Axiom-4 mission Launch Postponed: വീണ്ടും മാറ്റി; റോക്കറ്റിൽ ഇന്ധന ചോർച്ച; ശുഭാംശു ശുക്ലയുടെ ബഹിരാകാശ യാത്ര വൈകും

Axiom-4 mission Launch Updates: പോസ്റ്റ്-സ്റ്റാറ്റിക് ഫയർ ബൂസ്റ്റർ പരിശോധനകളിൽ ദ്രാവക ഓക്‌സിജൻ ചോർച്ച കണ്ടെത്തിയതിനെ തുടർന്നാണ് കാലതാമസം

ന്യൂയോർക്ക്: അന്താരാഷ്ട്ര ബഹിരാകാശ നിലയത്തിലേക്ക് വ്യോമസേനാ ഗ്രൂപ്പ് ക്യാപ്റ്റൻ ശുഭാംശു ശുക്ലയുടെ ബഹിരാകാശ യാത്ര നീളും. ഫാൽക്കൺ 9 റോക്കറ്റിൽ ലിക്വിഡ് ഓക്സിജൻ ചോർച്ച കണ്ടെത്തിയതിനെ തുടർന്നാണ് ദൗത്യം വീണ്ടും മാറ്റിവച്ചത്. പരിശോധന തുടരുകയാണെന്ന് അധിക‍ൃതർ അറിയിച്ചിട്ടുണ്ട്. 

ഇന്ന് വൈകുന്നേരം ഇന്ത്യൻ സമയം  5:30 ന് യാത്ര പുറപ്പെടാനായിരുന്നു നിശ്ചയിച്ചിരുന്നത്. നേരത്തെ 3 തവണ യാത്ര മാറ്റിവച്ചിരുന്നു. നാളെ വിക്ഷേപണം നടന്നേക്കുമെന്നും റിപ്പോർട്ടുണ്ട്.  രാകേഷ് ശർമയ്ക്കു ശേഷം ബഹിരാകാശത്തെത്തുന്ന ഇന്ത്യൻ പൗരനാകാനാണ് വ്യോമസേനാ ഗ്രൂപ്പ് ക്യാപ്റ്റൻ ശുഭാംശുവിന്റെ ദൗത്യം. ആക്സിയം 4 എന്നു പേരിട്ടിരിക്കുന്ന യാത്ര ലക്ഷ്യം നേടിയാൽ രാജ്യാന്തര ബഹിരാകാശ നിലയത്തിലെത്തുന്ന ആദ്യ ഇന്ത്യക്കാരനാകും ശുഭാംശു എന്നഹ്‌റ് ശ്രദ്ധേയം.  യാത്രയുടെ പ്രധാന സംഘാടകർ ആക്സിയം സ്പേസ് എന്ന സ്വകാര്യ കമ്പനിയാണ്.

ഫ്ലോറിഡയിലെ കെന്നഡി സ്പേസ് സെന്ററിൽ നിന്ന് സ്പേസ്എക്സിന്റെ ഫാൽക്കൺ 9 ബ്ലോക്ക് 5 റോക്കറ്റാണു 4 യാത്രികരുമായി കുതിക്കുക. ഈ റോക്കറ്റിന്റെ മുകളിൽ ഘടിപ്പിച്ചിട്ടുള്ള ഡ്രാഗൺ സി213 പേടകത്തിലാണു യാത്രക്കാർ ഇരിക്കുക. പരിചയസമ്പന്നയായ ഗഗനചാരിയും നാസയുടെ മുതിർന്ന ആസ്ട്രോനോട്ട്  പെഗ്ഗി വിറ്റ്സൻ (യുഎസ്) നയിക്കുന്ന യാത്രയിൽ സ്ലാവോസ് വിസ്നീവ്സ്കി (പോളണ്ട്), ടിബോർ കാപു (ഹംഗറി) എന്നിവരാണു മറ്റു യാത്രികർ. 1984 ഏപ്രിൽ 3 ന് ആയിരുന്നു രാകേഷ് ശർമയുടെ ബഹിരാകാശ യാത്ര. ഐഎസ്ആർഒയും ആക്സിയവും നാസയും സ്പേസ് എക്സും തമ്മിലുള്ള കരാറുകളുടെ അടിസ്ഥാനത്തിലാണ് ഈ യാത്ര. ബഹിരാകാശ നിലയത്തിലെത്തിയ ശേഷം 14 ദിവസം ഇവർ അവിടെ തങ്ങി വിവിധ പരീക്ഷണങ്ങള്‍ നടത്തുമെന്നാണ് റിപ്പോർട്ട്.