जगातील सर्वात उंच बुर्ज खलिफा इमारतीवर चढला हा अभिनेता, 2722 फूट उंचीवरुन काढला फोटो

दुबई : हॉलिवूड अभिनेता विल स्मिथ (Will Smith) जगातील सर्वात उंच इमारतींपैकी एक असलेल्या बुर्ज खलिफाच्या शिखरावर उभा असल्याचे दिसले. YouTube मालिकेसाठी स्मिथ दुबईतील बुर्ज खलिफा (Burj Khalifa) इमारतीच्या शिखरावर पोहोचला. सोशल मीडियावर विल स्मिथचे जबरदस्त फोटो पाहून त्याचे चाहते आश्चर्यचकित झाले.

'डेली मेल'च्या रिपोर्टनुसार, ही 160 मजली इमारत 2,722 फूट उंच आहे. यामध्ये 53 वर्षीय अभिनेता विल स्मिथ उभा होता. यूट्यूब शो 'बेस्ट शेप ऑफ माय लाइफ' च्या एका एपिसोडमध्ये स्मिथने जगातील सर्वात उंच इमारतीच्या शिखरावर चढाई केली.

विल स्मिथ बुर्ज खलिफाच्या शिखरावर हात पसरून कसा उभा आहे हे चित्रांमध्ये दिसत आहे. यावेळी तो हसताना दिसला. एका छायाचित्रात तो इमारतीच्या वरच्या बाजूला बसलेलाही दिसत आहे. स्मिथ शूटिंगसाठी लॉस एंजेलिस (अमेरिका) येथून दुबईला आला होता.

विल स्मिथ कोण आहे?

विल स्मिथ एक अमेरिकन अभिनेता, रॅपर आणि चित्रपट निर्माता आहे. स्मिथला पाच गोल्डन ग्लोब पुरस्कार आणि दोन अकादमी पुरस्कारांसाठी नामांकन मिळाले आहे. त्याने चार ग्रॅमी पुरस्कारही जिंकले आहेत.