 "୧ ଜୁଲାଇରୁ ମହଙ୍ଗା ହେବ ଟ୍ରେନ୍ ଯାତ୍ରା")
Indian Railways: ଆପଣ ଯଦି ଟ୍ରେନରେ ଯାତ୍ରା କରୁଛନ୍ତି ତେବେ ଆପଣଙ୍କ ପାଇଁ ଏହା ଏକ ବଡ଼ ଖବର। ଆସନ୍ତା ମାସରୁ ରେଳ ଯାତ୍ରୀମାନଙ୍କୁ ଏକ ବଡ଼ ଝଟକା ଲାଗିବାକୁ ଯାଉଛି।କୋଭିଡ-୧୯ ମହାମାରୀ ପରେ ଭାରତୀୟ ରେଳ ପ୍ରଥମ ଥର ପାଇଁ ଯାତ୍ରୀବାହୀ ଟ୍ରେନ୍ ଭଡ଼ା ବୃଦ୍ଧି କରିବାକୁ ଯାଉଛି। ଭଡ଼ାରେ ସାମାନ୍ୟ ବୃଦ୍ଧି ୧ ଜୁଲାଇ ୨୦୨୫ ରୁ କାର୍ଯ୍ୟକାରୀ ହେବ।
ଇକୋନୋମିକ୍ ଟାଇମ୍ସ ସୂତ୍ରରୁ ଜଣାପଡ଼ିଛି ଯେ ନନ୍-ଏସି ମେଲ୍ / ଏକ୍ସପ୍ରେସ୍ ଟ୍ରେନ ପାଇଁ ଯାତ୍ରୀ ଭଡ଼ା ପ୍ରତି କିଲୋମିଟରରେ ୧ ପଇସା ବୃଦ୍ଧି ପାଇବ। ଏସି ଶ୍ରେଣୀ ପାଇଁ ଭଡ଼ା କିଲୋମିଟରରେ ୨ ପଇସା ବୃଦ୍ଧି ପାଇବ। ୫୦୦ କିଲୋମିଟର ଯାତ୍ରା ପାଇଁ ଉପନଗରୀୟ ଟିକେଟ୍ ଏବଂ ଦ୍ୱିତୀୟ ଶ୍ରେଣୀ ଯାତ୍ରାର ଭଡ଼ାରେ କୌଣସି ବୃଦ୍ଧି ହେବ ନାହିଁ। ୫୦୦ କିଲୋମିଟରରୁ ଅଧିକ ଦୂରତା ପାଇଁ ପ୍ରତି କିଲୋମିଟରରେ ଅଧ ପଇସା ବୃଦ୍ଧି ହେବ। ଏହା ବ୍ୟତୀତ ମାସିକ ସିଜିନ୍ ଟିକେଟରେ ମଧ୍ୟ କୌଣସି ବୃଦ୍ଧି ହେବ ନାହିଁ।
୧ ଜୁଲାଇରୁ କାର୍ଯ୍ୟକାରୀ ହେବାକୁ ଥିବା ସଂଶୋଧିତ ଭଡ଼ା ନିମ୍ନଲିଖିତ ଅଟେ -
ସହରାଞ୍ଚଳ ଭଡ଼ାରେ କୌଣସି ବୃଦ୍ଧି ହେବ ନାହିଁ।
ମାସିକ ସିଜିନ୍ ଟିକେଟ୍ ମୂଲ୍ୟ ଅପରିବର୍ତ୍ତିତ ରହିବ।
ସେକେଣ୍ଡ କ୍ଲାସରେ ୫୦୦ କିଲୋମିଟର ପର୍ଯ୍ୟନ୍ତ ଦୂରତା ପାଇଁ ଭଡ଼ା ବୃଦ୍ଧି କରାଯିବ ନାହିଁ।
ସେକେଣ୍ଡ କ୍ଲାସରେ ୫୦୦ କିଲୋମିଟରରୁ ଅଧିକ ଦୂରତା ପାଇଁ, ଭଡ଼ା କିଲୋମିଟର ପିଛା ଅଧ ପଇସା ବୃଦ୍ଧି ପାଇବ।
ମେଲ୍ ଏବଂ ଏକ୍ସପ୍ରେସ୍ (ନନ୍-ଏସି) ଟ୍ରେନ୍ରେ ଭଡ଼ା କିଲୋମିଟର ପିଛା ୧ ପଇସା ବୃଦ୍ଧି ପାଇବ।
ଏସି କ୍ଲାସରେ ଭଡ଼ା କିଲୋମିଟର ପିଛା ୨ ପଇସା ବୃଦ୍ଧି ପାଇବ।
ତତ୍କାଳ ଟିକେଟ ବୁକିଂରେ ହେବ ବଡ଼ ପରିବର୍ତ୍ତନ
କହିରଖୁଛୁ ଯେ ଅନଲାଇନ୍ ତତ୍କାଳ ଟିକେଟ୍ ବ୍ୟବସ୍ଥାରେ ଦୀର୍ଘ ଦିନ ଧରି ଚାଲିଥିବା ହେରଫେରକୁ ଦୃଷ୍ଟିରେ ରଖି ସମ୍ପ୍ରତି ରେଳବାଇ ତତ୍କାଳ ଟିକେଟ୍ ବୁକିଂ ପ୍ରକ୍ରିୟାରେ ଏକ ବଡ଼ ପରିବର୍ତ୍ତନ କରିଛି। ୧ ଜୁଲାଇରୁ ତତ୍କାଳ ଟିକେଟ୍ ବୁକିଂ ପାଇଁ ଆଧାର ଆଧାରିତ OTP ଯାଞ୍ଚ ବାଧ୍ୟତାମୂଳକ ହେବ। ୧ ଜୁଲାଇ ୨୦୨୫ରୁ ତତ୍କାଳ ଟ୍ରେନ୍ ଟିକେଟ୍ ବୁକିଂ ପାଇଁ ଆଧାର ଯାଞ୍ଚ ବାଧ୍ୟତାମୂଳକ କରାଯାଇଛି। ୧୦ ଜୁନ୍ ୨୦୨୫ରେ ଜାରି ଏକ ନିର୍ଦ୍ଦେଶନାମା ମାଧ୍ୟମରେ ରେଳ ମନ୍ତ୍ରଣାଳୟ ସମସ୍ତ ରେଳ ଜୋନକୁ ସୂଚିତ କରିଛି ଯେ ଏହି ନୂତନ ଆବଶ୍ୟକତାର ଉଦ୍ଦେଶ୍ୟ ହେଉଛି "ତତ୍କାଳ ଯୋଜନାର ଲାଭ ସାଧାରଣ ଉପଭୋକ୍ତାଙ୍କ ପାଖରେ ପହଞ୍ଚିବା ନିଶ୍ଚିତ କରିବା।" କହିରଖୁଛୁ ଯେ ସରକାରଙ୍କ ଏହି ନିୟମ ଅନଲାଇନ୍ ବୁକିଂ, ରିଜର୍ଭେସନ କାଉଣ୍ଟର ଏବଂ ଏଜେଣ୍ଟମାନଙ୍କ ମାଧ୍ୟମରେ କରାଯାଇଥିବା ବୁକିଂ ପାଇଁ ପ୍ରଯୁଜ୍ୟ ହେବ। ଏହାର ଉଦ୍ଦେଶ୍ୟ ହେଉଛି ସାଧାରଣ ଲୋକଙ୍କୁ ସହଜରେ ନିଶ୍ଚିତ ହୋଇଥିବା ତତ୍କାଳ ଟିକେଟ୍ ଯୋଗାଇବା।
Newsletter
