Ranji Trophy: ਰਣਜੀ ਟਰਾਫੀ ਵਿੱਚ ਵੀ ਰੋਹਿਤ, ਯਸ਼ਸਵੀ, ਸ਼ੁਭਮਨ ਤੇ ਪੰਤ ਹੋਏ ਫੇਲ੍ਹ

Ranji Trophy: ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਇਸ ਸਮੇਂ ਫਾਰਮ ਦੀ ਭਾਲ ਲਈ ਜੱਦੋ-ਜਹਿਦ ਕਰ ਰਹੇ ਹਨ। ਇਸ ਲਈ ਉਸ ਨੇ ਰਣਜੀ ਟਰਾਫੀ 'ਚ ਮੁੰਬਈ ਲਈ ਖੇਡਣ ਦਾ ਫੈਸਲਾ ਕੀਤਾ ਸੀ। ਹਾਲਾਂਕਿ, ਉਹ ਲਗਭਗ 10 ਸਾਲਾਂ ਬਾਅਦ ਰਣਜੀ ਵਿੱਚ ਵਾਪਸੀ ਵਿੱਚ ਵੀ ਨਾਕਾਮ ਰਹੇ। ਲਗਭਗ ਇਕ ਦਹਾਕੇ ਬਾਅਦ ਰਣਜੀ ਟਰਾਫੀ ਮੈਚ ਖੇਡਣ ਆਏ ਰੋਹਿਤ ਜੰਮੂ-ਕਸ਼ਮੀਰ ਖਿਲਾਫ ਮੁੰਬਈ 'ਚ ਖੇਡੇ ਗਏ ਮੈਚ 'ਚ ਪਹਿਲੀ ਪਾਰੀ 'ਚ ਸਿਰਫ ਤਿੰਨ ਦੌੜਾਂ ਬਣਾ ਕੇ ਆਊਟ ਹੋ ਗਏ।

ਉਨ੍ਹਾਂ ਨੂੰ ਉਮਰ ਨਜ਼ੀਰ ਨੇ ਡੋਗਰੇ ਦੇ ਹੱਥੋਂ ਫੜ ਲਿਆ ਸੀ। ਰੋਹਿਤ 19 ਗੇਂਦਾਂ ਹੀ ਖੇਡ ਸਕਿਆ। ਰੋਹਿਤ ਹੀ ਨਹੀਂ, ਯਸ਼ਸਵੀ ਜੈਸਵਾਲ, ਸ਼੍ਰੇਅਸ ਅਈਅਰ ਅਤੇ ਮੁੰਬਈ ਦੇ ਕਪਤਾਨ ਅਜਿੰਕਿਆ ਰਹਾਣੇ ਦੇ ਬੱਲੇ ਵੀ ਸ਼ਾਂਤ ਰਹੇ। ਦੂਜੇ ਪਾਸੇ ਪੰਜਾਬ-ਕਰਨਾਟਕ ਵਿਚਾਲੇ ਹੋਏ ਮੈਚ 'ਚ ਸ਼ੁਭਮਨ ਗਿੱਲ ਅਤੇ ਦਿੱਲੀ-ਸੌਰਾਸ਼ਟਰ ਵਿਚਾਲੇ ਹੋਏ ਮੈਚ 'ਚ ਰਿਸ਼ਭ ਪੰਤ ਵੀ ਫਲਾਪ ਸਾਬਤ ਹੋਏ।

