Akshaya Tritiya ला सोनं घ्यावं की घर बूक करावं? जाणून घ्या मार्केट काय सांगतंय

Akshaya Tritiya 2025: अक्षय तृतीयेच्या मुहूर्तावर यंदा घर बुक करायचं की सोनं घ्यायचं यासंदर्भात वेगवेगळ्या चर्चा दिसून येत आहेत.

Akshaya Tritiya 2025 Gold Rate: मागील काही आठवड्यांपासून सोन्याचे भाव सातत्याने वाढताना दिसत आहेत. एप्रिलच्या शेवटून दुसऱ्या आठवड्या सोन्याच्या भावाने प्रति तोळा एक लाख रुपयांचा टप्पा ओलांडला होता. त्यामुळे साडेतीन मुहूर्तापैकी एक असलेल्या अक्षय तृतीयेच्या मुहूर्तावर ग्राहकांचा कल सोने की चांदी खरेदीकडे अधिक असेल का? याबाबत आता सराफ बाजारालाही उत्सुकता आहे. 

घरखरेदीही मोठ्या प्रमाणात होणार

मे महिन्यातील लग्नसराईचा हंगाम पाहता, ग्राहकांचा कल सोने खरेदीकडे अधिक असू शकतो, अशी अपेक्षा सराफा बाजारातील व्यापाऱ्यांनी व्यक्त केली आहे. दुसरीकडे बांधकाम व्यावसायिकांनीही सणासुदीनिमित्त विविध सवलतींच्या ऑफर्स आणल्या आहेत. त्यादृष्टीने त्यांनी तशा जाहिरातीही केल्या आहेत. म्हणून घरखरेदीही मोठ्या प्रमाणात होईल अशी अपेक्षा व्यक्त केली जात आहे.

सोन्याचा भाव 56 हजार रुपये तोळा होईल, अशी अफवा

अमेरिकेने लादलेले 'टेरिफ' आणि डॉलरच्या भावातील चढ-उतार यामुळे सोन्याच्या भावाने प्रति तोळा एक लाख रुपयांपर्यंत उडी घेतली आहे. गेल्या महिनाभरापासून सोन्याचा भाव खाली येण्याचे नाव घेत नाही. त्यामुळे सोने खरेदी करणाऱ्यात रस असलेल्या ग्राहकांची संख्या कमी झाल्याचे सराफांनी सांगितले. मध्यंतरी सोन्याचा भाव 56 हजार रुपये तोळा होईल, अशी अफवा होती. परिणामी, ग्राहक अधिक गोंधळात पडले होते. मात्र, आता सोन्याचा भाव थेट लाखावर पोहोचल्याने झळाळी आल्याचे पाहायला मिळत आहे. 

गुंतवणूक म्हणून सोन्याची खरेदी

अक्षय तृतीयेच्या मुहूर्तावर हमखास सोने खरेदी केली जाते. सध्या महागाईच्या काळात सोने खरेदी करणे सामान्य नागरिकांना कठीण झाले आहे, परंतु अनेक जण खिशाला परवडेल इतके सोने खरेदी करताना दिसतात, तर अनेकजण गुंतवणूक म्हणून सोन्याची खरेदी करताना दिसतात.

सोनं विरुद्ध घर

> मुंबईतील रिअल इस्टेट बाजार सध्या मोठ्या वाढीच्या टप्प्यावर आहे. 
> साडेतीन मुहूर्तापैकी एक असलेल्या अक्षय तृतीयेला सोने, घर खरेदी करण्याची परंपरा आहे. 
> अक्षय तृतीयेनिमित्त घरांची विक्री व्हावी, यासाठी अनेक बांधकाम व्यावसायिकांनी सोने, कॅशबॅक आदी ऑफर्स आणल्या आहेत. 
> गृहकर्जावर कमी व्याजदर आणि आकर्षक ऑफर्स यामुळे घर खरेदीसाठी सध्याचा उत्तम काळ आहे, अशा जाहिराती अनेकांनी केल्या आहेत.