भारताचा सर्वाधिक कमाई करणारा चित्रपट पुन्हा थिएटरमध्ये; राजामौली घेऊन येत आहेत एक भन्नाट ट्विस्ट!

एस.एस. राजामौली हे भारतीय चित्रपटसृष्टीतील सर्वात यशस्वी दिग्दर्शकांपैकी एक मानले जातात. त्यांच्या दिग्दर्शित चित्रपटांनी ऑस्करपर्यंत बाजी मारली आहे. आता त्यांच्या दोन ब्लॉकबस्टर चित्रपटांचा पुन्हा एकदा थिएटरमध्ये प्रवेश होणार आहे. जाणून घेऊयात हा दमदार चित्रपट पुन्हा कधी रीलीज होणार.

S. S. Rajamouli: दक्षिणेतील सुप्रसिद्ध दिग्दर्शक म्हणून ओळखले जाणारे एस.एस. राजामौली त्यांच्या दूरदृष्टीपूर्ण दिग्दर्शनासाठी प्रसिद्ध आहेत. त्यांनी भारतीय सिनेसृष्टीला अनेक ऐतिहासिक चित्रपट दिले आहेत. नुकताच त्यांच्या 'आरआरआर' या 2022 मध्ये प्रदर्शित चित्रपटाने जागतिक स्तरावर खळबळ उडवून दिली होती. त्याआधी 'बाहुबली: द बिगिनिंग' (2015) आणि 'बाहुबली 2: द कन्क्लुजन' (2017) या चित्रपटांनी अभूतपूर्व यश मिळवले होते. आता हे दोन्ही चित्रपट पुन्हा एकदा थिएटरमध्ये दाखल होणार आहेत.

काय आहे नवीन ट्विस्ट?
अलीकडेच अनेक जुने चित्रपट पुन्हा प्रदर्शित करून चांगली कमाई करत आहेत. ज्यात 'तुंबाड' आणि 'लैला मजनू' यांचा समावेश आहे. त्याच पद्धतीने 'बाहुबली'चे निर्माते ऑक्टोबरमध्ये या दोन्ही चित्रपटांचे पुन्हा जागतिक स्तरावर प्रदर्शन करण्याची योजना आखत आहेत.

यावेळी विशेष म्हणजे, राजामौली हे दोन्ही चित्रपटांचे महत्त्वाचे क्षण एकत्र करून एक नवीन संक्षिप्त रुप तयार करत आहेत. म्हणजेच, जवळपास 6 तासांची कथा एका सुमारे 3 तासांच्या दमदार सिनेमात पाहता येणार आहे. हे एक मोठं सिनेमॅटिक एक्सपेरिमेंट मानलं जात आहे आणि यामुळे चित्रपटसृष्टीत एक नवीन ट्रेंड सुरू होण्याची शक्यता आहे.

'बाहुबली' ची कामगिरी
'बाहुबली' चित्रपट मालिकेने जगभरात तेलुगू चित्रपटसृष्टीचे सामर्थ्य दाखवून दिले. या चित्रपटांनी प्रभास आणि राजामौली यांना सुपरस्टार्सच्या यादीत आणून ठेवले. शोबू यारलागड्डा आणि प्रसाद देविनेनी यांनी 'अर्का मीडिया वर्क्स' अंतर्गत या चित्रपटांची निर्मिती केली होती. संगीतकार एम.एम. कीरावानी यांचे संगीत सुपरहिट ठरले होते आणि याच संगीतकाराला 'आरआरआर'साठी ऑस्कर सन्मानही प्राप्त झाला होता.

एकूण कमाई
एका अहवालानुसार, प्रभास, अनुष्का शेट्टी, तमन्ना भाटिया आणि राणा दग्गुबती यांच्या प्रमुख भूमिका असलेल्या या चित्रपटाने एकत्रितपणे तब्बल 2,460 कोटींहून अधिक कमाई केली. 'बाहुबली: द बिगिनिंग' ने 650 कोटींची कमाई केली, तर 'बाहुबली 2' ने 1,810 कोटींची विक्रमी कमाई केली होती.

प्रभासचे आगामी प्रोजेक्ट्स
प्रभासला शेवटचं प्रेक्षकांनी 2024 मध्ये आलेल्या 'कलकी 2898 ए.डी.' मध्ये पाहिलं. आता तो 'द राजा साब' या हॉरर-कॉमेडी चित्रपटात झळकणार आहे, जो 5 डिसेंबर 2025 रोजी प्रदर्शित होणार आहे. या चित्रपटाचं लेखन आणि दिग्दर्शन मारुती यांनी केलं असून, प्रभास यामध्ये दुहेरी भूमिकेत दिसणार आहे. यासोबतच निधी अग्रवाल, मालविका मोहनन आणि रिद्धी कुमार प्रमुख भूमिका साकारणार आहेत. याशिवाय, प्रभास 'स्पिरिट' आणि 'सलार 2' या बहुप्रतिक्षित चित्रपटांमध्येही झळकणार आहे.