ਰੋਹਿਤ ਸ਼ਰਮਾ ਜੰਮੂ-ਕਸ਼ਮੀਰ ਖ਼ਿਲਾਫ਼ ਏਲੀਟ ਗਰੁੱਪ-ਏ ਮੈਚ ਵਿੱਚ ਸਿਰਫ਼ 3 ਦੌੜਾਂ ਬਣਾ ਕੇ ਸਸਤੇ ਵਿੱਚ ਪੈਵੇਲੀਅਨ ਪਰਤ ਗਏ। ਰੋਹਿਤ ਨੇ ਯਸ਼ਸਵੀ ਜੈਸਵਾਲ ਦੇ ਨਾਲ ਮੁੰਬਈ ਲਈ ਪਾਰੀ ਦੀ ਸ਼ੁਰੂਆਤ ਕੀਤੀ। 19 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ, ਰੋਹਿਤ ਨੂੰ ਮੈਦਾਨ 'ਤੇ ਦੌੜਾਂ ਬਣਾਉਣ ਲਈ ਸੰਘਰਸ਼ ਕਰਨਾ ਪਿਆ ਅਤੇ ਜੰਮੂ-ਕਸ਼ਮੀਰ ਦੇ ਗੇਂਦਬਾਜ਼ ਉਮਰ ਨਜ਼ੀਰ ਦੀ ਗੇਂਦ 'ਤੇ ਪੀਕੇ ਡੋਗਰਾ ਨੇ ਉਸਨੂੰ ਕੈਚ ਕਰ ਲਿਆ। ਇਸ ਤੋਂ ਬਾਅਦ ਕਪਤਾਨ ਅਜਿੰਕਿਆ ਰਹਾਣੇ ਵੀ ਉਮਰ ਨਜ਼ੀਰ ਦੀ ਗੇਂਦ 'ਤੇ ਬੋਲਡ ਹੋ ਗਏ। ਰਹਾਣੇ ਨੇ 17 ਗੇਂਦਾਂ 'ਤੇ 12 ਦੌੜਾਂ ਬਣਾਈਆਂ, ਜਿਸ ਵਿੱਚ ਦੋ ਚੌਕੇ ਸ਼ਾਮਲ ਸਨ। ਯਸ਼ਸਵੀ 8 ਗੇਂਦਾਂ 'ਤੇ 4 ਦੌੜਾਂ ਬਣਾ ਕੇ ਆਊਟ ਹੋ ਗਿਆ।

ਰੋਹਿਤ 2015 ਤੋਂ ਬਾਅਦ ਪਹਿਲੀ ਵਾਰ ਰਣਜੀ ਮੈਚ ਖੇਡ ਰਹੇ
ਨਿਊਜ਼ੀਲੈਂਡ ਖਿਲਾਫ ਘਰੇਲੂ ਮੈਦਾਨ 'ਤੇ ਤਿੰਨ ਮੈਚਾਂ ਦੀ ਟੈਸਟ ਸੀਰੀਜ਼ 'ਚ ਰੋਹਿਤ ਦਾ ਬੱਲਾ ਖਾਮੋਸ਼ ਰਿਹਾ ਅਤੇ ਉਹ ਛੇ ਪਾਰੀਆਂ 'ਚ ਸਿਰਫ 93 ਦੌੜਾਂ ਹੀ ਬਣਾ ਸਕਿਆ। ਇਸ ਤੋਂ ਬਾਅਦ ਆਸਟ੍ਰੇਲੀਆ ਦੌਰੇ 'ਤੇ ਉਹ ਪੰਜ ਪਾਰੀਆਂ 'ਚ ਸਿਰਫ 31 ਦੌੜਾਂ ਹੀ ਬਣਾ ਸਕਿਆ। ਅਜਿਹੇ 'ਚ ਰੋਹਿਤ ਨੇ ਚੈਂਪੀਅਨਸ ਟਰਾਫੀ ਤੋਂ ਪਹਿਲਾਂ ਆਪਣੀ ਫਾਰਮ ਨੂੰ ਮੁੜ ਹਾਸਲ ਕਰਨ ਲਈ ਰਣਜੀ ਟਰਾਫੀ 'ਚ ਖੇਡਣ ਦਾ ਫੈਸਲਾ ਕੀਤਾ। ਨਵੰਬਰ 2015 ਤੋਂ ਬਾਅਦ ਪਹਿਲੀ ਵਾਰ ਉਹ ਰਣਜੀ ਮੈਚ ਖੇਡਣ ਆਇਆ ਸੀ ਪਰ ਇੱਥੇ ਵੀ ਉਹ ਫਲਾਪ ਰਿਹਾ। ਹੁਣ ਦੂਜੀ ਪਾਰੀ ਵਿੱਚ ਉਸ ਤੋਂ ਦੌੜਾਂ ਦੀ ਉਮੀਦ ਕੀਤੀ ਜਾਵੇਗੀ।