का थांबले ‘वेलकम टू द जंगल’चं शूटिंग? दिग्दर्शक अहमद खाननं केला खुलासा

'वेलकम टू द जंगल' हा चित्रपट प्रेक्षकांच्या भेटीला येणार होता. मात्र, इंटरनेटवर बजेटमुळे शुटींग थांबवण्यात आले, अशा अफवा पसरत आहेत. पाहूयात या अफवांवर दिग्दर्शक काय म्हणाले.

Welcome To The Jungle: अक्षय कुमारचा बहुप्रतिक्षित मल्टीस्टारर चित्रपट 'वेलकम टू द जंगल' याबाबत एक मोठी बातमी समोर आली आहे. काही दिवसांपूर्वी या चित्रपटाचं चित्रीकरण अचानक थांबवलं गेल्याचं वृत्त समोर आलं होतं. मात्र आता दिग्दर्शक अहमद खान यांनी या संदर्भात मौन सोडत, चित्रपटाच्या शुटिंगविषयी महत्त्वाची माहिती दिली आहे.

बॉलिवूडच्या कल्ट कॉमेडी चित्रपटांची परंपरा
2000 च्या दशकात बॉलिवूडने अनेक धमाल विनोदी चित्रपट दिले. त्यातीलच 'हेरा फेरी' आणि 'वेलकम' हे चित्रपट विशेष गाजले. या दोन्ही चित्रपटांचे सिक्वेल प्रेक्षकांच्या पसंतीस उतरले आणि आता त्यांचे तिसरे भागही तयार होत आहेत. मात्र, निर्मिती दरम्यान अडथळे येत असल्याचे दिसून येत आहे.

शूटिंग खरंच बजेटमुळे थांबलं का?
इंटरनेटवर अशा अफवा होत्या की, 'वेलकम टू द जंगल' चे शूटिंग बजेटअभावी थांबवावे लागले, तसेच कलाकारांना मानधन न मिळाल्यामुळे काहींनी चित्रपट सोडल्याची चर्चा होती. मात्र, एका मुलाखतीत अहमद खान यांनी हे सर्व दावे फेटाळले आहेत.

अहमद खान यांचं स्पष्टीकरण
अहमद खान म्हणाले, 'चित्रपटाचे दोन मोठे शेड्यूल्स आम्ही आधीच शूट केले आहेत. जूनमध्ये आम्ही काश्मीरमध्ये तिसरं शेड्यूल सुरू करणार होतो. मात्र, पहलगाममध्ये झालेल्या दहशतवादी हल्ल्यामुळे आम्हाला काश्मीरचं शूटिंग स्थगित करावं लागलं.'

नवीन लोकेशन्सचा विचार सुरू
दिग्दर्शक पुढे म्हणाले, 'आता आम्ही काश्मीरऐवजी कुल्लू किंवा इतर ठिकाणी शूटिंग करण्याचा विचार करत आहोत. मात्र, आता संपूर्ण वेळापत्रक नव्याने आखावं लागणार आहे. विशेष म्हणजे 36 कलाकारांची एकत्र उपलब्धता निश्चित करणं देखील मोठं आव्हान आहे.'

बजेट आणि मानधनाबद्दल स्पष्टीकरण
अहमद खान म्हणाले, 'माझ्याकडे कोणतीही आर्थिक अडचण किंवा मानधनाबाबतची माहिती नाही. या सर्व बाबी निर्माता फिरोज नाडियाडवाला हाताळतात.'

हे ही वाचा: चहलच्या नावाने ट्रोल करणाऱ्याला RJ महवशचं सणसणीत उत्तर; म्हणाली, 'मी तेव्हापासून क्रिकेट...'

चित्रपटाची घोषणा आणि उत्सुकता
'वेलकम टू द जंगल' ची अधिकृत घोषणा दोन वर्षांपूर्वी करण्यात आली होती. एक दमदार अनाउंसमेंट व्हिडीओही शेअर करण्यात आला होता, ज्यामध्ये तब्बल 25 कलाकार झळकत होते. हा चित्रपट 2025 च्या ख्रिसमसला प्रदर्शित होणार असल्याचं जाहीर करण्यात आलं आहे. तथापि, या चित्रपटात नाना पाटेकर आणि अनिल कपूर नसल्याने काही चाहते नाराज झाले होते.

चित्रपटाची वाट पाहणं सुरूच…
'वेलकम टू द जंगल' या चित्रपटाकडून प्रेक्षकांच्या खूप अपेक्षा आहेत. आता चित्रपट कोणत्या वेगाने पूर्ण होतो आणि तो पुन्हा धमाल उडवतो का हे पाहाणे उत्सुकतेचे ठरणार आहे.