକ୍ଷା ଏବଂ କାର୍ଯ୍ୟକ୍ଷମ ମାନଦଣ୍ଡରେ ସ୍ୱଚ୍ଛତା ଏବଂ ଉତ୍ତରଦାୟିତ୍ୱ ସୁନିଶ୍ଚିତ କରିବା ଦିଗରେ ଏହି ପଦକ୍ଷେପ ନିଆଯାଇଛି।

ଜୁନ୍ ୧୨ ତାରିଖରେ ଅହମ୍ମଦାବାଦ ବିମାନବନ୍ଦରରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ବିମାନ ଦୁର୍ଘଟଣାଗ୍ରସ୍ତ ହେବା ପରେ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏହି ନିଷ୍ପତ୍ତି ନେଇଛି। ଭବିଷ୍ୟତରେ ଏପରି ଭୁଲ ଯେପରି ପୁନରାବୃତ୍ତି ନହୁଏ ସେଥିପାଇଁ DGCA ଏୟାର ଇଣ୍ଡିଆକୁ ଏହାର ସମୟ ନିର୍ଦ୍ଧାରଣ ପ୍ରକ୍ରିୟାରେ ଉନ୍ନତି ଆଣିବାକୁ କହିଛି। DGCA ଏହା ମଧ୍ୟ ସ୍ପଷ୍ଟ କରିଛି ଯେ ଏବେ ଉଡ଼ାଣ ସୁରକ୍ଷା ସହିତ କୌଣସି ସାଲିସ କରାଯିବ ନାହିଁ।

ଜୁନ୍ ୧୨ ତାରିଖରେ ଘଟିଥିବା ଏହି ଭୟଙ୍କର ବିମାନ ଦୁର୍ଘଟଣାରେ ବିମାନରେ ଥିବା ୨୪୨ ଜଣ ଯାତ୍ରୀଙ୍କ ମଧ୍ୟରୁ ୨୪୧ ଜଣ ପ୍ରାଣ ହରାଇଥିଲେ। ବିମାନଟି ଉଡ଼ାଣ ସମୟରେ ଭାରସାମ୍ୟ ହରାଇ ନିକଟସ୍ଥ ମେଡିକାଲ୍ କଲେଜର କୋଠା ସହିତ ଧକ୍କା ହେବା ଫଳରେ ଏହି ଦୁର୍ଘଟଣା ଘଟିଥିଲା।

ଏହି ଘଟଣାରେ ମେଡିକାଲ୍ କଲେଜର ମଧ୍ୟାହ୍ନ ଭୋଜନ ଖାଉଥିବା ଅନେକ ଡାକ୍ତରଙ୍କ ମଧ୍ୟ ମୃତ୍ୟୁ ହୋଇଥିଲା। ଏହି ଭୟଙ୍କର ଦୁର୍ଘଟଣା କେବଳ ଭାରତକୁ ନୁହେଁ ବରଂ ସମଗ୍ର ବିଶ୍ୱକୁ ଦୋହଲାଇ ଦେଇଛି।