गर्भवती महिलेने बॉल पिन गिळली; डॉक्टरांनी एक्स-रे किंवा सीटीस्कॅन न करता असे वाचवले प्राण

संभाजीनगरमध्ये अत्यंत विचित्र घटना घडली आहे. गर्भवती महिलेने बॉल पिन गिळली आहे.

Sambhaji Nagar News : गर्भवती महिलेने बॉल पिन गिळल्याची धक्कादायक घटना संभाजीनगरमध्ये घडली आहे. गर्भवती असल्याने डॉक्टरांनी एक्स-रे किंवा सीटीस्कॅन न करता अतिशय काळजीपूर्व निर्यण घेतला आणि वैद्यकीय तंत्रज्ञानाच्या मदतीने या महिलेचे प्राण वाचवले. मात्र, संपूर्ण रात्रभर या महिलेला त्रास सहन करावा लागला. 

मेकअप करताना आणि स्कार्फ बांधताना  तोंडात ठेवलेली बॉलपिन एका महिलेच्या पोटात गेली. ही महिला  सहा महिन्यांची गर्भवती आहे.  या  महिलेला कुटुंबाच्या  कार्यक्रमाला जायचे होते. त्यासाठी महिला मेकअप करत होती. या वेळी स्कार्फ फिट ठेवण्यासाठी लावली जाणारी बॉलपिन तिने  तोंडात ठेवली. ही पिन चुकून गिळली गेली. तोंडात ठेवलेली ही पिन थेट महिलेच्या जठरात गेली. यामुळे महिला भयभित झाली. 

महिला 6 महिन्यांची गर्भवती होती. त्यामुळं कुटुंबीय घाबरले. गर्भवती असल्याने एक्स-रे किंवा सीटीस्कॅन करणे शक्य नव्हते. डॉक्टरांनी एंडोस्कोपीचा पर्याय सांगितला. महिला जेवली असल्याने इंडोस्कोपी सुद्धा तात्काळ करणे शक्य नव्हते. अखेर महिलेने कशीबशी रात्र काढावी लागली. सकाळी इंडोस्कोपीच्या माध्यमातून पिन काढण्यात डॉक्टरला यश आले.या महिलेच्या पोटात बाळ असल्याने बाळाला आणि महिलेला धोका होता मात्र धोका टळला आहे. आई आणि पोटातील बाळ दोघेही सुखरूप आहेत.

धक्कादायक म्हणजे या वर्षातील अशी ही पाचवी घटना असल्याचे महिलेवर शस्त्रक्रिया करणारे डॉक्टर चेतन राठी यांनी सांगितले.  पाचही घटनात महिलांना वाचवण्यात यश आले आहे.  मात्र अशा पद्धतीने मेकअप करताना स्कार्फ बांधताना महिलांनीही काळजी घ्यावी असं  कळकळीचा आवाहन डॉक्टरांनी केले आहे.