Kozhikode Medical College Fire Accident: കോഴിക്കോട് മെഡിക്കൽ കോളജ് അപകടം; തീപിടിക്കാൻ കാരണം ബാറ്ററിയിലെ തകരാർ

പൊട്ടിത്തെറിയുണ്ടായതോടെ ആകെ 34 ബാറ്ററികൾ കത്തി നശിച്ചു. സംഭവത്തിലെ പ്രാഥമിക അന്വേഷണ റിപ്പോർട്ടിന്റെ വിവരങ്ങളാണ് പുറത്ത് വന്നിരിക്കുന്നത്.

കോഴിക്കോട്: മെഡിക്കൽ കോളേജിൽ പുക ഉയർന്ന സംഭവത്തിൽ പ്രാഥമിക അന്വേഷണ റിപ്പോർട്ടിന്റെ വിവരങ്ങൾ പുറത്ത്. സിപിയു യൂണിറ്റിൽ തീപിടിക്കാൻ ​കാരണം ബാറ്ററിയിലെ തകരാർ ആണെന്നാണ് പ്രാഥമിക വിവരം. 

ഷോർട്ടേജ് മൂലം ബാറ്ററി ചൂടായി ബൾജ് ചെയ്ത് പൊട്ടിത്തെറിക്കുകയായിരുന്നു. ഇതോടെ മറ്റ് ബാറ്ററികളിലേക്കും തീ പടരുകയും പൊട്ടിത്തെറിയുണ്ടാകുകയും ചെയ്തു. ആകെ 34 ബാറ്ററികളാണ് കത്തി നശിച്ചതെന്നാണ് റിപ്പോർട്ട്. ലെഡ് ആസിഡ് ബാറ്ററികളാണ് പൊട്ടിത്തെറിച്ചത്. സംഭവത്തിൽ പ്രാഥമിക റിപ്പോർട്ട് സർക്കാരിന് കൈമാറി. അതേസമയം മെഡിക്കൽ കോളജിലെ അത്യാഹിത വിഭാ​ഗം വീണ്ടും പ്രവർത്തന സജ്ജമായി. 

അതേസമയം അപകടത്തിനിടെ മരിച്ച മേപ്പാടി സ്വദേശി നസീറയുടെ പ്രാഥമിക പോസ്റ്റ്‌മോർട്ടം റിപ്പോർട്ട് പുറത്ത് വന്നിരുന്നു. വിഷം അകത്തു ചെന്നുണ്ടായ മരണമെന്നാണ് റിപ്പോർട്ട്‌. നേരത്തെ, മരിച്ച 3 പേരുടെ പ്രാഥമിക പോസ്റ്റ്‌ മോർട്ടം റിപ്പോർട്ട്‌ പുറത്തുവന്നിരുന്നു. ഇവരുടെ മരണം പുക ശ്വസിച്ചുണ്ടായ ശ്വാസ തടസ്സം മൂലമല്ലെന്നാണ് റിപ്പോർട്ടിലുള്ളത്. വെസ്റ്റ് ഹിൽ സ്വദേശി ഗോപാലൻ, മേപ്പയ്യൂർ സ്വദേശി ഗംഗാധരൻ, വടകര സ്വദേശി സുരേന്ദ്രൻ എന്നിവരുടെ പോസ്റ്റ്മോർട്ടം റിപ്പോർട്ട്‌ ആണ്‌ പുറത്ത് വന്നത്. ആന്തരികാവയവങ്ങൾ കൂടുതൽ പരിശോധനയ്ക്കു അയക്കും.

മെയ് 2ന് രാത്രി 8മണിയോടെയാണ് അപകടമുണ്ടായത്. മെഡിക്കൽ കോളേജിലെ പിഎംഎസ്എസ്‌വൈ ബ്ലോക്ക് അത്യാഹിതവിഭാഗത്തിൽ എംആർഐ യൂണിറ്റിന്റെ യുപിഎസിൽ (ബാറ്ററി യൂണിറ്റ്) ഷോർട്ട്‌ സർക്യൂട്ടിനെ തുടർന്ന് ഭയനകമായ ശബ്ദത്തിൽ പൊട്ടിത്തെറിയുണ്ടാവുകയും പുകപടലം ഉയരുകയുമായിരുന്നു.