'...म्हणून तुझ्या डोक्यात हवा गेली होती', राशीचक्रकार शरद उपाध्येंचं निलेश साबळेला खुलं पत्र

Sharad Upadhye On Nilesh Sable: राशीचक्रकार शरद उपाध्ये यांनी निलेश साबळेसाठी एक खरमरीत पोस्ट लिहली आहे.

Sharad Upadhye On Nilesh Sable: झी मराठी वाहिनीवर  चला हवा येऊ द्याचे दुसरे पर्व येत आहे. मात्र या पर्वात अनेक बदल बघायला मिळणार आहेत. सर्वात मोठा बदल म्हणजे या कार्यक्रमाचे सूत्रसंचालन आता अभिनेता अभिजीत खांडकेकर करणार आहे. यापूर्वी निलेश साबळे हा चला हवा येऊ द्याचा सूत्रसंचालन करायचा मात्र आता निलेशच्या जागी अभिजित कार्यक्रमाच्या सूत्रसंचालनाची जबाबदारी पार पाडणार आहे. या बदलावर आता राशीचक्राकार शरद उपाध्ये यांनी एक खरमरीत पोस्ट केली आहे. तसंच, निलेश साबळे यांचे कान टोचले आहेत. 

शरद उपाध्ये यांनी पोस्टमध्ये म्हटलं आहे की, आदरणीय नीलेशजी साबळे,आपल्याला हवा येऊ द्याच्या दुस-या पर्वातून डच्चू देऊन त्या जागी अभिजीत खांडकेकरना आणल्याची बातमी आज पेपरमध्ये वाचली. वाईट वाटले पण आश्चर्य नाही
मला तुम्ही एकदा बोलवले होते. त्याप्रमाणे मी 11 वा.पोहोचलो. पण 3 वाजेपर्यंत त्या रुममध्ये कोणीच फिरकले नाही. मला पाणी हवे होते पण एकादोघांना सांगूनही ते आणतो म्हणून गेले ते आलेच नाहीत. 

मला रूम सोडू नका असे सांगीतले होते. निलेश तुम्ही इतर कलावंतांच्या रुम मध्ये जाऊन गप्पा मारीत होतात पण माझ्या रुममध्ये डोकावलात ते थेट 4 वा. स्माईलही न देता स्टेजवर गेलात. इतरांचे शूटिंग खूप वेळ केलेत पण मला 6 वा. बोलावून घाईघाईत 15 मिनिटात सारे आटोपले. त्यावेळीही इतर कलावंत मधेमधे बोलत होते. माझा सारा दिवस फुकट गेला. एडिटींग मध्येही माझी उत्तरे गाळलीत. बाहेर आपली भेट झाली तेंव्हा वडीलांच्या नात्याने काही सल्ले दिले, असंही उपाध्ये यांनी म्हटलं आहे.

पण कार्यक्रमाचे प्रमुख म्हणून आपल्या डोक्यात हवा गेली होती. दुस-याच्या विषयाबद्दल आदर ठेवायचा असतो पण तुम्ही बेपर्वा होतात. त्याच वेळी मला वाटले की अहंकार अति वाईट. गर्विष्ट माणसाचे अध:पतन होते. एखादी पोस्ट मिळाली की ताठा येतो आणि सर्वनाश होतो. स्टेजवर तुम्ही सा-यांना आपलेसे केले नाही.आपले सादरीकरणही आकर्षक होत नव्हते. या सा-याचा परिणाम म्हणजे तुम्हाला चॅनेलने बाहेर काढले, असंही त्यांनी पोस्टमध्ये म्हटलं आहे.

नीलेशजी स्वभाव मनमिळाऊ असावा सा-यांना सांभाळून घ्यावे मग सारे एकजुटीने काम करून कार्यक्रमाची चर्चा होईल. अभिजीत खांडकेकर ही धुरा चांगली सांभाळतील. मला
त्यांचा सहवास मिळाला आहे. आपण अनुभवी आहात. त्यांना मार्गदर्शन करा. इंडस्ट्रीत आपल्याविषयी असलेले गैरसमज आपल्या चांगल्या कामाने दूर करा. आपल्याला ईश्वराची साथ लाभो ही विनंती, असंही त्यांनी पुढे म्हटलं आहे.